Read Diospa Simin Qelqa JUAN 7 Bible Online

JUAN 7 - Diospa Simin Qelqa bible

JUAN 7

¹Chaykuna qhepatan Jesusqa Galileapi purirqan, Judeapiqa manan puriyta munarqanchu, judío umallikuna payta wañuchiytapuni munaqtinku.

²Judío runakunaq Ch'uklla Ruway Fiestanmi qayllaykamusharqanña.

³Jesuspa wawqenkunan payta nirqanku: — Ama kaypi qhepaychu, aswanpas Judeaman ripuy, chaypi yachachisqaykikunapas ruwasqaykikunata rikunankupaq.

⁴Pipas reqsichikuyta munaspaqa, manan imatapas pakapiqa ruwanchu. Milagrokunata ruwashaspaykiqa llapa runaq rikusqanyá ruway, nispa.

⁵Wawqenkunapas manan paypiqa iñirqankuchu.

⁶Jesustaq paykunata nirqan: — Ñoqaq tiempoyqa manaraqmi chayamunchu, qankunapaqmi ichaqa ima tiempopas allillan.

⁷Qankunataqa manan runakunaqa cheqnikusunkichismanchu, ñoqatan ichaqa cheqnikuwanku, ruwasqanku mana allin kasqanta sut'inchashasqayrayku.

⁸Qankuna fiestamanqa wichaychis, ñoqaqa manaraqmi chay fiestamanqa wichasaqchu, tiempoypas manaraqmi hunt'akushanchu, nispa.

⁹Chayta paykunaman nispataq Galileapi qhepakurqan.

¹⁰Wawqenkuna wichaqtinkuñataq ichaqa, Jesuspas fiestamanqa wichallarqantaq, ichaqa manan sut'itachu, aswanpas pakapi hinalla.

¹¹Judío umallikunataq payta maskharqanku: — ¿Maypitaq chay runari? nispa.

¹²Jesusmantan runakunaqa imaymanata rimarqanku. Wakinmi nirqanku: — Allin runan, nispa. Wakintaq nirqanku: — Manan allinchu, aswanpas runakunatan q'otun, nispa.

¹³Ichaqa manan pipas sut'ita paymanta rimaqkuchu judío umallikunata manchakuspanku.

¹⁴Kuskan fiestaña kashaqtintaq Jesusqa Dios yupaychana wasiman wicharqan, hinaspan yachachirqan.

¹⁵Chaymi judío umallikunaqa musphaspa nirqanku: — ¿Maymantan kay runaqa mana yachachisqa kashaspa imaymanata yachan? nispa.

¹⁶Hinan Jesusqa paykunata nirqan: — Yachachikuyniyqa manan ñoqaqchu, aswanpas kachamuwaqniy Diospan.

¹⁷Pipas Diospa munayninta ruwayta munaqqa, yachanqan Diosmantachus yachachikuyniy kashasqanta, icha ñoqa kikillaymantachus rimashasqaytapas.

¹⁸Pay kikinmanta rimaqqa hukkunaq hatunchanallantan maskhan, kachamuqninpa hatunchasqa kananta maskhaqmi ichaqa cheqaq kaqtapuni riman, payqa chanintaqmi kanpas.

¹⁹Moisesqa kamachikuy simitan churapurqasunkichis. Ichaqa manan mayqenniykichispas kamachikuy simitaqa hunt'ankichischu. ¿Imanaqtintaq wañuchiytapuni munashawankichis? nispa.

²⁰Runakunataq nirqanku: — Supaypa hunt'aykusqanmi kanki, ¿pin qanta wañuchiyta munashasunki? nispa.

²¹Jesustaq paykunata nirqan: — Huk milagrotan ruwarqani, chaymi lliwlla musphashankichis.

²²Moisesmi qhari-kay qaracha señalanapaq kamachikuyta saqerqasunkichis, chaymi samana p'unchayña kaqtinpas qhari wawata señalankichis. (Chay ruwayqa manan Moisespachu karqan, aswanpas ñawpa taytakunaqmi karqan).

²³Moisespa kamachikuy simin mana p'akisqa kananpaqmi samana p'unchaypipas qhari wawata señalankichis, ¿chaychu ñoqapaq phiñakunkichis, samana p'unchaypi huk runata qhaliyachisqaymanta?

²⁴Ama imayna rikch'akusqanman hinallaqa juzgaychischu, aswanpas chanin-kayman hinapuni juzgaychis, nispa.

²⁵Jerusalén llaqta wakin runakunataq nirqanku: ¿Manachu kay runaqa wañuchinankupaq maskhasqanku?

²⁶Qhawariychis, lliwpa rikusqanmi rimashan, manataq payta imaninkupaschu. ¿Cheqaqtachu icha kamachikuqkunaqa yachanku paypuni Cristoqa kasqanta?

²⁷Chaywanpas reqsinchismi kay runaqa maymantachus kasqanta, Cristo hamuqtinmi ichaqa mana pipas yachanqachu maymantachus kasqanta, nispa.

²⁸Hinan Jesusqa Dios yupaychana wasipi yachachishaspa kunkayoqta nirqan: — ¿Ñoqataqa reqsiwankichispunichu? ¿Yachankichischu maymantachus kasqaytapas? Manan kikiymantachu hamuni, aswanpas kachamuwaqniyqa cheqaqmi, paytan qankunaqa mana reqsinkichischu.

²⁹Ñoqaqa payta reqsinin paymanta hamusqayrayku, paytaqmi kachamuwanpas, nispa.

³⁰Chaymi Jesusta hap'iytapuni munarqanku, ichaqa manan pipas payta hap'irqanchu, manaraq hap'inanku hora chayamushasqanrayku.

³¹Chaywanpas askha runakunan paypi iñirqanku, hinaspan nirqanku: — Cristo hamuspaqa, ¿aswantaraqchu milagrokunata ruwanman kay runaq ruwasqanmantaqa? nispa.

³²Fariseokunan uyarirqanku Jesusmanta runakunaq chhiwchinakusqankuta, hinaspa sacerdote umallikuna fariseokunapiwan Dios yupaychana wasi guardiakunata kacharqanku Jesusta hap'imunankupaq.

³³Hinan Jesusqa nirqan: — Pisi tiempollatawanñan qankunawan kasaq, chaymantaqa kachamuwaqniymanmi kutipusaq.

³⁴Maskhawankichismi, manataq tariwankichischu, maypichus ñoqa kasaq chaymanqa manan chayayta atiwaqchischu, nispa.

³⁵Chaymi judío umallikunaqa ninakurqanku: — ¿Maytataq kayri ripunqa mana tarimunanchispaq? ¿Wak llaqtakunapi ch'eqesqa judío runakunaqtachu ripunqa? Icha, ¿mana judío runakunata yachachiqchu rinqa?

³⁶¿Ima ninantataq kay runaqa nin: Maskhawankichismi manataq tariwankichischu, maypichus ñoqa kasaq chaymanqa manan chayayta atiwaqchischu, nispa? nispanku.

³⁷Fiesta tukukuy hatun p'unchaypin Jesusqa sayaykuspa kunkayoqta nirqan: — ¡Pipas ch'akichikuqqa ñoqaman hamuchun hinaspa ukyachun!

³⁸Pipas ñoqapi iñinqa chayqa kawsay unu mayukunan sonqonmanta puririnqa, Diospa Simin Qelqaq nisqanman hina, nispa.

³⁹Jesusqa chayta nirqan paypi iñiqkuna Santo Espirituta chaskinankumantan, Santo Espirituqa iñiqkunaman manaraqmi hamurqanchu, Jesuspa hanaq pachaman manaraq kutipusqanrayku.

⁴⁰Chayta uyarispan wakin runakunaqa nirqanku: — Cheqaqtapunin kay runaqa suyakusqanchis profeta, nispa.

⁴¹Hukkunataq: — Payqa Cristopunin, nirqanku. Wakinñataq ichaqa nirqanku: — ¿Galileamantachu Cristoqa kanman?

⁴²Diospa Simin Qelqan nin: “Davidpa mirayninmanta, Davidpa kasqan Belén llaqtamantapunin Cristoqa hamunqa”, nispa. ¿Manachu chayqa cheqaqpuni? nispa.

⁴³Chaymi runakunaqa pay hawa mana yuyayninkuta tupachirqankuchu.

⁴⁴Hinan wakinninku Jesusta hap'iyta munarqanku, ichaqa manan mayqenpas payta hap'irqanchu.

⁴⁵Dios yupaychana wasi guardiakunan kutirqanku sacerdote umallikunaq fariseokunaq kasqanman, hinan paykunaqa tapurqanku: — ¿Imaraykun chay runata mana apamunkichischu? nispa.

⁴⁶Dios yupaychana wasi guardiakunataq nirqanku: — ¡Manan hayk'aqpas chay runa hinaqa pipas rimarqanchu! nispa.

⁴⁷Chaymi fariseokunaqa paykunata nirqanku: — ¿Qankunapas q'oturqachikullankichistaqchu?

⁴⁸Mayqellanpas kamachikuqkunamanta fariseokunamantapas, ¿Jesuspi iñirqankuchu?

⁴⁹¡Manan! Chay runakunaqa kamachikuy simitan mana yachankuchu, chaymi paykunaqa ñakasqa kanku, nispa.

⁵⁰Fariseokunamanta kaq Nicodemon chaypi kasharqan, paymi Jesusman tutalla risqa. Chay Nicodemon paykunata nirqan:

⁵¹— Kamachikuy siminchisman hinaqa, manan mayqen runatapas huchachayta atisunmanchu manaraq payta uyarishaspaqa, ima ruwasqantapas manaraq allinta yachashaspaqa, nispa.

⁵²Hinan paykunaqa nirqanku: — ¿Qanpas Galileamantachu kanki? T'aqwiy Diospa Simin Qelqata, chaypin yachanki mana hayk'aqpas Galileamantaqa profeta sayarimusqanta, nispa. [

⁵³Sapankataq wasinkuta ripurqanku.