Read Diospa Simin Qelqa JUAN 9 Bible Online

JUAN 9 - Diospa Simin Qelqa bible

JUAN 9

¹Purishaspanmi Jesusqa rikurqan ñawsapuni naceq runata.

²Yachachisqankunataq payta tapurqanku: — Yachachikuq, ¿imanaqtintaq kay runaqa ñawsa nacerqan? ¿Tayta-mamanpa huchanmantachu? Icha, ¿kikinpa huchanmantachu? nispa.

³Jesustaq nirqan: — Manan kikinpa huchanmantachu, manataqmi tayta-mamanpa huchanmantapaschu ñawsaqa nacerqan, aswanpas Diospa ruwayninkuna paypi rikuchisqa kananpaqmi.

⁴P'unchayraq kashaqtinmi kachamuwaqniy Diospa ruwanankunata llank'anaypuni, tutayaqtinmi ichaqa mana pipas llank'ayta atinqañachu.

⁵Kay pachapi kashanaykamaqa kay pachaq k'anchayninmi kani, nispa.

⁶Chayta nispataq pampaman thoqarqan, thoqayninwan t'uruchaspataq ñawsaq ñawinkunata t'uruwan llusiykurqan.

⁷Hinaspan nirqan: — Phaway, Siloé estanquepi mayllikamuy, nispa (Siloé sutiqa “Kachasqa” ninantan nin). Chaymi ñawsaqa rispa mayllikamurqan, hinaspan qhawashaq kutimpurqan.

⁸Hinaqtinmi wasi-masinkunaqa ñawpaq mañapakusqanta rikuqkunapiwan nirqanku: — ¿Manachu kayqa tiyaykuspa limosna mañapakuq? nispa.

⁹Wakinmi nirqanku: — Arí, paypunin, nispa. Wakintaq nirqanku: — Manan paychu, paymanqa rikch'akullanmi, nispa. Ñawsamanta qhawarichisqa runataq willakurqan: — Arí, ñoqapunin kani, nispa.

¹⁰Hinan payta nirqanku: — ¿Imaynatan ñawiykikunaqa kicharirqokurqan? nispa.

¹¹Chaymi payqa kutichirqan: — Jesús sutiyoq runan t'uruchaspa ñawiykunata llusiykuwarqan, hinaspan niwarqan: Siloeta rispa mayllikamuy, nispa. Rispaytaqmi mayllikamurqani, hinan qhawarirqapurqani, nispa.

¹²Chaymi payta nirqanku: — ¿Maypin chay runa kashan? nispa. Paytaq nirqan: — Manan yachanichu, nispa.

¹³Jesuspa t'uruchaspa ñawsaq ñawinkunata qhawarichisqanqa samana p'unchaymi karqan. Chaymi ñawsamanta qhawarichisqa karqan chay runata fariseokunaman pusarqanku.

¹⁵Hinan fariseokunaqa payta tapurqanku imaynatachus qhawarisqanta. Paytaq fariseokunata nirqan: — T'uruwanmi ñawiykunata llusiykuwarqan, hinan mayllikamuspay qhawapushani, nispa.

¹⁶Chaymi wakin fariseokunaqa nirqanku: — Chay runaqa manan Diosmantachu, samana p'unchaytan mana waqaychanchu, nispa. Wakintaq nirqanku: — Huchasapa runaqa manan kay milagrokunata ruwayta atinmanchu, nispa. Paykunapuran yuyayninkuta mana tupachiyta atirqankuchu.

¹⁷Chaymi ñawsa karqan chay runata wakmanta tapurqanku: — Qanri, ¿ima ninkitaq ñawiykikunata qhawarichiq runamanta? nispa. Hinan payqa nirqan: — Profetan, nispa.

¹⁸Judío umallikunataq ichaqa mana payta creerqankuchu ñawsa kasqanta, manallataq qhawarisqantapas, chaymi tayta-mamanta waqyachimurqanku.

¹⁹Hinaspan paykunata tapurqanku: — ¿Kaypunichu ñawsa naceq wawaykichis? ¿Imaynataq kunanri qhawapushan? nispa.

²⁰Chaymi tayta-mamanqa nirqan: — Arí, yachaykun wawaykupuni kasqantaqa, ñawsapuni nacesqantapas.

²¹Imaynachus kunan qhawashasqantan ichaqa mana yachaykuchu, pichus ñawinkunata kicharisqantapas manan yachaykuchu. Payqa machu runañan, payta tapuychis, kikinmi willasunkichis, nispa.

²²Tayta-mamanqa chayta nirqan judío umallikunata manchakuspanmi. Paykunaqa rimanakurqankuñan pillapas “Jesusqa Mesiasmi” niqtaqa sinagogamanta qarqonankupaq.

²³Chaymi tayta-mamanqa nirqan: — Machu runañan, payta tapuychis, nispa.

²⁴Hinan ñawsa karqan chay runata waqyallarqankutaq, hinaspan nirqanku: — Sut'inta Diospa qayllanpi niwayku. Ñoqaykuqa yachaykun chay runaqa huchasapa kasqanta, nispa.

²⁵Paytaq nirqan: — Huchasapachus icha manachus kasqantaqa manan yachanichu, huktan ichaqa yachani, ñoqan ñawsa kasharqani kunantaq qhawapushani, nispa.

²⁶Chaymi paytaqa nillarqankutaq: — ¿Imanarqasunkitaq? ¿Imaynatan ñawiykikunata kicharirqan? nispa.

²⁷Hinan nirqan: — Willaykichisñan, manataqmi uyariwankichischu. ¿Imaraykun tapupayawankichis? ¿Qankunapas paypa yachachisqan kaytachu munankichis? nispa.

²⁸Hinan k'arakta phiñakuspa nirqanku: — Qanmi payta qatikuqqa kanki, ñoqaykuqa Moisesta qatikuqmi kayku.

²⁹Ñoqaykuqa yachaykun Moisesta Diospa rimaykusqanta, maymantachus chay runaq kasqantan ichaqa mana yachaykuchu, nispa.

³⁰Chaymi chay runaqa paykunata nirqan: — Musphanamá kayqa, maymantachus kasqanta qankunaq mana yachasqaykichisqa, ñoqatan ichaqa ñawiykunata qhawarichiwarqan.

³¹Yachanchismi, Diosqa manan huchasapakunataqa uyarinchu, aswanpas pichus Diosta manchakuspa munayninta ruwan chayllatan uyarin.

³²Manan hayk'aqpas uyarikurqanchu ñawsapuni naceqpa ñawin kicharisqamantaqa.

³³Manachus Diosmanta pay kanman chayqa, manan imatapas ruwayta atinmanchu, nispa.

³⁴Chaymi judío umallikunaqa payta nirqanku: — Qanqa huchapipunin nacerqanki, chaychu, ¿ñoqaykuta yachachiwankikuman? nispa. Hinaspan hawaman qarqomurqanku.

³⁵Jesusqa chay runata qarqomusqankuta yachaspan, paywan tupaspa nirqan: — ¿Runaq Churinpi iñinkichu? nispa.

³⁶Paytaq nirqan: — Wiraqocháy, willaykuway paypi iñinaypaq, nispa.

³⁷Jesustaq payta nirqan: — Rikushawankiñan, ñoqan kani, qanwan rimaq, nispa.

³⁸Chay runataq: — Señorníy, iñinin, nispa qonqoriykukuspa Jesusta yupaycharqan.

³⁹Jesustaq nirqan: — Ñoqaqa juzgaqmi kay pachaman hamurqani, mana rikuqkuna rikunankupaq, rikuqkunataq ñawsayanankupaq, nispa.

⁴⁰Wakin fariseokunataq chayta uyarispa Jesusta nirqanku: — ¿Ñoqaykupas ñawsallataqchu kayku? nispa.

⁴¹Jesustaq paykunata nirqan: — Ñawsa kaspaykichisqa mana huchayoqchá kawaqchis. Qankunan ninkichis: Qhawashaykun, nispa, chayraykun huchallayoqpuni kashankichis, nispa.