Read Diospa Simin Qelqa HECHOS 1 Bible Online

HECHOS 1 - Diospa Simin Qelqa bible

HECHOS 1

¹Wiraqocháy Teófilo, ñawpaq qelqamusqaypin willamurqaykiña Jesuspa llapan ruwasqanmanta yachachisqanmantawan, qallariymantapacha

²hanaq pachaman hoqarisqa kasqan p'unchaykama. Manaraq hanaq pachaman hoqarisqa kashaspanmi akllakusqan apostolkunata Santo Espirituq atiyninwan kamachirqan.

³Jesusmi wañusqanmanta kawsarimpuspa tawa chunka p'unchay ukhupi apostolkunaman sut'ita rikhurirqan, hinaspan Diospa qhapaqsuyunmanta yachachirqan. Chay hinapin apostolkunaqa yacharqanku cheqaqtapuni Jesusqa kawsashasqanta.

⁴Paykunawan kashaspanmi, Jesusqa paykunata kamachirqan: — Amaraq Jerusalén llaqtamanta lloqsiychischu, aswanpas Yayaq prometesqanta nisqayman hina suyaychis.

⁵Juanqa unuwanmi bautizarqan, qankunan ichaqa kay pisi p'unchaykunallamanta Santo Espirituwan bautizasqa kankichis, nispa.

⁶Apostolkunan huñunakuspa Jesusta tapurqanku: — Señorniyku, ¿kay tiempopichu Israel suyuta wakmanta sayarichinki ñawpaq hina kananpaq? nispa.

⁷Hinan paykunata nirqan: — Manan qankunamanchu chay yachayqa tupasunkichis, aswanpas kikin Yayallan tiempokunatapas p'unchaykunatapas akllananpaqqa atiyniyoq.

⁸Qankunaman Santo Espíritu hamuqtinmi ichaqa atiyta chaskinkichis, hinaspan testigoykuna kankichis Jerusalén llaqtapi, lliw Judea provinciapi, Samaria provinciapi, kay pachaq k'uchunkunakamaraq, nispa.

⁹Chaykunata nisqanmantañataq Jesusqa paykuna qhawashaqtinku hanaq pachaman hoqarisqa karqan. Hinan huk phuyu payta pakaykurqan.

¹⁰Jesuspa hanaq pachaman ripushasqanta qhawashaqtinkutaq, yuraq p'achayoq iskay qharikuna paykunawanña kasharqanku.

¹¹Chay qharikunan paykunata nirqan: — Galileamanta kaq qharikuna, ¿imanaqtinmi hanaq pachata qhawashankichis? Qankunamanta hanaq pachaman ripuq kikin Jesusmi hanaq pachaman ripusqanta rikusqaykichis hinallatataq kutimunqa, nispa.

¹²Hinaqtinmi apostolkunaqa Olivos nisqa orqomanta Jerusalén llaqtaman kutipurqanku, chay orqoqa Jerusalén llaqtamanta qayllallapin kashan, huk kilómetro hinalla.

¹³Llaqtaman haykuspataq qorpachakusqanku altos wasiman wicharqanku, chaypin kasharqanku: Pedro, Jacobo, Juan, Andrés, Felipe, Tomás, Bartolomé, Mateo, Alfeoq churin Jacobo, Zelote nisqa t'aqamanta Simón, Jacoboq churin Judaspiwan.

¹⁴Llapan chaykunan huk sonqolla Diosmanta mañakunankupaq huñukuqku, paykunawanmi kasharqan warmikunapas, Jesuspa maman Mariapas, wawqenkunapas.

¹⁵Chay p'unchaykunapin pachak iskay chunkayoq hina iñiqkuna huñukurqanku. Hinan Pedroqa chawpinkupi sayaykuspa nirqan:

¹⁶— Wawqe-panaykuna, Santo Espirituqa ñawpaqtañan Davidpa siminwan Judasmanta rimarqan. Diospa Simin Qelqaqa hunt'akunanpunin karqan. Judasmi karqan Jesusta hap'iqkuna pusaq.

¹⁷Payqa ñoqanchiswan yupasqa kaspan kay ruwayninchispi ruwaysikuq karqan.

¹⁸Paymi mana chanin ruwasqanmanta qolqe pagasqankuwan chakrata rantirqan, umanpamanta urmaykuspataq phatarqan, hinan lliw ch'unchulninkunapas tallikurqan.

¹⁹Jerusalén llaqtapi llapa tiyaqkunataq chayta yachaspanku chay chakrata rimayninkupi suticharqanku: Aceldama, nispa.

²⁰Aceldamaqa Yawar Chakra ninantan nin. Salmos Qelqapin qelqasqa kashan: “Wasinpas purunyapuchun, amataq chaypi tiyaqpas kachunchu”, nisqa. Nillantaqmi: “Umalli kayninpipas wak runa llank'achun”, nispa.

²¹Chay hinaqa, Señor Jesuswan kuska tukuy tiempo puriq-masinchis qharikunamanta hukninta akllasunchis.

²²Paykunan Juanpa Jesusta bautizasqanmantapacha ñoqanchiswan karqanku Jesuspa hanaq pachaman hoqarisqa kasqan p'unchaykama. Chay hinaqa, paykunamantan hukninta akllananchis Jesuspa kawsarimpusqanmanta testigomasinchis kananpaq, nispa.

²³Chaymi iskayta akllarqanku: Justo sutiyoq José Barsabasta, Matiastawan.

²⁴Hinaspan mañakurqanku: — Señorniyku, qanllan tukuy runaq sonqonta reqsinki, qanpuni reqsichiwayku mayqentachus kay iskayninmanta akllakusqaykita,

²⁵apostol-kaypi Judaspa rantinpi ruwanayoq kananpaq. Chay llank'anayoq kaymantaqa Judasmi lloqsipurqan, maypichus kananman ripunanpaq, nispa.

²⁶Hinaspan sortearqanku, suertetaq Matiasman chayarqan, chaymi chunka hukniyoq apostolkunaman yupasqa kapurqan.