Read Diospa Simin Qelqa DEUTERONOMIO 30 Bible Online

DEUTERONOMIO 30 - Diospa Simin Qelqa bible

DEUTERONOMIO 30

¹Willarqaykichisñan saminchaykunamantapas ñakaykunamantapas, tukuy chaykuna taripasuqtiykichismi Señor Dios ch'eqechisunkichis chay suyukunapi willasqayta yuyarinkichis.

²Chaypitaq qankunapas wawaykichiskunapas Señor Diosman kutirikunkichis, tukuy sonqo tukuy almataq payta kasunkichis kunan kamachishaykichis chayman hina chayqa,

³Diosniykichis Señor Diosmi wakmanta allinyachisunkichispas khuyapayasunkichispas, hinaspan ch'eqechisqasuykichis tukuy suyukunamanta huñumusunkichis.

⁴Kay pachapi sinchi karu llaqtakunamanña ch'eqechisqa kankichis chaypas, Diosniykichis Señor Diosqa maskhamusunkichismi, hinaspan wakmanta kutichimusunkichis.

⁵Ñawpa taytaykichispa hap'ikapusqan suyuman wakmanta kutichimuqtinmi qankunaqa chay suyuta hap'ikapunkichis, Señor Diostaq allinyachisunkichispas mirachisunkichispas ñawpa taytaykichismantapas astawanraq.

⁶Diosniykichis Señor Diosmi qankunamanpas mirayniykichismanpas kasukuq sonqota qosunkichis payta tukuy sonqo tukuy alma munakunaykichispaq, ahinapitaq kawsankichis.

⁷Paymi awqaykichista sarunchaqniykichistapas chay ñakaykunawan muchuchinqa.

⁸Qankunataq Señor Diosta wakmanta kasukunkichis, kunan kamachisqayman hinataq tukuy kamachikuyninkunata hunt'ankichis.

⁹Diosniykichis Señor Diostaq tukuy ruwayniykichispi allinyachisunkichis, hinan askha wawayoq askha uywayoq kapunkichis, askhataq cosechaykichispas kanqa. Señor Diosniykichistaq wakmanta anchata kusikunqa allinyachisqasuykichismanta, imaynan ñawpa taytaykichista allinyachispa kusikurqan hinata.

¹⁰Chaykunaqa kanqa, Señor Diosniykichispa kamachikuy qelqanpi kamachikuyninkunata unanchayninkunatapas kasukuspa hunt'aqtiykichismi, Señor Diosniykichisman tukuy sonqo, tukuy alma kutirikuqtiykichismi.

¹¹Kay kamachikuy simiqa manan sinchi sasachu hunt'anaykichispaq, manataq karupipaschu kashan.

¹²Manan hanaq pachapichu kashan, chaychu niwaqchis: ¿Pitaq hanaq pachata wichapuwasun kamachikuy simita apamuspa willawaqtinchis hunt'ananchispaq? nispa.

¹³Manallataq lamar-qocha chimpapipaschu kashan, chaychu niwaqchis: ¿Pitaq lamar-qochata chimpapuwasun kamachikuy simita apamuspa willawaqtinchis hunt'ananchispaq? nispa.

¹⁴Manan chay hinachu, aswanpas Diospa siminqa sinchi qayllallaykichispin kashan, simiykichispi, sonqoykichispi, chhaynaqa, hunt'ay atinaykichispaqmi kashan.

¹⁵Kunanmi ñoqa qankunaman willaykichis kawsaymanta wañuymantawan, hinallataq allin kaymanta mana allin kaymantapas. Chhaynaqa, kunan qankuna akllakuychis.

¹⁶Kunan kamachisqaytachus kasukunkichis, Diosniykichis Señor Diostapas munakunkichis, paypa munaynintataq ruwankichis, kamachikuyninkunata unanchayninkunata chaninchayninkunatapas kasukunkichis chayqa, kawsankichismi, askha wawayoqtaq kankichis, Señor Diosniykichistaq saminchasunkichis hap'ikapunkichis chay suyupi.

¹⁷Qankunataqchus mana uyariyta munaspa mana kasukunkichischu, aswanpas wak dioskunata servispa yupaychankichis chayqa,

¹⁸cheqaqtapunin niykichis wañunaykichista, manataq Jordán mayuta chimpaspa hap'ikapunkichis chay hallp'apipas unaytachu kawsankichis.

¹⁹Kunanmi hanaq pachatapas kay pachatapas chay nisqaykunamanta testigo kananpaq waqyani. Willaykichismi wañuymantapas kawsaymantapas, hinallataq saminchaymantapas ñakaymantapas. Akllakuychis kawsayta, qankunapas mirayniykichispas kawsanaykichispaq.

²⁰Diosniykichis Señor Diosta munakuychis, payta kasuychis, hunt'aq kaychis, chay hinapin qankunapas mirayniykichispas unayta kawsankichis, Señor Diosniykichispa ñawpa taytaykichis Abrahamman, Isaacman, Jacobman qonanpaq prometesqan suyupi, nispa.