Read Diospa Simin Qelqa ROMANOS 13 Bible Online

ROMANOS 13 - Diospa Simin Qelqa bible

ROMANOS 13

¹Kamachikuqkunataqa llapa runan kasukunan. Kamachikuy atiyqa Diospa qosqanmi, kamachikuqkunaqa Diospa churasqanmi.

²Chay hinaqa, pipas kamachikuqkunapaq k'ulluchakun chayqa, Diospa churasqan contran k'ulluchakun, ahinapin paykuna kikinkuman huchachayta chayachikunku.

³Kamachikuqkunaqa manan allin ruwaq runata manchachinanpaqchu, aswanpas mana allin ruwaq runata manchachinanpaqmi. Kamachikuqta mana manchakuspa kawsayta munanki chayqa, allinkaqta ruway, hinan kamachikuqqa “allinmi” nisunki.

⁴Payqa Diospa kamachisqantan ruwan qanpa allinniykipaq. Mana allinta ruwaspaykiqa manchakunaykin, payqa manan yanqapaqchu kamachikuqpaq churasqa kashan, atinmi muchuchiyta. Payqa Diospa kamachinmi, mana allin ruwaqta Diospa rantinpi muchuchinanpaq.

⁵Chayrayku, kamachikuqkunataqa kasukunanchispunin, manan muchuchinata manchakuspallachu, aswanpas conciencianchispi chanin kasqanta yachaspan.

⁶Chaymi qankunaqa contribuciontapas pagankichis. Kamachikuqkunaqa chay hinapin Diosta servinku, paypaq llank'aspallapuni.

⁷Pimanpas qonaykichis kaqtaqa qoychis: Contribución paganaykichis kaqtinqa pagapuychis, impuesto paganaykichis kaqtinqa pagapuychis, pitapas respetanaykichis kaqtinqa respetaychis, hatunchanapaq kaqtaqa hatunchaychis.

⁸Ama pimanpas ima manupas kaychischu, aswanpas qankunapura munanakuy manulla kaychis. Pipas runamasinta munakuqqa Diospa kamachikuy simintan hunt'anña.

⁹Chay kamachikuy simikunan nin: “Aman wasanchankichu, aman pitapas wañuchinkichu, aman suwakunkichu, [aman yanqa-qasi runamasiykita tumpankichu][2] aman munapayankichu”, nispa. Chay kamachikuykunapas wakin kamachikuykunapas hukllamanmi huñukun: “Runamasiykitan qan kikiykita hina munakunki, niq simiman”.

¹⁰Munakuqqa manan runamasinta ima mana allintapas ruwanchu, chayraykun munakuyqa kamachikuy simita hunt'ay.

¹¹Chaykunatan ruwanaykichis ima tiempopichus kasqaykichista reparaspa, puñuymanta rikch'arinaykichis tiempoñan. Kunanqa iñisqaykichis tiempomanta aswan sispapiñan Diospa qespichinasuykichis tiempoqa kashan.

¹²Tutaqa tukukapushanñan, ñan illarimushanña. Chayrayku tutayaqpi hina ruwasqanchiskunata wikch'upuspa k'anchaypi maqanakuna armakunata hap'isun.

¹³P'unchaypi hina allintapuni kawsasun. Ama machasunchu, ama hatun mikhuykunapi waqllispachu purisun, ama qhelli huchakunapichu purisun, ama viciokunapichu purisun, ama churanakusunchu, ama envidiakusunchu.

¹⁴Aswanpas p'achawan hina Señor Jesucristowan churakuychis. Amataq sonqoykichispa munasqankunataqa ruwaychisñachu.