Read Diospa Simin Qelqa HECHOS 26 Bible Online

HECHOS 26 - Diospa Simin Qelqa bible

HECHOS 26

¹Chaymi rey Agripaqa Pablota nirqan: — Qan kikiyki rimarikuy, nispa. Hinan Pabloqa makinta hoqarispa defiendekuyta qallarirqan:

²— Reyníy Agripa, kusisqan kashani tukuy imaymanamanta judío runakunaq huchachawasqanmanta kunan qayllaykipi defiendekunaypaq kashaspa.

³Judío runakuna ukhupi lliw costumbremantapas churanakuy kaqkunamantapas qanmi astawanraqqa yachanki, chaymi valekuyki pacienciawan uyariykuwanaykipaq.

⁴Huch'uy kasqaymantapachan suyuypipas Jerusalén llaqtaypipas kawsayniytaqa llapa judío runakuna yachanku.

⁵Paykunaqa yachallankutaqmi qallariymantapacha fariseo kaspa, Diosta yupaychayniykupi aswan hunt'aq t'aqaman hina kawsasqayta. Chaymanta rimariyta munaspaqa kikinku rimarichunku.

⁶Kunanqa ñawpa taytaykuman Diospa prometesqanta suyakusqayraykun juzgasqa kanaypaq kaypi kashani,

⁷chay prometesqa hunt'akunantan Israelpa chunka iskayniyoq ayllunkunapas suyakushanku, tuta-p'unchay tukuy sonqo Diosta yupaychaspa. Reyníy Agripa, chay suyakuyllamantan judío runakunaq huchachasqan kashani.

⁸¿Imanaqtintaq qankunaqa mana creeyta munankichischu wañusqakunata Diospa kawsarichimunanta?

⁹Ñawpaqtaqa ñoqapas yuyaykurqanin Nazaret llaqtayoq Jesús contra imaymana ruwayta.

¹⁰Chay hinatapunin Jerusalén llaqtapipas ruwarqani, sacerdote umallikunaq kamachisqanmi Jesuspi iñiqkunata askhata carcelkunaman wisq'arqani, wañuchishaqtinkupas ñoqaqa “allinmi” nirqanin.

¹¹Askha kutitaqmi llapan sinagogakunapi paykunata muchuchispay Señor Jesusta negachirqani. Paykuna contra sinchi k'arakta phiñakuspaymi maskharqani karu llaqtakunapipas.

¹²Chayta yuyaykuspan sacerdote umallikunaq kamachisqan kaspa Damasco llaqtaman risharqani.

¹³Ichaqa, reyníy, chawpi p'unchayta ñanta rishaspaymi hanaq pachamanta k'anchayta rikurqani, inti k'anchaymantapas aswan k'anchaqtaraq, chay k'anchaymi puriq-masiykunatawan k'anchaykuwarqan.

¹⁴Hinan llapayku pampaman urmarqayku, ñoqataq hebreo rimaypi huk kunkata uyarirqani: ¡Saulo! ¡Saulo! ¿Imanaqtinmi qatiykachawanki? Kikiykitan nanachikunki t'urpunata hayt'aykachaspaykiqa, nispa, nishaqta.

¹⁵Chaymi ñoqaqa nirqani: Señor, ¿pitaq kanki? nispa. Hinan chay kunkaqa niwarqan: Ñoqaqa qatiykachasqayki Jesusmi kani.

¹⁶Sayariy, kamachiy kanaykipaqmi ñoqaqa rikhuriyki, kunan rikusqaykitapas qhepa p'unchaykunapi rikuchisqayki chaykunatapas willakunaykipaq.

¹⁷Ñoqan waqaychasqayki judío runakunamantapas mana judío runakunamantapas. Paykunaman rinaykipaqmi kunan kamachiyki,

¹⁸ñawinkuta kicharimunaykipaq, laqhayaqmanta k'anchayman lloqsinankupaq, Satanaspa munaychakuyninmantapas Diosman kutirikunankupaq. Ñoqapi iñisqankuraykun huchanku pampachasqa kanqa, Diospa akllakusqankunawan kuska herenciata chaskinankupaq, nispa.

¹⁹Chayraykun reyníy Agripa, hanaq pachamanta Jesuspa kamachiwasqanta kasukurqani.

²⁰Chaymi ñawpaqtaqa Damasco llaqtapi, chaymantataq Jerusalén llaqtapipas, Judea provinciantinpipas, mana judío runakunamanpas willarqani: Huchata saqepuspa Diosman kutirikuychis, allinkunata ruwaspa Diosman kutirikusqaykichista rikuchiychis, nispa.

²¹Chay hawan judío runakunaqa Dios yupaychana wasipi hap'iwaspa wañuchiytapuni munawarqanku.

²²Ichaqa Diospa yanapayninwanmi kunankama huch'uymanpas hatunmanpas Diosmanta willashani. Profetakunaqpas Moisespapas imachus kananta nisqallankutan rimani.

²³Paykunan nirqan: Cristoqa ñak'arispan wañunqa, hinaspan ñawpaqkaq kawsarimpuq kanqa, Diospa k'anchaynin chayamusqanta judío runakunamanpas mana judío runakunamanpas willananpaq, nispanku, nispa.

²⁴Pablo defiendekuspa chaykunata niqtinmi Festoqa kunkayoqta nirqan: — Pablo, waq'ayarqonkin, sinchi yachayniykin waq'ayachisunki, nispa.

²⁵Chaymi Pabloqa nirqan: — Manan waq'achu kashani, ancha respetasqa Festo, aswanmi allin chayasqa cheqaq simikunata rimashani.

²⁶Rey Agripaqa chaykunata yachanmi, chaymi paypa ñawpaqenpi sut'itapuni rimashani. Lliw chaykunata paypa yachasqantaqa yachanin, chaykunaqa manan pakapichu ruwasqa karqan.

²⁷Reyníy Agripa, ¿creenkichu profetakunaq nisqanta? Yachanin creesqaykita, nispa.

²⁸Hinan Agripaqa Pablota nirqan: — ¿Pisi tiempollapichu cristianoman tukuchiwankiman? nispa.

²⁹Chaymi Pabloqa nirqan: — Dios munachun, pisi tiempopipas unaypipas, ama qanllachu, aswanqa kunan lliw uyariwaqniykunapas Jesucristopi ñoqa hina iñiq kanaykichista, kay hina watasqa kayllata amaqa, nispa.

³⁰Chaykunata Pablo niqtinmi rey Agripaqa sayarirqan, hinallataq kamachikuq Festopas Berenicepas paykunawan tiyaqkunapas sayarirqanku.

³¹Hinaspan wakllaman anchhurispanku ninakurqanku: — Kay runaqa manan imatapas wañunanpaq hinaqa ruwasqachu, manallataqmi presopas kanmanchu, nispa.

³²Agripataq Festota nirqan: — Kay runataqa kacharipusunmanmi karqan, manachus Roma rey Cesarpa juzgananpaq mañakunman karqan chayqa, nispa.