Read Diospa Simin Qelqa ROMANOS 6 Bible Online

ROMANOS 6 - Diospa Simin Qelqa bible

ROMANOS 6

¹Chay hinari, ¿imanisunchistaq? ¿Huchallapipunichu kashasun aswan-aswanta Dios khuyapayawananchispaq?

²¡Manapunin imaynamantapas! Ñoqanchisqa huchapaq wañusqañan kanchis, ¿imaynataq huchallikuspallaqa kawsashasunman?

³¿Manachu yachankichis llapallanchis Jesucristowan hukllachasqa kananchispaq bautizasqa kaqkunaqa wañuyninpi bautizasqa kasqanchista?

⁴Bautizasqa kaspanchismi Cristowan kuska wañuyninpi p'ampasqa kanchis. Imaynan Yayaqa hatun atiyninwan Cristota wañusqanmanta kawsarichimpurqan, chay hinallatataqmi ñoqanchistapas mosoq kawsaypi purinanchispaq kawsarichiwarqanchis.

⁵Cristowan kuska wañuspachus paywan hukllachakurqanchis chayqa, cheqaqtapunin paypa kawsarimpusqanpi paywan kuska hukllachasqa kasunchis.

⁶Yachanchismi ñawpa kawsayninchisqa Cristowan kuska chakatasqa kasqanta, huchallikuylla munaq-kayninchis atipasqapuni kananpaq, ahinapi manaña astawan huchaq kamachin kananchispaq.

⁷Pipas wañunña chayqa, huchamanta kacharichisqañan.

⁸Cristowanchus wañurqanchis chayqa, creenchismi paywan kawsananchistapas.

⁹Yachanchismi, Cristoqa wañusqanmanta kawsarimpuspa manaña wañunanta. Wañuyqa manañan paytaqa munaychakunqañachu.

¹⁰Cristoqa huk kutillatan huchapaq wañurqan tukuy huchata atipananpaq, kawsaspataq Diosllapaqña kawsashan.

¹¹Ahinallataq qankunapas huchapaqqa wañusqapuniña kasqaykichista yuyaychis, Diospaqtaq ichaqa Señorninchis Jesucristowan hukllachasqa kawsashasqaykichista yuyaychis.

¹²Chayrayku, huchaqa amaña wañuq aycha cuerpoykichispi munaychakuchunñachu, cuerpoq munasqanta amaña kasunaykichispaq.

¹³Amataq cuerpoykichistapas huchaman hap'ichiychischu mana chanin kaqkunata ruwananpaqqa, aswanpas Diosman wikch'uykakapuychis wañusqamanta kawsarimpuq runa hina, llapa cuerpoykichista Diosman hap'iykachiychis chaninkaqta ruwananpaq.

¹⁴Huchaqa manan qankunata atipasunkichisñachu, manan kamachikuy simipiñachu kashankichis, aswanpas Diospa khuyapayakuyninpiñan kashankichis.

¹⁵Chay hinari, ¿imanasuntaq? Manataq kamachikuy simipiñachu kashanchis, aswanpas Diospa khuyapayakuyninpitaq chayqa, ¿huchallikushallasunchu? ¡Manapunin imaynamantapas!

¹⁶Qankunaqa allintan yachankichis, pipas kamachi kananpaq huk runaman k'askaykakapun chayqa, chay runaq kamachinmi kapun, paytan kasunpas. Chay hinan, huchata kasuqqa wañunqa, Diosta kasuqtaq chaninchasqa kanqa.

¹⁷Ichaqa Diosman gracias kachun, qankunan ñawpaqqa huchaq kamachin karqankichis, kunantaqmi tukuy sonqoña kasukushankichis, imayna yachachikuytachus chaskisqaykichisman hina.

¹⁸Kaqllataq huchaq kamachinmanta kacharichisqaña kaspa, qankunaqa chanin kawsaypa kamachinña kashankichis.

¹⁹Runakuna hinallan rimani, pisitaraq entiendeq runalla kasqaykichisrayku. Chhaynaqa, imaynan llapa cuerpoykichista qhelli kawsayman millay-kayman tukuy mana allinkaqta ruwananpaq qoykapurqankichis, chay hinallataq kunanpas llapa cuerpoykichista chanin kawsay ruwayman qoykapuychis, Diosllapaqña ch'uyatapuni kawsanaykichispaq.

²⁰Huchaq kamachin kashaspaykichisqa, chanin-kaymantaqa libren karqankichis.

²¹Chay ruwasqaykichismanta kunan p'enqakunkichis, chayri, ¿ima allintataq chay kawsaypi tarirqankichis? Aswanpas chaykunaqa wañuyllamanmi q'epiykun.

²²Kunanmi ichaqa huchamanta kacharichisqa kaspa Diospa kamachinña kashankichis, ahinapin Diospaq t'aqasqapuni kaspa wiñay kawsayniyoq kashankichis.

²³Huchaq pagayninqa wañuymi, Diospa qokuyninmi ichaqa Señorninchis Jesucristopi wiñay kawsay.