Read Diospa Simin Qelqa HECHOS 14 Bible Online

HECHOS 14 - Diospa Simin Qelqa bible

HECHOS 14

¹Iconio llaqtapin judío runakunaq sinagogaman Pablowan Bernabewan kuska haykuspanku sumaqtapuni willarqanku. Hinan ancha askha judío runakunapas mana judío runakunapas Jesuspi iñirqanku.

²Iñiyta mana munaq judío runakunan ichaqa mana judío runakunata yachaykachispa tanqarqanku iñiqkuna contra sayarinankupaq.

³Chayraykun apostolkunaqa unaytaraq chaypi qhepakurqanku, Señormanta mana manchakuspa rimaspanku. Señormi paykunamanqa atiyta qorqan musphana milagrokunata ruwanankupaq, chay hinapin sut'incharqan Diospa khuyakuyninmanta willakusqankuqa cheqaq kasqanta.

⁴Llaqta runakunataq ichaqa t'aqanakurqan, wakinmi judío runakunaman sayakurqan, wakintaq apostolkunaman sayakurqan.

⁵Judío runakunan mana judío runakunapiwan kamachikuqninkunantin apostolkunata k'irinankupaq ch'aqenankupaqwan rimanakurqanku.

⁶Chayta yachaspan Pablowan Bernabewan Licaonia ladopi Listra llaqtaman Derbe llaqtaman lliw muyuriqnintinmanwan ayqerqanku.

⁷Chaypipas Jesusmanta allin willakuykunataqa willarqankun.

⁸Listra llaqtapin wist'upuniña naceq runa tiyasharqan, payqa manan hayk'aqpas puririqchu.

⁹Paymi Pabloq rimasqanta uyarisharqan. Pablotaq payta allinta qhawaykurqan, hinaspan qhaliyananpaq iñiyniyoq kasqanta reparaspa

¹⁰kunkayoqta nirqan: — ¡Sayariy allinta! nispa. Chay runataq saltarqan, hinaspan puririrqan.

¹¹Chaymi runakunaqa Pabloq ruwasqanta rikuspa, Licaonia rimaypi kunkayoqta nirqanku: — ¡Dioskunan runakunaman tukuspa uraykamuwanchis! nispanku.

¹²Bernabetan Júpiter nispa suticharqanku, Pablotataq ñawpaq rimaq kasqanrayku Mercurio nispa suticharqanku.

¹³Llaqtanku chimpapin Júpiter dios yupaychananku wasi kasharqan. Chaymi Jupiterpa sacerdotenqa torokunata t'ika pillukunatawan llaqta punkuman apamuspa, runakunawan kuska sacrificiota apostolkunaman haywayta munarqan.

¹⁴Hinan apóstol Bernabewan Pablowan chayta reparaspanku, p'achankuta llik'ikuspa runakuna ukhuman qaparispa phawaykurqanku:

¹⁵— ¿Imaraykun kayta ruwankichis? Ñoqaykupas qankuna hina runallataqmi kayku, Diosmanta allin willakuykunatan willaykiku kay yanqa ruwaykunamanta kawsaq Diosman kutirikunaykichispaq. Paymi ruwarqan hanaq pachata kay pachata, lamar-qochata, chaykunapi tukuy ima kaqtapas.

¹⁶Paytaqmi ñawpa p'unchaykunapi llapan runakunata ñanninkupi puriqta hinallata qhawarqan.

¹⁷Chaywanpas Diosqa imapas allinta ruwasqanwanmi reqsichikurqan. Paymi parachimun, chakrakunatapas tiemponpi ruruchin, mikhunatapas askhata qowanchis, sonqonchistapas anchata kusichin, nispa.

¹⁸Chaykunata nispataq ñak'ayta runakunata hark'arqanku, paykunaman sacrificiota ama haywanankupaq.

¹⁹Chaymantañataqmi Antioquía llaqtamanta Iconio llaqtamantawan judío runakuna chayamurqanku, hinaspan runakunata yuyaychaspa tanqarqanku. Chaymi Pablota ch'aqerqanku, wañusqaña kasqanta yuyaspataq llaqta hawaman aysarqanku.

²⁰Iñiqkuna muyuykuqtinkutaq Pabloqa hatarispa llaqtaman haykurqan, hinaspan qhepantin p'unchayta Bernabepiwan Derbe llaqtaman puririrqanku.

²¹Chay llaqtapi Jesusmanta allin willakuykunata willaqtinkun askha runa iñirqanku. Chay qhepatataq Listra llaqtaman, Iconio llaqtaman, Antioquía llaqtamanwan kutiripurqanku.

²²Chaykunapin iñiqkunata kallpacharqanku, Jesuspi iñiyninkupi qaqata sayanankupaq. Hinaspan paykunata nirqanku: — Imaymana sasachakuytan muchunanchis Diospa qhapaqsuyunman haykunanchispaqqa, nispa.

²³Sapanka iglesiapitaq ayunaspa mañakuspa ima umalli runakunata akllarqanku, hinaspan iñisqanku Señorman paykunata hap'iykachirqanku.

²⁴Pisidia provincianta rispataq Panfilia provinciaman chayarqanku.

²⁵Diospa siminta Perge llaqtapi willaspankuñataq Atalia llaqtaman uraykurqanku.

²⁶Chaymantataq Antioquía llaqtaman barcopi kutirqanku. Chay llaqtapin iñiqkunaqa khuyapayakuq Diospa makinman paykunata hap'iykachisqaku Diospa llank'ananta ruwanankupaq, chaytan kunan hunt'amurqankuña.

²⁷Antioquía llaqtaman chayaspataq iglesiata huñuspa willarqanku lliw imaymanata paykunawan Diospa ruwasqanta, imaynatachus mana judío runakunaq iñinankupaq punkuta kicharisqantapas.

²⁸Chaypin paykunaqa iñiqkunawan unayta tiyarqanku.