Read Diospa Simin Qelqa HECHOS 10 Bible Online

HECHOS 10 - Diospa Simin Qelqa bible

HECHOS 10

¹Cesarea llaqtapin Cornelio sutiyoq qhari karqan, Italia suyumanta hamuq soldadokunaq capitannin.

²Paymi Dios sonqo runa kaspa, llapa familianpiwan Diosta yupaychaqku, hinallataq wakcha runakunatapas mana mich'akuspa yanapaq, Diosmantapas mañakushallaqpuni.

³Huk p'unchaymi Cornelioqa las tres horasta rikhuriypi Diospa angelnin payman asuykushaqta sut'itapuni rikurqan, hinan payta angelqa nirqan: — ¡Cornelio! nispa.

⁴Chaymi Cornelioqa mancharikuspa angelta qhawaykurqan, hinaspan tapuykurqan: — ¿Imaninkin Señor? nispa. Hinan payta nirqan: — Diosmanta mañakusqaykitapas wakchakunaman yanapayta qosqaykitapas Diosmi chaskin, chaymi Diosqa yuyarisunki.

⁵Kunanqa Jope llaqtaman runakunata kachay, hinaspa Pedro sutiyoq Simonta pusachimuy.

⁶Payqa lamar-qocha patapi wasiyoq suela ruwaq Simonpapi qorpachasqan kashan, paymi nisunki imatachus ruwanaykita, nispa.

⁷Rimapayaqnin ángel ripuqtinmi Cornelioqa iskay kamachinkunata waqyarqan, yanapaqninkunamanta Dios sonqo soldadotawan.

⁸Hinaspan lliw sucedesqanta paykunaman willaspa Jope llaqtaman kacharqan.

⁹Qhepantin p'unchaytaq kachasqankunaqa llaqtamanña qayllaykushaqtinku, Pedroqa chawpi p'unchayta hina wasi pataman wicharqan Diosmanta mañakunanpaq.

¹⁰Payqa yarqaqtinmi mikhunata munarqan, mikhunata wayk'ushanankukamataq mosqoypi hina karqorqan.

¹¹Hinaspanmi hanaq pachata kicharisqata rikurqan, huk hatun llikllata hina tawantin ch'ullpanmanta warkusqa kay pachaman uraykamushaqta.

¹²Chaypitaq kay pachapi imaymana rikch'aq tawa chakiyoq animalkuna, suchuq animalkuna, alton phalaq animalkuna ima karqan.

¹³Hinan Pedroqa huk kunkata uyarirqan: — Pedro, sayariy, kaykunata wañuchispa mikhuy, nishaqta.

¹⁴Chaymi Pedroqa nirqan: — Señorníy, amapuni, manan hayk'aqpas mikhurqanichu mana mikhuna kaqtapas, qhelli kaqtapas, nispa.

¹⁵Hinan chay kunkaqa payta nimullarqantaq: — Diospa ch'uyanchasqantaqa aman “qhelli” ninkichu, nispa.

¹⁶Chhaynatan kinsa kutikama rikhurimurqan, hinaspan chay llikllaqa hanaq pachaman kaqta aysasqa kapurqan.

¹⁷Chay rikhuriy rikusqanmanta Pedro musphashallaqtinraqmi, Cornelioq kachamusqan runakunaqa Simonpa wasinta tapukuspa punkupiña kasharqanku.

¹⁸Hinaspan waqyakuspa tapukurqanku: — ¿Kaypichu Pedro sutiyoq Simonqa qorpachasqa kashan? nispa.

¹⁹Chay rikhuriymanta Pedro yuyaykushaqtinmi Santo Espirituqa payta nirqan: — Qhawariy, kinsa runakunan maskhamushasunki.

²⁰Sayarispa uraykuy, hinaspa paykunawan riy, ama iskayrayaspa, ñoqan paykunata kachamurqani, nispa.

²¹Hinaqtinmi Pedroqa uraykuspa Cornelioq kachamusqan runakunata nirqan: — Ñoqan kani maskhasqaykichis runaqa. ¿Imamantaq hamurqankichis? nispa.

²²Paykunataq nirqanku: — Capitán Cornelioq kachamusqanmi hamushayku, payqa Dios manchakuq chanin qharin, paytaqa llapa judío runakunapas allintan qhawarinku. Diosmi santo angelninwan Cornelioman willachisqa, qanta wasinman pusachinasuykipaq, hinaspa nisqaykikunata uyarinanpaq, nispa.

²³Chaymi paykunata ukhuman pusaykuspa qorpacharqan. Qhepantin p'unchay hatarispanmi Pedroqa paykunawan rirqan, hinan Jope llaqtapi tiyaq wakin wawqekunapas riysirqanku.

²⁴Qhepantin p'unchaytaq Cesarea llaqtaman haykurqanku. Chaypin Cornelioqa paykunata suyasharqan, familianta munasqan amigonkunatawan huñuykuspa.

²⁵Pedro haykushaqtintaq Cornelioqa chaskiykuq lloqsimurqan, hinaspan ñawpaqenpi qonqoriykukuspa k'umuykukurqan yupaychananpaq.

²⁶Pedrotaq ichaqa payta nirqan: — Sayariy, ñoqapas qan hina runallan kani, nispa.

²⁷Pedroqa Corneliowan rimaspañan wasiman haykurqan, chaypitaq askha huñunasqa runata tarirqan.

²⁸Hinaspan Pedroqa paykunata nirqan: — Qankunaqa yachankichismi, judío runapaqqa manan chaninchu wak llaqtayoqkunawan rimananpas wasinman haykuykunanpas. Ichaqa Diosmi yachachiwan ama pitapas “millaymi, qhellin” nispa qhawanaypaq.

²⁹Chayraykun waqyachimuwaqtiykichis, mana iskayrayaspa hamuni. Chay hinaqa, yachaytan munani: ¿Imapaqtaq waqyachimuwankichis? nispa.

³⁰Chaymi Cornelioqa nirqan: — Tawa p'unchayñan karqon, kunan hina las tresta kay wasiypi Diosmanta mañakusharqani, chayllamanmi k'ancharishaq p'achayoq qhari ñawpaqeypi sayaykuspa

³¹niwarqan: Cornelio, mañakusqaykitan Dios uyarin, wakchakunaman yanapay qosqaykitapas yuyarillantaqmi.

³²Chay hinaqa, Jope llaqtaman runakunata kachay, hinaspa Pedro sutiyoq Simonta pusachimuy. Payqa lamar-qocha patapi wasiyoq suela ruwaq Simonpapin qorpachasqa kashan, nispa.

³³Chaymi qanman kaq rato kachamurqani. Allinpuni hamuwankiku. Kaypin Diospa qayllanpi llapayku kashayku, Diospa tukuy kamachisqasuykita uyarinaykupaq, nispa.

³⁴Hinaqtinmi Pedroqa nirqan: — Kunanraqmi entiendeni, Diosqa manan mayqen runatapas rikch'ayninta qhawaspachu akllan,

³⁵aswanpas may suyupipas payta yupaychaspa chanin-kayta ruwaqtaqa chaskinmi.

³⁶Diosqa Israel runakunaq mirayninmanmi rimaykurqan, Jesucristorayku Dioswan allipunasqanmanta allin willakuykunata willachimuspa, Jesucristoqa llapanchispa Señorninchismi.

³⁷Qankunaqa yachankichismi Juanpa bautismomanta willasqan qhepata Galilea provinciamantapacha qallarispa, Judea provinciantinpi tukuy imaymanakuna sucedesqanta.

³⁸Nazaret llaqtayoq Jesustan Diosqa Santo Espirituwan hawiykuspa atiyta qorqan. Jesusmi allinkunata ruwaspa purirqan, saqraq llapallan munaychakusqankunatapas qhaliyachispa, chaytaqa ruwarqan Dios paywan kasqanraykun.

³⁹Ñoqaykutaq testigokuna kayku Judea provinciapi, Jerusalén llaqtapipas Jesuspa lliw imaymana ruwasqanmanta. Paytan chakataspanku wañuchirqanku.

⁴⁰Diosmi ichaqa kinsakaq p'unchaypi kawsarichimpurqan, hinaspan sut'ita rikuchiwarqanku.

⁴¹Manan llapan runakunamanchu rikhurirqan, aswanpas ñoqallaykumanmi. Ñoqaykuqa ñawpaqmantaña Diospa akllasqan testigokunan kayku. Wañusqanmanta kawsarimpuqtinqa paywanmi mikhurqayku ukyarqayku.

⁴²Paymi ñoqaykuta kamachiwarqanku llapa runaman allin willakuykunata willanaykupaq, kawsaqkunaqpas wañuqkunaqpas Diospa churasqan Juez Jesusqa kasqanta willanaykupaqwan.

⁴³Jesusmantan llapa profetakunaqa willakurqankuña: “Paypi llapa iñiqkunaqa huchankumanta pampachayta sutinpi chaskinqaku”, nispa.

⁴⁴Chaykunata Pedro rimashallaqtinraqmi, llapan uyariqkunaman Santo Espíritu uraykamurqan.

⁴⁵Chaymi Pedrowan hamuq iñiq judío runakunaqa muspharqanku, mana judío runakunamanpas Santo Espirituq qokuynin hamusqanmanta.

⁴⁶Wak rimaykunapi rimaqtan uyarirqanku, Diostapas hatunchasqankuta ima.

⁴⁷Chaymi Pedroqa nirqan: — Kay runakunaqa ñoqanchis hinallataqmi Santo Espirituta chaskinku, ¿pitaq bautizasqa kanankutaqa hark'akunman? nispa.

⁴⁸Hinaspan Señor Jesuspa sutinpi bautizasqa kanankupaq kamachirqan. Chaymantataq Pedrota valekurqanku pisi p'unchaykunatawan paykunawan qhepakunanpaq.