Read Diospa Simin Qelqa JUAN 10 Bible Online

JUAN 10 - Diospa Simin Qelqa bible

JUAN 10

¹Jesusmi nirqan: — Cheqaqtapunin niykichis: Pipas oveja kanchaman mana punkunta haykuspa wakninta haykuqqa suwan, llat'anaqtaqmi.

²Pipas punkunta haykuqmi ichaqa oveja michiq.

³Pay haykunanpaqqa punku qhawaqmi punkuta kicharin, ovejakunapas kunkantaqa uyarinmi. Michiqtaq ovejankunata sutinmantakama waqyaspa hawaman pusamun.

⁴Llapan ovejankunata hawaman pusamuspataq ñawpaqenkuta rin, ovejakunataq qhepanta rinku kunkanta reqsisqankurayku.

⁵Mana reqsisqaq qhepantan ichaqa mana rinqakuchu, aswanmi paymanta ayqekunqaku, wak runakunaq kunkanta mana reqsisqankurayku, nispa.

⁶Chay rikch'anachiy simitan Jesusqa paykunaman nirqan, paykunataq ichaqa imatachus nisqanta mana entienderqankuchu.

⁷Jesusqa nillarqantaqmi: — Cheqaqtapunin niykichis: Ñoqan ovejakunapaq punku kani.

⁸Manaraq ñoqa hamushaqtiy lliw hamuqkunaqa suwakunan llat'anaqkunan karqan, ovejakunan ichaqa mana paykunata kasurqankuchu.

⁹Ñoqan punku kani, pipas ñoqanta haykuqqa qespichisqan kanqa, hinaspan haykunqa lloqsinqa, q'achutapas tarinqa.

¹⁰Suwaqa hamun suwakunallanpaq, wañuchinallanpaq, tukunallanpaqwan, ñoqan ichaqa hamuni kawsanankupaq, t'ikarishaq kawsayniyoq kanankupaqwan.

¹¹Ñoqan allin michiqqa kani. Allin michiqqa ovejankunaraykun wañuytapas mana manchanchu.

¹²Pagoraykulla michipakuqmi ichaqa ovejakunaq mana dueñon kaspa, loboq hamushasqanta rikuspa ovejakunata saqerparispa ayqerikapun, lobotaq ovejakunata hap'irqarispa ch'eqechin.

¹³Ahinaqa, pagoraykulla michipakuqqa ayqenmi, pagasqa kasqanrayku, manataq ovejakunamantaqa imapas qokunchu.

¹⁴Ñoqan allin michiqqa kani. Imaynan Yayaqa reqsiwan, ñoqapas Yayata reqsillanitaq, ahinatan ovejaykunata reqsini, ovejaykunapas reqsiwankutaq. Ovejaykunaraykun wañuytapas mana manchanichu.

¹⁶Wak ovejaykunapas kallantaqmi, mana kay t'aqamanta kaqkuna, paykunatapas pusamunaymi, hinan kunkayta uyarinqaku, ch'ulla t'aqallataq kanqa, huk michiqnillayoq.

¹⁷Ñoqaqa wañuspa kawsarimpunaypaq liston kashani, chaymi Yayaqa munakuwan.

¹⁸Manan pipas kawsayniytaqa qechuwanqachu, aswanpas ñoqa kikiymi qoni. Atiyniyoqmi kani wañunaypaq, atiynillayoqtami kani kawsarimpunaypaqpas. Chay kamachikuytaqa Yayaymantan chaskirqani, nispa.

¹⁹Hinan judío runakunaqa chay simikunata uyarispanku wakmanta yuyayninkuta mana tupachirqankuchu.

²⁰Askha runakunan nirqanku: — Supaypa hunt'aykusqanmi, waq'an, ¿imapaqmi uyarinkichis? nispanku.

²¹Wakintaq nirqanku: — Kay simikunaqa manan supaypa hunt'aykusqan runaqchu, ¿atinmanchu supayqa ñawsakunaq ñawin kichariyta? nispa.

²²Paray tiempopin Jerusalén llaqtapi Dios yupaychana wasi Ch'uyanchay Fiesta karqan.

²³Jesustaq Dios yupaychana wasipi purisharqan, Salomón nisqa portalninta.

²⁴Chaymi runakunaqa Jesusta muyuykuspa nirqanku: — ¿Hayk'aqkaman iskayrayachiwankiku? Cristopuni kaspaykiqa sut'inta willawayku, nispa.

²⁵Hinan Jesusqa paykunata nirqan: — Nirqaykichisñan, manataq creewarqankichischu. Yayaypa atiy qowasqanwanmi imaymanata ruwani, chaykunan ñoqamanta willakun.

²⁶Qankunan ichaqa mana iñinkichischu, mana ovejaykuna kasqaykichisrayku.

²⁷Ovejaykunaqa kunkaytan uyarinku, ñoqapas paykunataqa reqsinin, qhepaytataq purinkupas.

²⁸Ñoqan wiñay kawsayta paykunaman qoni, manapunin hayk'aqpas chinkanqakuchu, manataqmi pipas paykunataqa makiymanta qechuwanqachu.

²⁹Paykunata qowaqniy Yayayqa llapamanta atiyniyoqmi, Yayaypa makinmantaqa manataqmi pipas paykunata qechuyta atinmanchu.

³⁰Ñoqawan Yayawanqa hukllan kayku, nispa.

³¹Chaymi judío runakunaqa wakmanta rumita hoqarirqanku payta ch'aqenankupaq.

³²Hinan Jesusqa paykunata nirqan: — Yayaypa atiy qowasqanwanmi askha allin ruwaykunata rikushasqaykichis ruwarqani, ¿mayqenkaqmantataq ch'aqewankichis? nispa.

³³Judío runakunataq payta nirqanku: — Manan allin ruwasqaykimantachu ch'aqesqaykiku, aswanpas Dios contra rimaspa pisichasqaykimantan, runalla kashaspa Dioswan kuskachakusqaykimantawanmi, nispa.

³⁴Jesustaq paykunata nirqan, kamachikuy simi qelqaykichispin nin: “Ñoqan nini qankunaqa dioskuna kasqaykichista”, nispa.

³⁵Diospa Simin Qelqaqa manan yanqayachisqa kanmanchu. Diospa Siminta uyariq runakunatan Diosqa “dioskuna” nispa suticharqan.

³⁶Ñoqatan Yayaqa sapaqchawaspa kay pachaman kachamuwarqan, chaymi ñoqaqa: Diospa Churinmi kani, nini. Chay hinaqa, ¿imanaqtintaq niwankichis: Dios contra rimaspan pisichanki, nispa?

³⁷Yayaypa ruwasqankunata mana ruwaqtiyqa, ama iñiwaychischu.

³⁸Ichaqa chaykunatachus ruwani chayqa, ruwasqaykunapiyá iñiychis manaña ñoqapi iñispapas, ahinapin Yayawan ñoqawanqa huklla kasqaykuta entiendenkichis, nispa.

³⁹Hinaqtinmi runakunaqa huktawan hap'irqoytapuni munarqanku, Jesustaq ichaqa qayllankumanta chinkarqapurqan.

⁴⁰Jesusqa Jordán mayuta chimpaspa kutillarqantaqmi ñawpaqta Juanpa bautizashasqan cheqasman, hinaspan chaypi qhepakurqan.

⁴¹Askha runakunan Jesusman rirqanku, hinaspan nirqanku: — Juanqa manan ima milagrotapas ruwarqanchu, ichaqa Jesusmanta Juanpa tukuy ima nisqanmi cheqaqpuni karqan, nispa.

⁴²Chaypin askha runakuna Jesuspi iñirqanku.