Read Diospa Simin Qelqa JUAN 13 Bible Online

JUAN 13 - Diospa Simin Qelqa bible

JUAN 13

¹Pascua Fiesta ñawpaqtaraqmi Jesusqa kay pachamanta Yayanman kutipunanpaq hora chayamusqanta yacharqan. Kay pachapi paypa kaqkunata imaynatachus munakurqan, chay hinallatapunin paykunataqa tukukuykamapas munakurqan.

²Jesusqa yachachisqankunawan manaraq cenashaqtinkun, saqraqa Simonpa churin Judas Iscarioteta sonqonpi yuyaykachirqanña Jesusta hap'ichinanpaq.

³Jesusqa yacharqanmi lliw atiyta Yayaq payman qosqanta, Diosmanta hamusqantapas, Diosman kutipunantapas.

⁴Cenasqanmanta hatarispanmi pata p'achanta ch'utikuspa toallawan cinturanta wataykukurqan.

⁵Hinaspan puruñaman unuta hich'aykuspa yachachisqakunaq chakin maylliyta qallarirqan, watakusqan toallawantaq ch'akichirqan.

⁶Simón Pedroman qayllaykuqtintaq Pedroqa nirqan: — Señorníy, ¿imaynataq qanri chakiykunata maylliwankiman? nispa.

⁷Jesustaq nirqan: — Kunanqa manan entiendenkichu kay ruwasqayta, qhepamanñan entiendenki, nispa.

⁸Chaymi Pedroqa nirqan: — Manapunin chakiykunataqa maylliwankimanchu, nispa. Jesustaq payta nirqan: — Mana maylliqtiyqa manan ñoqawanñachu kawaq, nispa.

⁹Hinan Simón Pedroqa nirqan: — Señorníy, ama chakiykunallatachu maylliway, aswanpas makiykunatawan umaytawan, nispa.

¹⁰Jesustaq payta nirqan: — Bañasqa kaqqa limpioñan, chakinkunallatañan mayllikunan. Qankunaqa limpioñan kashankichis, ichaqa manan llapaykichischu, nispa.

¹¹(Jesusqa yacharqanmi pichus payta hap'ichinanta, chaymi nirqan: — Manan llapaykichischu limpioqa kashankichis, nispa).

¹²Chakinkuta maylliyta tukuspataq pata p'achanwan churaykukuspa wakmanta tiyaykurqan, hinaspan paykunata nirqan: — ¿Entiendenkichischu imatachus ruwarqaykichis chayta?

¹³Qankunan niwankichis: Yachachikuq, Señor, nispa. Chaytaqa allintan ninkichis, chaypunin kani.

¹⁴Ñoqa Señorpas, Yachachikuqpas kashaspa, chakiykichista maylliykichis chayqa, qankunapas chakiykichista mayllinakunaykichismi.

¹⁵Yachaqakunaykichispaqmi rikuchiykichis, imaynan ñoqa ruwani ahinata qankunapas ruwanaykichispaq.

¹⁶Cheqaqtapunin niykichis, kamachiqa manan patronninmanta aswan kurakchu, manallataq kachasqapas kachaqninmanta aswan kurakchu.

¹⁷Kaykunata entiendespachus ruwankichis chayqa, kusisamiyoqmi kankichis.

¹⁸Manan llapaykichismantachu rimani, ñoqan yachani pikunatachus akllasqayta, ichaqa kayta nini “T'anta mikhuqmasiymi ñoqa contra sayarirqan” niq Qelqa hunt'akunanpaqmi.

¹⁹Kunanmantapachan kayta nishaykichis, manaraq chaykuna sucedeshaqtin, chaykuna sucedeqtinñataqmi pichus Ñoqa kasqayta creenkichis.

²⁰Cheqaqtapunin niykichis, pipas ñoqaq kachasqayta chaskiqqa, ñoqatan chaskiwan, ñoqata chaskiwaqtaq kachamuwaqniyta chaskin, nispa.

²¹Jesusqa chayta nispanmi sonqonpi llakikurqan, hinaspan sut'inta nirqan: — Cheqaqtapunin niykichis, hukniykichismi hap'ichiwanqa, nispa.

²²Chaymi yachachisqakunaqa qhawanakurqanku pimantachus nisqanta mana yachaspa.

²³Jesuspa munakusqan huknin yachachisqantaq Jesusman k'iraykurisqa kasharqan.

²⁴Paytan Simón Pedroqa ch'illmirirqan, pimantachus Jesusqa nishan chayta tapunanpaq.

²⁵Chaymi payqa Jesusman k'iraykurisqa kaspa tapuykurqan: — Señorníy, ¿pitaq chayri? nispa.

²⁶Hinan Jesusqa nirqan: — Chay runaqa pimanchus t'antata challpuykuspa qosaq chaymi, nispa. T'antata challpuykuspataq Simonpa churin Judas Iscarioteman qorqan.

²⁷Chaymi t'antata mikhuykuqtin hina Satanasqa payman haykurqan, hinan Jesusqa Judasta nirqan: — Imachus ruwanaykitaqa usqhaylla ruway, nispa.

²⁸Ichaqa manan mayqenninkupas entienderqankuchu, imanaqtinchus chayta nisqanta.

²⁹Wakintaq yuyarqanku Judasqa qolqe hap'iq kaqtin Jesuspa: Fiestapaq munasqanchista rantimuy, otaq wakchakunaman qomuy, nispa payta nishasqanta.

³⁰Judasqa t'antata mikhuykuspan lloqsirqanpacha. Tutañataq karqan.

³¹Judas lloqsiqtin hinan Jesusqa nirqan: — Kunanmi Runaq Churinqa hatunchasqa, paywantaq Diospas hatunchasqa kashan.

³²Dioschus Churiwan hatunchasqa kashan chayqa, kikin Diosmi Churita hatunchanqa, kunanmantapachataqmi hatunchanqa.

³³Wawallaykuna, pisillatañan qankunawan kasaq. Maskhawankichismi, ichaqa, imaynan judío runakunatapas nirqani: Ñoqaq risqaymanqa manan hamuyta atiwaqchischu, nispa, ahinatan qankunatapas kunanqa niykichis.

³⁴Mosoq kamachikuytan churapuykichis: Qankunapura munanakuychis. Imaynan ñoqapas munakuykichis, ahinata qankunapas munanakuychis.

³⁵Chhaynapin ñoqaq yachachisqaykuna kasqaykichista llapa yachanqaku qankuna munanakuqtiykichis, nispa.

³⁶Simón Pedron Jesusta nirqan: — Señorníy, ¿maytataq rinkiri? nispa. Jesustaq payta nirqan: — Ñoqaq risqaymanqa manaraqmi kunan hamuyta atiwaqchischu, qhepatañan ichaqa hamuyta atinkichis, nispa.

³⁷Pedrotaq nirqan: — Señorníy, ¿imaraykun kunanqa qhepayki hamuyta mana atiymanchu? Qanraykun wañusaqpas, nispa.

³⁸Chaymi Jesusqa payta nirqan: — ¿Ñoqaraykuchu wañunki? Cheqaqtapunin niyki: Manaraq gallo waqashaqtinmi reqsiwasqaykita kinsa kutita negawanki, nispa.