Read Diospa Simin Qelqa HECHOS 25 Bible Online

HECHOS 25 - Diospa Simin Qelqa bible

HECHOS 25

¹Feston Cesarea llaqtaman kamachikuq chayamuspa kinsa p'unchaymanta Jerusalén llaqtaman wicharqan.

²Chaypin sacerdote umallikuna judío kurak runakunapiwan Festoman hamuspa Pablo contra willarqanku, hinaspan valekurqanku:

³— Ama hinachu kay, Pablota Jerusalén llaqtaman pusachimuy, nispa. Paykunaqa ñanpi Pablota wañuchinankupaqmi suyapayta yuyaykurqanku.

⁴Festotaq ichaqa paykunata nirqan: — Pabloqa Cesarea llaqtapin preso kashan, ñoqapas manan unaymantachu Cesareamanqa kutisaq.

⁵Chay hinaqa, qankunamanta kamachikuq runakuna ñoqawan richunku, hinaspa chay qhari ima mana allintapas ruwarqan chayqa uyanpi nimuchunku, nispa.

⁶Festotaq Jerusalén llaqtapi yaqa chunka p'unchayta qhepakuspa Cesarea llaqtaman kutirqan, hinaspan qhepantin p'unchayta juzganapi tiyaykuspa, Pablota pusamunapaq kamachikurqan.

⁷Pablo haykuqtintaq Jerusalén llaqtamanta hamuq judío runakunaqa Pablota muyuykurqanku, hinaspan payta imaymanamanta huchachaykurqanku, chay rimasqanku cheqaq kasqantaqa manataqmi probayta atirqankuchu.

⁸Chaymi Pabloqa defiendekuspa nirqan: — Manan judío runakunaq kamachikuy simin contrapaschu Dios yupaychana wasi contrapaschu, Roma rey Cesarpa contrapaschu huchallikurqani, nispa.

⁹Hinan kamachikuq Festoqa judío runakunawan allinpi kawsayta munaspa Pablota tapurqan: — ¿Munawaqchu Jerusalén llaqtaman riyta, hinaspa chaypi chaykunamanta juzgamunayta? nispa.

¹⁰Chaymi Pabloqa nirqan manan: — Roma rey Cesarpa juzgananpin kashani, kaypin juzgasqa kanay. Qanpa allinta yachasqaykiman hinapas manan judío runakunataqa ima mana allintapas ruwarqanichu.

¹¹Wañunaypaq hina ima mana allintapas ruwarqani chayqa, manan manchakunichu wañuytaqa. Huchachawasqanku mana cheqaq kaqtinqa manan pipas judío runakunaman entregawayta atinmanchu. Chay hinaqa, kikin Roma rey Cesarpa juzgawanantan mañakuni, nispa.

¹²Chaymi Festoqa yuyaychaqninkunawan rimaspaña Pablota nirqan: — Roma rey Cesarpa juzgananta mañakunki chayqa, Cesarmanmi rinki, nispa.

¹³Pisi p'unchaykuna qhepatan rey Agripaqa warmin Berenicepiwan Cesarea llaqtaman rirqanku kamachikuq Festota napaykunankupaq.

¹⁴Askha p'unchaykunata chaypi qhepaqtinkutaq Festoqa Pabloq asuntonmanta reyman willarqan: — Kaypin Felixpa preso saqesqan huk runa kashan.

¹⁵Paymantan Jerusalén llaqtapi kashaqtiy sacerdote umallikuna judío kurak runakunapiwan Pablo contra willawarqanku, hinaspan payta juzgaspa wañuchinaypaq mañakurqanku.

¹⁶Hinan paykunata nirqani: Roma suyu kamachikuqkunaqa manan pitapas wañuchiykumanchu, huchachaqninkunaq qayllanpi huchachasqankumanta manaraq defendekushaqtinqa, nispa.

¹⁷Chaymi kayman paykuna hamuqtinku, usqhaylla qhepantin p'unchaypacha juzganapi tiyaykurqani, hinaspan kamachikurqani chay qharita pusamunapaq.

¹⁸Huchachaqninkuna huñukamuspataq Pablotaqa mana imamantapas sut'ita huchacharqankuchu, ñoqaq yuyaykusqayman hinaqa.

¹⁹Aswanpas paytaqa huchacharqanku religionninkumanta churanakuy kaqkunallamantan, hinallataq wañupurqan chay Jesusta Pabloq “kawsashanmi” nisqallanmantawan.

²⁰Chaymi ñoqaqa chay churanakuykunamanta iskayrayaspay, payta tapurqani: ¿Munawaqchu Jerusalén llaqtaman riyta, hinaspa chaypi chaykunamanta juzgamunayta? nispa.

²¹Ichaqa Pablon mañakurqan Roma suyu kamachikuqpuni juzgananta, chaymi Roma rey Cesarman apachinaykama preso kananpaq kamachikurqani, nispa.

²²Hinan Agripaqa Festota nirqan: — Ñoqapas munaymanmi chay runa uyariykuyta, nispa. Hinan payqa nirqan: — Paqarinmi uyarinki, nispa.

²³Qhepantin p'unchaytaqmi Agripaqa warmin Berenicepiwan sumaq allichasqa p'achayoq hamuspa comandantekunapiwan llaqtapi umalli runakunapiwan juzgana wasiman haykurqanku. Hinan Festo kamachikuqtin Pablota pusamurqanku.

²⁴Hinaqtinmi Festoqa nirqan: — Rey Agripa, kaypi kashaq llapa wiraqochakuna, kaymi chay runa. Paymantan llapallan judío runakuna huñunakuspa, Jerusalén llaqtapipas kaypipas mañakuwanku: ¡Wañuchunpuni! nispa qaparkachaspanku.

²⁵Ichaqa manan imatapas wañunanpaq hina ruwasqantaqa tarirqanichu. Pay kikintaqmi Roma suyu kamachikuqman rinanpaq mañakurqan, chaymi payman apachinaypaq yuyaykuniña.

²⁶Ichaqa manan imatapas kay runamantaqa sut'ita yachanichu wiraqochay rey Cesarman qelqanaypaq, chaymi qayllaykichisman apachimuni, astawanqa, rey Agripa qanmanmi apachimuni, payta tapuykapuway, ahinapi sut'ita yachaspa imallapas qelqanaypaq.

²⁷Ñoqamanqa manan allinchu rikch'akuwan huk presota apachishaspa, imamantachus huchachasqa kasqanta mana willaymanchu chayqa, nispa.