Read Diospa Simin Qelqa HECHOS 16 Bible Online

HECHOS 16 - Diospa Simin Qelqa bible

HECHOS 16

¹Chaymantataq Pablowan Silaswan Derbe llaqtaman chayarqanku, hinaspataq Listra llaqtaman chayarqanku. Listra llaqtapin karqan Jesucristopi iñiq Timoteo sutiyoq, mamanmi karqan Jesucristopi iñiq judía warmi, taytantaq karqan Grecia suyu runa.

²Listra llaqtapi Iconio llaqtapi kaq wawqe-panakunan Timoteomanta allinta rimarqanku.

³Pablon Timoteota pusayta munaspa qhari-kaynin qarachata señalarqan, chay hap'iypi judío runakunata ama phiñachinankupaq. Llapa judío runan yacharqan taytanqa Grecia suyu runa kasqanta.

⁴Llaqtan-llaqtanta purispankutaq iñiqkunaman willarqanku Jerusalén llaqtapi kaq apostolkunaq umalli runakunaqpiwan rimanakusqan kamachikuykunata hunt'anankupaq.

⁵Chay hinapin iglesiakunata Jesucristopi iñiyninkupi qaqata sayanankupaq kallpacharqanku. Sapa p'unchaytaq iñiqkunaqa askhayarqanku.

⁶Pablota, puriysiq-masinkunatawan, Asia provinciapi Diospa siminta willanankutan Santo Espíritu hark'arqan, chaymi Frigia provincianta Galacia provinciantawan purirqanku.

⁷Misia provinciaman chayaspankutaq Bitinia hap'iyman riytapuni munarqanku, ichaqa Jesuspa Espiritunmi paykunata hark'arqan.

⁸Misia provincianta pasaspataq, Troas llaqtaman uraykurqanku.

⁹Chaypi tuta puñushaspataq rikhuriyta Pabloqa rikurqan. Macedonia provincia runa sayaykuspa payta valekushasqa: Macedoniaman chimpamuspa yanapawayku, nispa.

¹⁰Chay rikhuriyta rikurqospa hinan Macedoniaman rinaykupaq q'epichakurqayku, paykunaman allin willakuykunata willamunaykupaq Diospuni waqyawasqankuta yachaspayku.

¹¹Troas llaqtamanta barcopi puririspaykun Samotracia islaman cheqanta rirqayku, qhepantin p'unchaytaq Neápolis llaqtaman barcopi rirqayku.

¹²Chaymantataq Macedonia provinciaq allinnin hap'iypi Filipos llaqtaman rirqayku. Chaypin Roma llaqtayoq runakuna tiyaqku. Chay llaqtapin iskay-kinsa p'unchayta qhepakurqayku.

¹³Samana p'unchaypin llaqtamanta lloqsispa mayu pataman rirqayku, chaypi judío runakunaq Diosmanta mañakushasqankuta yuyaspa. Chayaspaykutaq tiyaykuspa huñunasqa warmikunaman allin willakuykunata willarqayku.

¹⁴Hukkaq warmin Tiatira llaqtamanta Lidia sutiyoq karqan, paymi Dios yupaychaq karqan, sani-puka sumaq awasqakunatan qhatuq. Paypa sonqontan Señorqa kicharirqan Pabloq nisqanta tukuy sonqo uyarinanpaq.

¹⁵Hinan Lidiaqa wasinpi kaqkunantin bautizasqa kaspa valekuwarqanku: — Señorpi cheqaq iñiq kasqayta rikuwaspaykichisqa, wasiyman haykuykamuychis qorpachakuq, nispa. Hinaspan pusaykuwarqankupuni.

¹⁶Huk kutinmi Diosmanta mañakamuq rishaqtiyku watuq espirituq hunt'aykusqan sipas ñoqaykuwan tupaq lloqsimurqan. Paymi watusqanwan sinchita patronninkunata qolqecharqan.

¹⁷Chay sipasmi Pablota ñoqaykutawan qatipakuwaspanku qaparkachaq: — ¡Kay runakunaqa Ancha Hatun Diospa kamachinkunan kanku, paykunan imaynatachus qespichisqa kanaykichismanta willashasunkichis! nispa.

¹⁸Chay hinatan askha p'unchaykunaña qaparkachaq, Pablotaq ichaqa manaña uyariyta munaspa chay espirituman kutirispa nirqan: — ¡Jesucristoq sutinpin kamachiyki, paymanta lloqsiy! nispa. Chaymi kaq ratopacha lloqsirqan.

¹⁹Sipaspa patronninkunataq manaña gananankupaq kasqanta reparaspa Pablota Silastawan hap'irqanku, hinaspan plazaman aysarqanku kamachikuqkunaman.

²⁰Juezkunaman paykunata apaspataq nirqanku: — Kay runakunan judío runa kashaspanku, llaqtanchista ch'aqwachishanku.

²¹Paykunaqa yachachinku kamachikuyninchispa hark'asqan wak costumbrekunatan, ñoqanchisqa Roma llaqtayoq runakunan kanchis, chaymi yachachikuyninkutaqa mana chaskisunmanpaschu ruwasunmanpaschu, nispanku.

²²Runakunataq Pablo contra Silas contrapiwan huk-nisqalla hatarirqanku, chaymi juezkunaqa paykunaq p'achanta ch'utispa varakunawan paykunata waqtanankupaq kamachirqanku.

²³Sinchita waqtaspa k'irispankutaq carcelman wisq'arqanku, hinaspan carcelerota kamachirqanku allintapuni paykunata waqaychananpaq.

²⁴Carcelerotaq chhayna kamachisqa kaspa ukhukaq carcelman apaykurqan, hinaspan chakinkuta cepopi hap'iykachirqan.

²⁵Kuska tutata hinataq Pabloqa Silaswan Diosmanta mañakusharqanku, himnokunatapas takisharqanku, chaytan preso-masinkupas uyarisharqanku.

²⁶Hinaqtinmi qonqaylla sinchita pacha chhaphchikurqan, carcelpa teqsintapas chhaphchirqanraq. Hinan llapan punkukuna kicharparikurqan, sapankaq cadenawan watasqankupas paskarparikurqan.

²⁷Carcelerotaq rikch'arispa, cárcel punkukuna kicharayashaqta rikuspa, espadanta horqokuspa wañurqochikuyta munarqan, presokunaq ayqekusqankuta yuyaspa.

²⁸Chaymi Pabloqa kunkayoqta nirqan: — ¡Ama imanakuypaschu, llapallaykun kaypi kashayku! nispa.

²⁹Hinan carceleroqa k'anchayta mañakuspa ukhuman phawaykurqan, hinaspan khatatataspa Pabloq Silaspa ñawpaqenman qonqoriykukurqan.

³⁰Hawaman paykunata pusaspataq nirqan: — Wiraqochaykuna, ¿imatataq ruwasaq qespisqa kanaypaq? nispa.

³¹Chaymi paykunaqa nirqanku: — Señor Jesucristopi iñiy, qespisqan kanki, qanpas wasiykipi kaqkunapas, nispa.

³²Chaymantataq Señorpa siminta payman willarqanku, wasinpi llapan kaqkunamanwan.

³³Hinaqtinmi carceleroqa chay kikin tutapacha paykunata pusaykuspa k'irinkuta mayllirqan, hinaspan payqa bautizachikurqan llapan familianpiwan.

³⁴Chaymantataq paykunata wasinman pusaykuspa mikhuchirqan, wasinpi llapan familianpiwan Diospi iñisqanmantataq q'ochukurqan.

³⁵Tutamantataq juezkunaqa guardiakunata carceleroman kacharqanku: — Chay runakunata kacharimpuychis, nispa.

³⁶Hinan carceleroqa chay simikunata Pabloman willarqan: — Juezkunan qantawan Silastawan kacharipunaypaq kamachimuwanku, chay hinaqa, lloqsipuspaykichis allillanña ripuychis, nispa.

³⁷Chaymi Pabloqa guardiakunata nirqan: — Roma llaqtayoq runakuna kashaqtiyku, mana huchachasqata runa qayllapi waqtawaspanku, carcelman wisq'ashawaspankuchu, ¿kunanri pakallapi kacharirqoshawanku? Manan hinachu kanan, aswanpas kikinku hamuspa horqowachunku, nispa.

³⁸Chaymi guardiakunaqa kutispa Pabloq nisqanta juezkunaman willamurqanku. Hinaqtinmi Roma llaqtayoq runakuna kasqankuta uyarispa mancharikurqanku.

³⁹Hinaspan juezkunaqa rispa Pablota Silastawan valekurqanku pampachaykunankupaq, horqomuspankutaq valekurqanku llaqtamanta ripunankupaq.

⁴⁰Paykunataq carcelmanta lloqsipuspanku Lidiaq wasinman haykurqanku, chaypi wawqe-panakunawan tupaspataq kallpachaykuspa ripurqanku.