Read Diospa Simin Qelqa HECHOS 23 Bible Online

HECHOS 23 - Diospa Simin Qelqa bible

HECHOS 23

¹Hinaqtinmi Pabloqa umalli runakunata allinta qhawaykuspa nirqan: — Wawqeykuna, ñoqaqa ch'uya sonqoywanmi Diospa qayllanpi kay p'unchaykama kawsani, nispa.

²Chaymi uma sacerdote Ananiasqa Pabloq ladonpi kaqkunata kamachirqan siminpi ch'aqlanankupaq.

³Hinan Pabloqa payta nirqan: — ¡Yaw, iskay uya, qantaqa Diosñataqmi ch'aqlasunki! ¿Kamachikuy simiman hina juzgawanaykipaq tiyashaspaykichu kamachikuy simi contra kamachishanki ch'aqlawanankupaq? nispa.

⁴Qayllanpi sayashaqkunataq nirqanku: — ¿Chay hinatachu Diospa uma sacerdotenta k'aminki? nispa.

⁵Pablotaq nirqan: — Wawqeykuna, manan yacharqanichu uma sacerdote kasqantaqa. Diospa Simin Qelqan nin: “Llaqtaykipi kamachikuqmantaqa aman mana allintaqa rimankichu”, nispa.

⁶Pabloqa wakin saduceokuna wakintaq fariseokuna kasqanta reparaspanmi umalli runakunaq huñunakuyninpi kunkayoqta nirqan: — Wawqeykuna, ñoqaqa fariseon kani, fariseoq churin. Wañusqakunaq kawsarimpunanta suyakusqay hawan ñoqaqa juzgasqa kashani, nispa.

⁷Chay hinata niqtinmi, fariseokunaqa saduceokunawan churanakuyta qallarirqanku, hinan huñunakuyqa t'aqanasqa karqan.

⁸Saduceokunaqa ninkun: Manan kawsarimpuypas, angelpas, espiritupas kanchu, nispa. Fariseokunan ichaqa: Chaykunaqa kanmi, ninku.

⁹Sinchi qapariy kaqtinmi fariseokuna t'aqamanta kamachikuy simita wakin yachachiqkuna sayarispa churapakurqanku: — Kay runapiqa manan ima mana allintapas tariykuchu. Espiritupaschá angelpaschá paytaqa rimaykun, nispa.

¹⁰Sinchi churanakuy kaqtintaq comandanteqa, Pablota llik'irqarinankuta manchakuspa kamachikurqan soldadokuna uraykamuspa, chawpinkumanta Pablota usqhaylla qechurqospa cuartelman apaykunankupaq.

¹¹Qhepantin tutataq Señorqa Pabloman rikhurispa nirqan: — ¡Kallpachakuy Pablo! Imaynan Jerusalén llaqtapi ñoqamanta willakurqanki, ahinallatataqmi Roma llaqtapipas willallankitaq, nispa.

¹²Qhepantin p'unchaytaq wakin judío runakunaqa huñunakuspa jurarqanku: — Pablota wañuchinanchiskama ama mikhusunpaschu ukyasunpaschu, nispa.

¹³Chay juramento ruwaqkunan karqan tawa chunka kurak.

¹⁴Paykunan sacerdote umallikunaman kurak runakunamanwan rispa nirqanku: — Ñoqaykuqa juramuykun Pablota wañuchinaykukama mana imatapas mallinaykupaq.

¹⁵Kunanqa, qankuna umalli runakunapiwan comandantemanta mañachimuychis paqarin qankunaman Pablota pusachimunanpaq, paymanta aswan sut'ita imatapas yachayta munaq tukuspallaykichis, ñoqaykutaq manaraq pay chayamushaqtin wañuchinaykupaq makillaña suyashasaqku, nispa.

¹⁶Ichaqa Pabloq pananpa churinmi rimanakusqankuta uyarirqan, hinaspan cuartelman haykuspa Pabloman willamurqan.

¹⁷Chaymi Pabloqa capitankunamanta hukninta waqyarispa nirqan: — Kay waynachata comandanteman pusaripuway, huk willakuymi willamunan kashan, nispa.

¹⁸Hinan payqa waynachata comandanteman pusaykuspa nirqan: — Kaypi preso kashaq Pablon waqyariwaspa valekamuwan kay waynachata qanman pusamunaypaq, huk willakuyta willanasuykipaq, nispa.

¹⁹Comandantetaq makinmanta hap'iykuspa wakllaman pusarispa waynachata tapurqan: — ¿Imatan willawanki? nispa.

²⁰Chaymi waynachaqa nirqan: — Judío runakunan rimanakushanku: Paqarin comandanteta valekusun Pablota umalli runakunaq huñunakuyninman pusananpaq paymanta aswan sut'itapuni imatapas yachaq tukuspalla, nispanku.

²¹Ichaqa aman paykunata creenkichu, paykunamantaqa tawa chunka kurak hina qharikunan Pablota suyapashanku. Chay runakunan juranku payta wañuchinankukama mana mikhunankupaq, mana ukyanankupaq. Chaymi kunan listollaña kashanku, chay hinatapuni kamachinaykita suyaspanku, nispa.

²²Hinaqtinmi comandanteqa waynachata kachapuspa kamachirqan: — Kay willawasqaykitaqa aman pimanpas rimarinkichu, nispa.

²³Hinan comandanteqa iskay capitanninta waqyaspa kamachirqan: Iskay pachak chakillapi puriq soldadokunata, qanchis chunka caballería soldadokunata, iskay pachaktataq lanzakunayoqta alistamuychis, las nueve horas tutata Cesarea llaqtaman rinaykichispaq.

²⁴Hinallataq caballokunatapas alistamuychis, Pablota sillaykachispa kamachikuq Felixman allin waqaychasqata apanaykichispaq, nispa.

²⁵Hinaspan kay hina cartata paykunawan apachirqan:

²⁶Ñoqa Claudio Lisiasmi, qan ancha respetasqa kamachikuq Felixta napaykamuyki.

²⁷Kay qharitan judío runakuna hap'irqanku, hinaspan wañuchinankupaqña kashaqtinku, soldadoykunawan qechuchirqani Roma suyu runa kasqanta yachaspa.

²⁸Imamantachus payta huchachasqankuta yachayta munaspaymi judío umalli runakunaq huñunakuyninman pusarqani,

²⁹hinaspan yachamurqani paykunaq kamachikuy siminku contra ruwasqallanmanta payta huchachasqankuta, ichaqa manan ima huchatapas paypiqa tarirqanichu, wañunanpaq hinapas carcelpi kananpaq hinapas.

³⁰Chaywanpas Pablota wañuchinankupaq judío runakunaq rimanakusqankuta yacharqospaymi qanman payta apachimushayki. Payta huchachaqkunatapas kamachillanitaq imapas contranpi kaqtinqa qayllaykipiña uyanpi ninankupaq, nispa.

³¹Hinan soldadokunaqa kamachisqaman hina tutalla Antípatris llaqtaman Pablota pusarqanku.

³²Qhepantin p'unchaytaq chakipi puriq soldadokunaqa cuartelman kutipurqanku, caballería soldadokunallaña Pablowan rirqanku.

³³Cesarea llaqtaman chayaspankutaq kamachikuq Felixman carta apasqankuta qospa Pablotapas qayllanman pusaykurqanku.

³⁴Kamachikuq Felixtaq cartata leespa Pablota tapurqan may provinciamantachus kasqanta. Cilicia provinciamanta kasqanta yachaspataq

³⁵nirqan: — Huchachaqniykikuna chayamuqtinña uyarisqayki, nispa. Hinaspan rey Herodespa kamachikunan wasipi wisq'amunankupaq kamachikurqan.