Read Diospa Simin Qelqa ROMANOS 3 Bible Online

ROMANOS 3 - Diospa Simin Qelqa bible

ROMANOS 3

¹Chhaynaqa, ¿imapaqtaq judío runa kayqa valen? Qhari-kaynin señalasqa kasqanpas, ¿imapaqtaq valen?

²¡Imaymanapaqmi valen! Ñawpaqtaqa judío runakunamanmi Diosqa siminta hap'ichirqan.

³Wakin judío runakuna mana hunt'aqtinri, ¿imaynataq kanqa? ¿Paykuna hawachu Diosqa mana hunt'aq kanqa?

⁴¡Manapunin imaynamantapas! Diosqa cheqaq hunt'aqpunin llapa runaña llulla kashaqtinpas. Diospa Simin Qelqan nin: “Cheqaq rimaq kasqaykitan reqsisunkiku, Juzgasqa kaspaykipas atipankipunin”, nispa.

⁵Ñoqanchispa mana chanin-kayninchistaq Diospa chanin-kayninta aswan sut'itaraq rikuchin chayqa, ¿imanisunchistaq? ¿Mana chanin kaspachu Diosqa muchuchiwanchis? Runa hinallan kaytaqa rimani.

⁶¡Chayqa manan hinachu! Diosqa manataq chaninchu kanman chayqa, ¿imaynatataq payqa runakunata juzganman?

⁷Pipas ninman: Llullakusqaywanmi Diospa cheqaq-kayninta rikuchisaq pay hatunchasqa kananpaq nispa chayqa, ¿imanaqtintaq Diosqa huchasapata hina huchachawan?

⁸Chhayna kaqtinqa, ¿manachu nisunman: Mana allinkaqkunatayá ruwasun allinkaqkuna kananpaqqa, nispa? “Chay hinatan Pabloqa yachachishan” nispan wakinkuna llullakuspa tumpawanku. Ichaqa, chay hina yachachiqkunataqa Diosmi huchachanqa, ahinapunin chaninqa kanan.

⁹Chay hinaqa, ¿mana judío runakunamanta aswan allinchu ñoqanchis judío runakunaqa kanchis? ¡Manapunin hinachu! Ñan huchachanchisña judío runakunatapas mana judío runakunatapas llapallanku huchapi kashasqankuta.

¹⁰Diospa Simin Qelqan nin: “Manan pipas chanin ruwaqqa kanchu, manapunin ch'ullallapas kanchu.

¹¹Manan pipas entiendeq kanchu, manan ch'ullallapas Diosta maskhaqqa kanchu.

¹²Llapallanmi pantaykapunku, llapallanmi mana valeq kapunku. Manan pipas allinkaqta ruwaqqa kanchu, manapunin ch'ullallapas kanchu.

¹³Kicharayaq sepultura hinan kunkankuqa, qallunkuwanmi llullakuspa q'otunku, siminkumantan mach'aqwaypa venenon hinaraq lloqsimun,

¹⁴siminkuqa ñakashallanpunin k'arakllatapunin rimashan.

¹⁵Chakinkuqa usqhayllan runa wañuchiq phawarin,

¹⁶ñanninkupiqa wañuchinakuyllan qechunakuyllan.

¹⁷Thak kawsaytaqa manan yachankuchu.

¹⁸Manapunin hayk'aqpas Dios manchakuytaqa yachankuchu”, nispa.

¹⁹Ichaqa yachanchismi kamachikuy simiq tukuy nisqanqa kamachikuy simipi kaqkunapaq kasqanta, llapa runa upallananpaq, hinaspa tukuy runa Diospa huchachasqan kananpaq.

²⁰Kamachikuy simiq nisqankunata pipas hunt'aqtaqa manan Diosqa chaninpaqchu hap'inqa, aswanmi kamachikuy simiqa huchayoq kasqanchista reqsichiwanchis.

²¹Kunanmi ichaqa mana kamachikuy simillawan Diosqa chaninchayninta rikuchin, chaytataqmi kamachikuy simipas profetakunapas willanku.

²²Diosqa Jesucristopi iñisqankuraykun llapa iñiqkunataqa chaninchan. Llapa runapas paypaqqa kaqkamallan.

²³Llapallanmi huchallikurqanku, chaymi Diospa k'anchashaq qayllanmanta karupi kashanku.

²⁴Diosmi ichaqa runakunata khuyapayaspa mana imaraykulla chaninchan Jesucristo wañuspa kacharichisqanrayku.

²⁵Diosmi Jesucristota churarqan runakunarayku yawarninta hich'aspa wañunanpaq. Chayraykun payqa runakunata khuyapayaspa huchankuta pampachan. Chaytaqa yawarta hich'aspa wañusqanpi iñispan runakunaqa chaskinku. Chhaynapin Diosqa chaninchayninta rikuchin. Payqa pacienciayoq kaspanmi ñawpa tiempopi huchallikusqakunata hinallata qhawarqan.

²⁶Kunanmi ichaqa Diosqa mana hinallatachu qhawan, aswanmi chaninchayninta rikuchin, pay chanin kananpaq, hinallataq Jesuspi iñiqkunata chaninchaq kananpaqwan.

²⁷Chhaynaqa, ¿maytaq runaq alabakuyninri? ¡Manan kanñachu! ¿Mayqen kamachikuytaq chinkachipun? Manan kamachikuy simita hunt'aywanchu, aswanpas iñiywanmi.

²⁸Chhaynaqa, rikunchismi runaqa iñiywan chaninchasqa kasqanta, manan kamachikuy simiq nisqanta hunt'aywanchu.

²⁹Diosqa, ¿judío runakunaq Diosnillanchu? ¿Manachu mana judío runakunaqpas Diosnillantaq? Arí, Diosqa llapa runaq Diosninmi.

³⁰Manan wak Diosqa kanchu. Pay sapallan Diosmi, qhari-kaynin señalasqakunatapas mana señalasqakunatapas iñiyrayku chaninchaqqa.

³¹Chhaynaqa, ¿iñiywanchu kamachikuy simita mana valeqman tukuchipunchis? ¡Manan hinachu! Aswanmi kamachikuy simitaqa allinta sayachinchis.