Read Diospa Simin Qelqa ROMANOS 11 Bible Online

ROMANOS 11 - Diospa Simin Qelqa bible

ROMANOS 11

¹Chay hinaqa, tapukunin: ¿Diosqa Israel llaqtanta wikch'urqanchu? ¡Manapunin! Ñoqapas Israel runan kani, Abrahampa miraynin, Benjamín ayllumanta.

²Diosqa ñawpaqmantaña reqsisqan llaqtantaqa manan wikch'urqanchu. Icha, ¿manachu yachankichis imatachus Eliasmanta Diospa Simin Qelqapi willakusqanta? Eliasmi Israel llaqta contra Diosman willakuspa nirqan:

³“Señor Diosníy, profetaykikunatan wañuchinku, altarniykikunatan thuninku, ñoqa sapallayñan qhepani, ñoqatapas wañuchiytan munashawanku”, nispa.

⁴Hinan Diosqa payman kutichimurqan: “Qanchis waranqa runakunatan ñoqapaq qhepachikuni, paykunaqa manan Baal diosmanqa qonqorikurqankuchu”, nispa.

⁵Chay hinallataqmi kunanpas Israel runakunamanta pisi qhepaqkunalla kashanku, Diospa khuyapayakuyninwan akllakusqankunalla.

⁶Diosqa khuyapayaspanmi paykunata akllakurqan, manan paykuna imatapas ruwasqankuraykuchu, mana chayqa, Diospa khuyapayakuyninqa manachá khuyapayakuyñachu kanman.

⁷Chay hinaqa, Israel llaqtaqa imatachus maskhasqanta manan tarirqanchu, Diospa akllakusqankunan ichaqa tarirqanku. Wakinpa sonqontaq rumiyachisqa karqan.

⁸Diospa Simin Qelqan nin: “Diosmi paykunata tunuyachirqan mana imatapas reparanankupaq, paykunatan ñawsayachirqan mana rikunankupaq, roqt'uyachirqan mana uyarinankupaq, chay hinan kunan p'unchaykama kashanku”, nispa.

⁹Davidpas nillantaqmi: “Hatun mikhuyninkupas toqllaman tukuchun, llikaman tukuchun, misk'anaman tukuchun, urmaspanku muchuchisqa kanankupaq.

¹⁰Ñawinkupas tutayachun amaña rikunankupaq, wasankupas qhopuyachun wiñaypaq”, nispa.

¹¹Ñoqan tapukuni: ¿Israel runakunaqa misk'aspanku pasaqtachu urmapurqanku? nispa. ¡Manapunin imaynamantapas! Aswanpas paykunaq urmasqankuraykun mana judío runakunata Diosqa qespichin, chay hinapi Israel runakuna paykunata envidiakunankupaq.

¹²Chay hinaqa, paykunaq urmasqankuchus kay pachaq ancha allinninpaq karqan, pisi kallpayasqankupas mana judío runakunaq ancha allinninpaq karqan chayqa, ¡may hina allinraqmi kanqa llapanku judío runakuna wakmanta Diosman kutirikuqtinkuqa!

¹³Chaytaqa niykichis qankuna mana judío runakunamanmi. Qankunaq apostolniykichis kasqayraykun llank'anaytaqa ancha chaniyoqpaq qhawani.

¹⁴Ahinapi ichapas llaqtamasiy judío runakunata envidiachispa wakinta qespichiyman.

¹⁵Israel runakunaq wikch'usqa kasqankutaq wak runakunaq Dioswan allipunananpaq karqan chayqa, ¿imaynaraqtaq kanman paykuna Diospa chaskisqan kaqtinkuqa? ¡Wañuymanta kawsarimpuq hinaraqmi kanman!

¹⁶Ñawpaqkaq chapusqa masachus Diospaq t'aqasqa kan chayqa, llapan masan ch'uya kapun. Hinallataq sach'aq saphinchus Diospaq t'aqasqa chayqa, llapan k'allmankunapas ch'uyallataqmi kapun.

¹⁷Wakin judío runakunan olivo sach'aq k'allman wit'usqa hina karqanku, qantaq k'ita olivo k'allma hina kashaspa chay wit'usqaman ch'antasqa karqanki. Ahinapin, chay olivo sach'aq saphinwan alimentasqa karqanki.

¹⁸Ichaqa ama yuyaychu kikin k'allmakunamanta aswan allin kasqaykitaqa. Hatunchakunkichus chayqa, allinta yachay, manan qanchu saphitaqa kawsachishanki, aswanpas saphin qantaqa kawsachishasunki.

¹⁹Qanqa ninkipaschá: Chay olivo sach'a k'allmakunaqa, chayman ñoqa ch'antasqa kanaypaqmi wit'usqa karqan, nispa.

²⁰Arí, mana iñisqankuraykun wit'usqa karqanku, qanmi ichaqa iñisqaykirayku chaypi qaqata sayashanki. Chay hinaqa, ama hatunchakuychu, aswanpas Diosta manchakuy.

²¹Kikin k'allmakunatapas Diosqa manan hinallatachu wiñachirqan, ¿chaychu qanta hinallata wiñachisunkiman?

²²Qhawariy, Diospa imayna sumaq sonqochus kasqanta, chaninninpipuni huchachaq kasqantapas. Urmaqkunatan chaninninpi huchachan, qantan ichaqa sumaq sonqowan chaskiykusunki, sumaq sonqo-kayninpi sayaqtiyki. Mana hinaqa, qanpas wit'usqallataqmi kanki.

²³Israel runakunachus wakmanta iñinqaku chayqa, paykunan wakmanta sach'aman ch'antasqa kanqaku. Diosqa atiyniyoqmi wakmanta paykunata ch'antananpaq.

²⁴Qanpas k'ita olivo sach'amanta wit'uqasqa kaspa mana kanayki cheqaq olivo sach'aman ch'antasqa karqanki chayqa, astawanraqmi kikin k'allmakunaqa cheqaq olivo sach'ankuman ch'antasqa kanqaku.

²⁵Wawqe-panaykuna, kay pakasqa yachayta yachanaykichistan munani, ahinapi qankuna kikiykichis ama yachaysapaman tukuq kanaykichispaq. Israel runakunaq mana kasukuq k'ullu kasqankuqa manan wiñaypaqchu, aswanpas mana judío runakunaq hayk'achus qespichisqa kanankukamallan.

²⁶Chay hina kaqtinmi llapallan Israel runakunaqa qespichisqa kanqa. Diospa Simin Qelqan nin: “Sión llaqtamantan Qespichiqqa hamunqa, Jacobmantan Diosta mana manchakuq-kayta qechunqa.

²⁷Paykunawanmi rimanakusaq: Huchankuta pampachaspa”, nispa.

²⁸Allin willakuykunaman hinaqa Diospa awqanmi Israel runakunaqa kanku qankunaq allinniykichispaq. Chaywanpas Diosqa paykunata munakunraqmi, ñawpa taytankumantaraq akllakusqanrayku.

²⁹Diosqa runakunata akllakuspapas atiy qokuykunata qospapas yuyaykusqanta mana cambiaqmi.

³⁰Qankuna mana judío runakunan ñawpa tiempopiqa Diosta mana kasukurqankichischu, kunanmi ichaqa Israel runakuna mana kasukusqanku hawa qankunata Dios khuyapayasunkichis.

³¹Chay hinallataqmi, paykunaña kunan mana kasukuq kanku chaypas, Diosqa paykunata khuyapayallanqapunin, qankunata khuyapayasqasuykichisrayku.

³²Diosqa llapa runakunatan mana kasukuqpaq hap'irqan, llapallankuta khuyapayananpaq.

³³¡May hatunpunin Diospa qhapaq-kayninpas, yachayninpas, yuyayninpas! Yuyaykusqankunapas mana sut'inchay atinapunin, ruwasqankunapas mana entiendey atinapunin.

³⁴¿Pitaq Señor Diospa yuyaynintaqa reqsin? ¿Pitaq payta yuyaychaqninri?

³⁵¿Pitaq Señor Diosman ñawpaqta imatapas qorqan Dios payman kutichipunapaqri?

³⁶Tukuy imapas Diospa kamasqanmi, paymi hap'ishan, paypaqtaqmi kanpas. ¡Diosninchis wiñay-wiñaypaq hatunchasqa kachun! Amén.