Read Diospa Simin Qelqa JUAN 8 Bible Online

JUAN 8 - Diospa Simin Qelqa bible

JUAN 8

²Hinaspan pacha illarimuyta Dios yupaychana wasiman kutimurqan, hinan llapa runakuna Jesusman qayllaykurqanku, tiyaykuspataq paykunata yachachirqan.

³Kamachikuy simita yachachiqkunan fariseokunapiwan wasanchay huchapi hap'isqa warmita Jesusman apamurqanku, hinaspan chawpipi sayaykachispa

⁴payta nirqanku: — Yachachikuq, kay warmitan wasanchay hucha ruwashaqta hap'irqamuyku.

⁵Moisesmi kamachikuy simipi kamachiwarqanku, chay hina warmikunataqa rumiwan ch'aqespa wañuchinaykupaq, qanri, ¿ima ninkitaq? nispa.

⁶Chaytaqa nirqanku Jesusta wateqaspa huchachanankupaqmi. Jesustaq ichaqa pampaman k'umuykuspa hallp'a pampapi dedonwan qelqasharqan.

⁷Anchatapuni tapupayaqtinkutaq sayarispa paykunata nirqan: — Mayqenniykichispas mana huchayoq kashaq ñawpaqta rumiwan kay warmita ch'aqeychis, nispa.

⁸Hinaspan yapamanta pampaman k'umuykuspa, hallp'api qelqasharqan.

⁹Paykunataq chayta uyarispa, concienciankuq huchachasqan ch'ulla-ch'ullamanta lloqsipurqanku, kurak runakunamantapacha qallarispa, Jesustaq sapallan qheparqan, warmipas kaq sayashasqanpi.

¹⁰Hinan Jesusqa sayarispa mana pitapas rikurqanchu, aswanpas warmillata, chaymi nirqan: — Warmi, ¿maytaq chay huchachaqniykikunari? ¿Manachu pipas huchachasunki? nispa.

¹¹Warmitaq nirqan: — Señorníy, manan pipas huchachawanchu, nispa. Hinan Jesusqa payta nirqan: — Manan ñoqapas huchachaykichu, ripuy, amañataq astawan huchallikuychu, nispa.][3]

¹²Jesusmi paykunata nillarqantaq: — Ñoqan lliw runakunapaq k'anchay kani, pipas qhepayta hamuqqa manan laqhayaqpichu purinqa, aswanmi kawsay k'anchayniyoq kanqa, nispa.

¹³Hinaqtinmi fariseokunaqa payta nirqanku: — Qanqa kikiykimantan willakunki, willakusqaykiqa manan cheqaqchu, nispa.

¹⁴Chaymi Jesusqa paykunata nirqan: — Ñoqa kikiymantaña willakuni chaypas, willakusqayqa cheqaqmi, yachanin maymantachus hamusqayta, maymanchus risqaytapas, qankunan ichaqa mana yachankichischu maymantachus hamusqayta, maymanchus rishasqaytapas.

¹⁵Qankunaqa runakuna hinallan juzgankichis, ñoqaqa manan pitapas juzganichu.

¹⁶Juzganiña chaypas, chaninchasqayqa cheqaqmi, manan sapallaychu kashani, aswanpas kachamuwaqniy Yayaypiwanmi.

¹⁷Kamachikuy simi qelqaykichisman hinaqa iskay testigoq willakusqan tupaqtinqa cheqaqmi.

¹⁸Ñoqan kani kikiymanta willakuqqa, kachamuwaqniy Yayapas ñoqamantataqmi willakun, nispa.

¹⁹Chaymi payta nirqanku: — ¿Maypitaq Yayaykiqa kashan? nispa. Jesustaq kutichirqan: — Manataq ñoqatapas reqsiwankichischu chayqa, manallataqmi Yayaytapas reqsinkichischu, ñoqata reqsiwankichisman chayqa, Yayaytapas reqsiwaqchismi, nispa.

²⁰Chay simikunatan Jesusqa Dios yupaychana wasipi yachachishaspa alcanciaq qayllanpi rimarqan, manataq pipas payta hap'irqanchu, tiempon manaraq chayamusqanrayku.

²¹Jesusmi paykunata nillarqantaq: — Ñoqaqa ripusaqmi, qankunataq maskhawankichis, ñoqaq risqaymanqa manan riyta atiwaqchischu, huchaykichispin wañunkichis, nispa.

²²Hinan judío umallikunaqa nirqanku: — Pay kikinpaschá wañuchikunqa chaychá niwanchis, “ñoqaq risqaymanqa manan riyta atiwaqchischu”, nispa.

²³Chaymi Jesusqa paykunata nirqan: — Qankunaqa kaymantan kankichis, ñoqataq hanaq pachamanta kani. Qankunaqa kay pachamantan kankichis, ñoqaqa manan kay pachamantachu kani.

²⁴Chaymi nirqaykichis: Huchaykichispin wañunkichis, nispa. Pipas Ñoqa kasqayta mana iñinkichischu chayqa, huchaykichispin wañunkichis, nispa.

²⁵Hinan paykunaqa tapurqanku: — ¿Pitaq qanri kanki? nispanku. Chaymi Jesusqa nirqan: — Pichus kasqaytaqa qallariymantapachañan nishaykichis.

²⁶Askhan qankunamanta rimanay kashan huchachanaypaq. Ichaqa kachamuwaqniymi cheqaqta riman, ñoqataq paypa niwasqallanta runakunaman willani, nispa.

²⁷Paykunaqa manan entienderqankuchu Yayamanta rimashasqanta.

²⁸Hinaqtinmi Jesusqa paykunata nirqan: — Runaq Churinta chakataspaykichisñan entiendenkichis pichus Ñoqa kasqaytaqa. Tukuy imatapas manan ñoqa kikillaymantachu ruwani, aswanpas Yayaq yachachiwasqallantan willaykichis.

²⁹Kachamuwaqniy Yayaqa ñoqawanmi kashan, manan sapallaytachu saqewan, ñoqaqa paypa sonqonman chayaqtapunin ruwani, nispa.

³⁰Chaykunata Jesús rimaqtinmi askha runa paypi iñirqanku.

³¹Jesusqa nillarqantaqmi paypi iñiq judío runakunata: — Qankunachus rimasqayta hunt'ankichis chayqa, cheqaqtapunin yachachisqaykuna kankichis.

³²Cheqaqkaqtan reqsinkichis, chay cheqaqkaqtaqmi kacharichisunkichispas, nispa.

³³Chaymi paykunaqa nirqanku: — Abrahampa mirayninmi kayku, manan hayk'aqpas piqpa kamachinpas karqaykuchu. ¿Imaynataq qanri ninki: Kacharichisqan kankichis, nispayki? nispa.

³⁴Jesustaq paykunata nirqan: — Cheqaqtapunin niykichis, pipas huchallikuqqa huchaq kamachinmi.

³⁵Kamachiqa manataqmi familiawan wiñaypaqchu tiyan, churin ichaqa familianwan wiñaypaq tiyan.

³⁶Ahinaqa Churichus kacharichisunkichis chayqa, cheqaqtapunin kacharichisqa kankichis.

³⁷Ñoqaqa yachanin Abrahampa miraynin kasqaykichista, ichaqa wañuchiytapunin munashawankichis, simiyta sonqoykichispi mana hap'isqaykichisrayku.

³⁸Ñoqaqa rimani Yayaq qayllanpi rikusqaytan, qankunataq ruwankichis taytaykichismanta uyarisqallaykichista, nispa.

³⁹Hinan Jesusta nirqanku: — Ñoqaykuq taytaykuqa Abrahammi, nispa. Jesustaq paykunata nirqan: — Abrahampa wawankuna kaspaykichisqa, Abrahampa ruwasqantachá ruwawaqchis.

⁴⁰Manachá Diosmanta uyarisqay cheqaqkaqta qankunaman willashaqtiyqa wañuchiytapunichu munawankichisman. Abrahamqa manan chay hinataqa ruwarqanchu.

⁴¹Qankunaqa taytaykichispa ruwasqankunatan ruwankichis, nispa. Chaymi payta nirqanku: — Ñoqaykuqa manan qhelli huchapi puriymanta paqariqchu kayku, taytaykuqa sapan Diosllan, nispa.

⁴²Jesustaq paykunata nirqan: — Dioschus taytaykichis kanman chayqa, munakuwankichismanchá. Ñoqaqa Diosmanta hamuspan kaypi kashani, manataqmi ñoqallamantachu hamuni, aswanpas paymi kachamuwarqan.

⁴³¿Imaraykun rimasqayta mana reparankichischu? Simiytan mana uyariyta munankichischu, chaymi mana reparankichischu.

⁴⁴Qankunaqa saqraq wawankunan kankichis, chaymi taytaykichispa munayninta ruwayta munankichis. Payqa qallariymantapachan runa wañuchiq karqan, manataqmi cheqaq-kayqa sonqonpi kanchu, cheqaq-kay paypi mana kasqanrayku. Llullakuspaqa, pay kikinmantan riman llulla kasqanrayku, llullakunaq taytantaq kanpas.

⁴⁵Ñoqatataq cheqaqkaqta rimaqtiy mana creewankichischu.

⁴⁶¿Mayqenniykichistaq huchayoq kasqayta sut'inchawankichisman? Cheqaqkaqta nishaqtiyqa, ¿imaraykun mana creewankichischu?

⁴⁷Diospa wawanqa Diospa siminkunatan uyarin. Chaymi qankunaqa mana chaykunata uyarinkichischu, mana Diospa wawanchu kasqaykichisrayku, nispa.

⁴⁸Hinaqtinmi judío runakunaqa Jesusta nirqanku: — Allintan ñoqaykuqa niykiku Samaria runa kasqaykita, supaypa hunt'aykusqan kasqaykitawan, nispa.

⁴⁹Jesustaq kutichirqan: — Manan supaypa hunt'aykusqanchu kashani, aswanpas Yayatan hatunchani, qankunataq ichaqa pisichawankichis.

⁵⁰Manan yupaychawanaykichistachu munashani, Diosmi yupaychasqa kanaytaqa munan, paymi juzgaqpas.

⁵¹Cheqaqtapunin niykichis: Pipas simiyta hunt'an chayqa, manapunin hayk'aqpas wañunqachu, nispa.

⁵²Chaymi judío runakunaqa Jesusta nirqanku: — Kunanqa yachaykun supaypa hunt'aykusqanpuni kasqaykita. Abrahampas profetakunapas wañupurqankun, qantaq ninki: Pipas simiyta hunt'aqqa manapunin hayk'aqpas wañunqachu, nispa.

⁵³¿Qanqa, Abraham taytaykumanta aswan kurakchu kanki? Payqa wañupunñan, profetakunapas wañupullantaqmi. ¿Pimantaq qanri tukunki? nispa.

⁵⁴Jesustaq kutichirqan: — Ñoqa kikiyta hatunchakuyman chayqa, yanqan kanman. Yayaymi hatunchawaqniyqa, paytan qankunaqa “Diosniyku” ninkichis.

⁵⁵Ichaqa manan payta reqsinkichischu. Ñoqan ichaqa payta reqsini. “Manan payta reqsinichu” niyman chayqa, qankuna hina llullachá kayman. Aswanpas paytaqa reqsinin, simintapas hunt'anin.

⁵⁶Taytaykichis Abrahamqa kusikurqanmi kay pachaman hamunay p'unchayta rikuyta yuyaspa. Rikuspataq anchatapuni q'ochukurqan, nispa.

⁵⁷Hinan judío runakunaqa Jesusta nirqanku: — Manaraqmi phisqa chunka watayoqpaschu kashanki, chaychu, ¿Abrahamta rikuwaq karqan? nispa.

⁵⁸Jesustaq nirqan: — Cheqaqtapunin niykichis: Manaraq Abrahampas kashaqtinmi Ñoqaqa kaniña, nispa.

⁵⁹Hinaqtinmi paykunaqa rumita hoqarirqanku Jesusta ch'aqenankupaq, paytaq pakaykukuspa, Dios yupaychana wasimanta lloqsipurqan.