Read Diospa Simin Qelqa JUAN 5 Bible Online

JUAN 5 - Diospa Simin Qelqa bible

JUAN 5

¹Chaykuna qhepatan judío runakunaq fiestan karqan, chaymi Jesusqa Jerusalén llaqtata kutirqan.

²Jerusalén llaqtapin “Oveja Punku” nisqa qayllapi huk estanque karqan phisqa portalniyoq, hebreo rimaypin Betesda nisqa.

³Chay portalkunapin askha onqosqakuna, ñawsakuna, such'ukuna, cuerpon ch'akisqakunapas sirisharqanku, [unuq aytirikunanta suyakuspanku.

⁴Huk angelmi may kutillanpi estanqueman uraykamuq, hinaspan unuta aytirichiq, unu aytirikuqtin estanqueman pipas ñawpaqta haykuqtaq ima onqoyniyoqña kashaspapas qhaliyaq.][1]

⁵Chaypin kasharqan kinsa chunka pusaqniyoq wataña onqosqa runa.

⁶Jesustaq payta sirishaqta rikuspa, unayña chay hina kasqanta entiendespa payta nirqan: — ¿Munankichu qhaliyayta? nispa.

⁷Onqosqataq kutichirqan: — Señorníy, manan piniypas kanchu unu aytirikuqtin hina estanqueman apaykuwananpaq, kikiy rinaykamaqa hukmi llallirqapuwan, nispa.

⁸Jesustaq payta nirqan: — Sayariy, puñunaykita aparikuspa ripuy, nispa.

⁹Hinan chay runaqa qhaliyarqapurqan, puñunanta aparikuspataq ripurqan. Chay p'unchayqa samana p'unchaymi karqan.

¹⁰Chaymi judío umallikunaqa chay qhaliyachisqa runata nirqanku: — Kunanqa samana p'unchaymi, kamachikuy simiman hinaqa manan puñunaykita apawaqchu, nispa.

¹¹Hinan qhaliyachisqa runaqa nirqan: — Kikin qhaliyachiwaqniymi nimuwan: Puñunaykita aparikuspa ripuy, nispa.

¹²Chaymi paykunaqa tapurqanku: — ¿Pin nimurqasunki: Puñunaykita aparikuspa ripuy, nispa?

¹³Qhaliyachisqa runataq mana yacharqanchu pichus kasqanta, askha runa ukhupi Jesuspa kashasqanrayku.

¹⁴Chaymantañan Jesusqa Dios yupaychana wasipi qhaliyachisqa runata tarispa nirqan: — Qhaliyachisqañan kashanki, ama astawan huchallikuyñachu, mana chayqa aswan mana allinraqmi kasunkiman, nispa.

¹⁵Paytaq rispa judío umallikunaman willamurqan qhaliyachiqninqa Jesús kasqanta.

¹⁶Chay hawan judío umallikunaqa Jesusta qatiykacharqanku, samana p'unchaypi chaykunata ruwaqtin.

¹⁷Jesustaq paykunata nirqan: — Yayayqa llank'ashallanpunin, ñoqapas llank'ashallanitaqmi, nispa.

¹⁸Chayraykun judío umallikunaqa astawan payta wañuchiytapuni munarqanku, manan samana p'unchaymanta kamachikuy simita p'akisqanraykullachu, aswanpas “Diosqa Taytaymi” nispa Dioswan kuskachakusqanmantawanmi.

¹⁹Jesusmi paykunata nirqan: — Cheqaqtapunin niykichis, Churiqa manan kikinmanta imatapas ruwayta atinmanchu, aswanmi Yayaq ruwasqan rikusqallanta, Yayaq lliw ruwasqallantan Churiqa ruwan.

²⁰Yayaqa Churita munakuspanmi lliw imaymana ruwasqanta rikuchin, aswan hatun ruwaykunataraqmi ruwananpaq rikuchinqa, chay hinapi qankuna musphanaykichispaq.

²¹Imaynan Yayaqa wañusqakunata sayarichin, hinaspa kawsayta qon, chay hinallataqmi Churipas pikunamanchus kawsayta qoyta munan chaykunata kawsachin.

²²Yayaqa manan pitapas juzganchu, aswanqa lliwta juzgaqpaqmi Churita churarqan,

²³llapa runa Churita yupaychanankupaq, imaynan Yayata yupaychanku hinata. Pipas Churita mana yupaychaqqa kachamuqnin Yayatapas manan yupaychallantaqchu.

²⁴Cheqaqtapunin niykichis: Pipas simiyta uyarin, hinaspa kachamuwaqniy Yayapi iñin chayqa wiñay kawsayniyoqmi, manan huchachasqañachu kanqa, aswanmi wañuymanta kawsayman pasanña.

²⁵Cheqaqtapunin niykichis: Hamushaq tiempon chayarqamunña, Diospa Churinpa kunkantan wañusqakuna uyarinqaku, kasukuqkunataqmi kawsanqaku.

²⁶Imaynan Yayapas kikinmanta kawsayniyoq, chay hinallataqmi Churimanpas atiyta qorqan kikinmanta kawsayniyoq kananpaq

²⁷Runaq Churin kasqanraykun juzgananpaqpas atiyta qorqan.

²⁸Ama kay nisqaywanqa musphaychischu, aya p'ampanakunapi lliw kaqkunaq Runaq Churinpa kunkanta uyarinanku tiempon chayamunqa.

²⁹Hinan allinkaqta ruwaqkunaqa kawsanankupaq kawsarimpunqaku, mana allinkaqta ruwaqkunan ichaqa Diospa huchachasqan kanankupaq kawsarimpunqaku, nispa.

³⁰Ñoqaqa manan ima ruwaytapas kikillaymantaqa atinichu. Yayaypa niwasqanman hinan juzgani, chaymi jusgasqayqa chaninpuni. Manan munayniytachu ruwayta munani, aswanmi kachamuwaqniy Yayaq munayninta.

³¹Ñoqa kikiymantachus willakuyman chayqa, willakusqayqa manan cheqaqpaq hap'isqachu kanman.

³²Hukmi ñoqamanta willaqqa, yachanitaqmi ñoqamanta willasqanqa cheqaq kasqanta.

³³Qankunan Juanman tapuqta kacharqankichis, paytaq ñoqamanta cheqaqkaqta willakurqan.

³⁴Ñoqaqa manan runaq willakunantaqa necesitanichu, aswanmi Juanmantaqa rimani qankuna qespichisqa kanaykichispaq.

³⁵Juanmi k'anchashaq lámpara hina karqan, qankunataq pisi tiempollata k'anchayninpi kusikuyta munarqankichis.

³⁶Ñoqaq ruwasqaymi ichaqa Juanpa willasqanmantapas aswantaraq ñoqamanta willakun. Yayaq qomuwasqan ruwaykunatan hunt'ashani, chay ruwasqaykunan willakun Yayaq kachamuwasqan kasqayta.

³⁷Kachamuwaqniy kikin Yayallataqmi ñoqamanta willakun. Manan hayk'aqpas kunkanta uyarirqankichischu, manataq rikch'aynintapas rikurqankichischu.

³⁸Paymi ñoqata kachamuwarqan, ichaqa simintan mana hap'inkichischu, ñoqapi mana iñisqaykichisrayku.

³⁹Diospa Simin Qelqakunata allinta t'aqwiychis chaypi wiñay kawsay qankunapaq kasqanta yuyaspaykichis, chay Qelqakunan ñoqamanta willakun.

⁴⁰Chaywanpas manan ñoqaman hamuyta munankichischu wiñay kawsayniyoq kanaykichispaq.

⁴¹Runakunaq hatunchawanantaqa manan munanichu.

⁴²Ichaqa, ñoqan yachani qankunaqa Diosta mana munakuq kasqaykichista.

⁴³Yayaypa sutinpin ñoqa hamuni, manataq chaskiwankichischu, wak runataqchus cuentanman hamunman chayqa, paytaqa chaskiwaqchismi.

⁴⁴Qankunaqa qankunapurallan hatunchanakuyta munankichis, ichaqa manan Diospa hatunchanantaqa munankichischu, chay hinaqa, ¿imaynatataq ñoqapi iñiwaqchis?

⁴⁵Ama yuyaychischu Yayaq qayllanpi ñoqa qankunata huchachanaytaqa, kanmi huchachaqniykichis, chayqa Moisesmi, paypin qankunaqa suyakushankichis.

⁴⁶Moisesta qankuna creewaqchis chayqa, ñoqatapas creewankichismanmi, payqa ñoqamantan qelqarqan.

⁴⁷Moisespa qelqasqankunata mana creeshaspaykichisqa, ¿imaynatan simiykunata creewaqchis? nispa.