Read Diospa Simin Qelqa DEUTERONOMIO 9 Bible Online

DEUTERONOMIO 9 - Diospa Simin Qelqa bible

DEUTERONOMIO 9

¹¡Israel runakuna, uyariychis! Jordán mayuta chimpanaykichis patapin kashankichis, qankunamanta aswan askha aswan atiyniyoq suyukunatan atipankichis, hinallataq sinchi alto perqawan muyuchisqa hatun llaqtakunatapas hap'ikapunkichis.

²Chaypi tiyaq runakunaqa Anac runakunan, paykunaqa hatuchachaqmi sinchi kallpayoqmi kanku, qankunaqa yachankichisñan kay rimayta: ¿Anac runakunawanri pitaq tupayta atinman? nispa, nisqata.

³Chay hinaqa, yachaychis Diosniykichis Señor Diospa ñawpaqeykichista rishasqanta, payqa ruphakuq nina hinan, ñawpaqeykichispitaq chay suyukunata atipaspa wañuchinqa. Chaymi qankunaqa usqhaylla paykunata wikch'unkichis wañuchinkichis Señor Diospa prometesqanman hina.

⁴Qayllaykichismanta Diosniykichis Señor Dios paykunata wikch'uqtinqa, ama yuyaykuychischu: Señor Diosqa chanin kasqanchisraykun kay hallp'ata qowanchis hap'ikapunanchispaq, nispaqa. Señor Diosqa chay suyu runakunataqa mana chanin kaqtinkun wikch'urqan.

⁵Chay hallp'ataqa hap'ikapunkichis manan chanin kasqaykichisraykuchu, manallataq allin kasqaykichisraykupaschu, aswanpas Diosniykichis Señor Diosqa chay runakunata wikch'urqan huchallikusqankumantan, ñawpa taytaykichis Abrahamman, Isaacman, Jacobman prometesqanta hunt'ananpaqmi.

⁶Allinta yachaychis, manan chanin kasqaykichisraykuchu Diosniykichis Señor Diosqa chay allin hallp'ata qosunkichis, qankunaqa mana kasukuq k'ullu runapunin kankichis.

⁷Amapuni qonqaychischu ch'inneqpi Diosniykichis Señor Diosta phiñachisqaykichistaqa. Egipto suyumanta lloqsimusqaykichis p'unchaymantapachan kayman chayamunaykichiskama sinchi mana kasukuq kankichis.

⁸Horeb orqollapiraqmi Señor Diosta phiñachirqankichis, chaymi payqa phiñakuspa wañuchiyta munarqasunkichis.

⁹Qankunawan Señor Diospa rimanakuynin p'alta rumi chaskiq orqoman wicharqani, hinaspan tawa chunka p'unchay tawa chunka tuta orqopi mana mikhusqa mana ukyasqa karqani.

¹⁰Hinan Señor Diosqa pay kikinpa qelqasqan iskay p'alta rumita qowarqan, chaypin qelqasqa karqan huñukuy p'unchay nina ukhumanta rimaykusqasuykichis llapan simikuna.

¹¹Tawa chunka p'unchay tawa chunka tuta tukukuytataq Señor Diosqa qowarqan rimanakuynin iskaynin p'alta rumita, hinaspan niwarqan:

¹²Phaway, usqhaylla uraykuy, Egiptomanta horqomusqayki runakunan waqllipunku, kamachisqay simikunatapas manaraq imapi qonqarqonku, hinaspan unuyachispa huk rikch'ayta ruwakunku, nispa.

¹³Nillawarqantaq Señor Diosqa: Yachanin kay runakuna sinchi mana kasukuq k'ullu kasqankuta.

¹⁴Ama hark'awaychu, wañuchisaqmi paykunata, ahinapi manaña pipas paykunaq sutinta yuyarinqañachu. Aswanpas qanmantan paqarichisaq paykunamanta aswan askha aswan atiyniyoq llaqtata, nispa.

¹⁵Hinan nina rawrashaq orqomanta uraykamurqani, rimanakuy p'alta rumikuna apaykusqa.

¹⁶Qhawarispataq, Diosniykichis Señor Dios contra huchallikusqaykichista rikurqani. Qankunaqa unuyachispan torillo rikch'ayta ruwakusqankichis, manaraq imapin Señor Diospa yachachisqasuykichismanta waqllipurqankichis.

¹⁷Chaymi apamusqay iskaynin p'alta rumikunata pampaman ch'aqespa qayllaykichispi ñut'uta p'akirqani.

¹⁸Chaymantataq Señor Diospa ñawpaqenpi pampaman uyanpamanta wikch'uykukurqani, hinaspa tawa chunka p'unchay tawa chunka tuta mana mikhusqa mana ukyasqa ñawpaq kuti hina karqani. Chaytan ruwarqani qankunaq huchaykichis hawa, Señor Diosta chaywan phiñachisqaykichis hawa.

¹⁹Qankuna contra Señor Diosqa sinchi k'arakta phiñakuspa wañuchiyta munasuqtiykichismi mancharikurqani, ichaqa mañakusqaytan huktawan uyariykuwarqan.

²⁰Hinallataq Señor Diosqa Aarón contra sinchita phiñakuspa wañuchiyta munarqan, chaymi paypaqpas mañapullarqanitaq.

²¹Chay millay torillo ruwakusqaykichistataq hap'ispa ninaman wikch'uykurqani, hinaspan ñut'uta kutaspa orqomanta uraykamuq mayuman hich'aykurqani.

²²Phiñachillarqankichistaqmi Señor Diosta Taberapi, Masahpi, Quibrot-hataavapi ima.

²³Kaqllataq Cades-barneapi Señor Diosqa: Riychis, hinaspa qosqay hallp'ata hap'ikapuychis, nispa nisuqtiykichispas, qankunaqa pay contra sayarispaykichismi kamachisqanta pisicharqankichis, manataq payman hap'ipakurqankichischu, manallataq kasurqankichispaschu.

²⁴Qankunaqa reqsisqay p'unchaymantapachan sinchi rumi sonqopuni Señor Diospaq kankichis.

²⁵Qankunata wañuchinanpaq Señor Dios yuyaykuqtinmi tawa chunka p'unchay tawa chunka tuta Señor Diospa ñawpaqenpi pampapi uyanpamanta wikch'uykukuspay kasharqani.

²⁶Mañakurqanitaq: ¡Ay! Señor Diosníy, amapuni qan kikiykiq llaqtaykitaqa wañuchiychu, qanqa hatun atiyniykiwanmi qespichimurqanki, kallpaykiwanmi Egipto suyumanta horqomurqanki.

²⁷Yuyarikuy Abraham, Isaac, Jacob kamachiykikunata. Kay llaqtaykiq mana kasukuyninta amaraq qhawariychu, amallataq mana chanin huchankunatapas.

²⁸Paqtan Egipto suyupi ninkuman: Señor Diosqa manan atinchu prometesqan hallp'aman pusaykuyta. Paykunataqa cheqnikurqanmi, chaymi kaymanta horqorqan ch'inneqpi wañuchinanpaq, nispa.

²⁹Cheqaqtapunin paykunaqa akllakusqayki llaqtayki, qanmi Egipto suyumanta hatun atiyniykiwan horqomurqanki, nispa.