Read Diospa Simin Qelqa 1 CORINTIOS 14 Bible Online

1 CORINTIOS 14 - Diospa Simin Qelqa bible

1 CORINTIOS 14

¹Munakuq-kaytapuni munaychis, hinallataq aswan allinkaq atiy qokuykunatapuni Santo Espiritumanta chaskiyta munaychis, aswantaqa profetizayta.

²Mana yachasqa simikunata rimaqqa manan runamanchu riman, aswanpas Diosmanmi riman, manan paytaqa pipas entiendenchu, payqa espiritunpin riman pakasqa yachaykunata.

³Profetizaqmi ichaqa runakunaman riman, paykuna iñiypi wiñanankupaq, kallpachakunankupaq, sonqochakunankupaqwan.

⁴Mana yachasqa simi rimaqqa pay kikintan wiñachikun, profetizaqmi ichaqa iglesiata iñiypi wiñachin.

⁵Ñoqaqa munayman llapaykichis mana yachasqa simikunata rimanaykichistan, ichaqa profetizanaykichistan astawanqa munayman. Profetizaqmi aswan allin mana yachasqa simikunata rimaqmantaqa, manachus chay mana yachasqa simita t'ikraq huñunakuypi llapan iglesiata yanapananpaq kan chayqa.

⁶Chay hinaqa, wawqe-panaykuna, qankunaman chayamuspa mana yachasqa simipi rimapayaykichisman, manataq Diospa rikuchiwasqantachu willaykichisman, manataq imatapas reqsichiykichismanchu, manataq qankunaman profetizaymanchu, manataq imatapas yachachiykichismanchu chayqa, ¿ima allintaq qankunapaq kanman?

⁷Qhawarisun taki tocanakunata, qenatapas arpatapas, chay tocanakuna mana tononpichu waqanman chayqa, ¿imaynapitaq yachasunman mayqen takitachus qenapas arpapas tocashasqanta?

⁸Awqa-tinkuypaq corneta tocaq mana sut'itachu tocanman chayqa, ¿pitaq maqanakuypaq wakichikunman?

⁹Chay hinallataqmi qankunawanpas kanman, mana yachasqa simipi manachus sut'ita rimawaqchis chayqa, manan yachankumanchu ima nishasqaykichistapas, ch'usaqman rimasqa hinan rimasqaykichisqa kanman.

¹⁰Imaymana rimaykunan kay pachapiqa kan, ichaqa llapanmi chay rimaykunaqa entiendesqakama.

¹¹Huk runaq rimapayawasqan simita mana entiendeymanchu chayqa, wak simi rimaqmi chay runapaq kayman, paypas ñoqapaq wak simi rimaqmi kanman.

¹²Chay hinallataq qankunapas Santo Espirituq atiy qokuyninkunata chaskiytapuni munaspa iglesiata astawan wiñachinapaq kaq ruwaykunata ruwaychis.

¹³Chayrayku, pipas mana yachasqa simipi riman chayqa, Diosmanta mañakuchun chay simita sut'inchananpaq.

¹⁴Mana yachasqa simipi Diosmanta mañakuspayqa espirituypin mañakushani, yuyayniypitaq ichaqa mana imatapas entiendenichu.

¹⁵Chay hinaqa, ¿imatataq ruwasaq? Espirituywan mañakusaq, yuyayniywanpas mañakullasaqtaq, espirituywan takisaq, yuyayniywanpas takillasaqtaq.

¹⁶Espiritullaykiwan Diosta yupaychashaqta manaraq allinta yachaq runa uyarisunkiman chayqa, ¿imaynataq chay runaqa mana entiendespa “amén” ninman, Diosman graciasta qoshaqtiyki?

¹⁷Arí, qanqa allintan mañakuyniykipi Diosman graciasta qonki, chay uyariqniyki runatan ichaqa iñiyninpi mana yanapankichu.

¹⁸Diosmanmi graciasta qoni llapaykichismanta aswantaraq mana yachasqa simikunapi rimasqaymanta.

¹⁹Iglesiaq huñukuyninpin ichaqa phisqa simillata rimayta munani allin entiendesqa kaqta, hukkunatapas yachachinaypaq, mana chayqa yanqapaqchá chunka waranqa simitapas rimayman mana yachasqa rimaykunapiqa.

²⁰Wawqe-panaykuna, amaña wawakuna hinaqa yuyaychischu, aswanpas mana allin-kaypaq wawa hinaqa kaychis, yuyaykuyniykichispi ichaqa allin takyasqa runa kaychis.

²¹Kamachikuy simipin qelqasqa kashan: “Kay runakunatan rimapayachisaq mana yachasqanku simi rimaq runakunawan, wak llaqta runakunaq rimasqanwan, chaywanpas paykunaqa manan kasuwanqakuchu, ninmi Señorqa”, nisqa.

²²Chay hinaqa, mana yachasqa simikunapi rimayqa huk señalmi Diospi mana iñiq runakunapaq, ichaqa manan iñiq runakunapaqchu. Profetizaymi ichaqa huk señal hina iñiq runakunapaq, manataq mana iñiq runakunapaqchu.

²³Iglesia huñukuypi qankuna llapallaykichis mana yachasqa simikunapi rimashaqtiykichis, haykumunkuman mana iñiqkunapas otaq manaraq allinta yachaq iñiqkunapas chayqa, ¿manachu “waq'ayarqosqakun chay runakunaqa” nisunkichisman?

²⁴Ichaqa llapaykichis profetizashaqtiykichis haykumunman mana iñiqkunapas otaq manaraq allinta yachaq iñiqkunapas chayqa, huchankutan reqsikunqaku, paykuna kikinkutaq kawsayninkuta t'aqwikunqaku, llapaykichispa rimasqaykichista uyarispanku.

²⁵Ahinapin sonqonkupi pakasqa kaqkunapas yachasqa kanqa. Qonqoriykukuspa Diosta yupaychaspankun ninqaku: Cheqaqtapunin Diosqa qankunawan kashan, nispa.

²⁶Chay hinaqa, wawqe-panaykuna, huñukuqtiykichisqa wakinmi takin, wakinmi yachachin, wakinmi Diospa rikuchisqanta sut'inchan, wakinmi mana yachasqa simipi riman, wakinmi chay rimasqata t'ikran. Tukuy chaykunatapas ruwaychis iñiypi iglesiata wiñachinapaq.

²⁷Mana yachasqa simipi rimaqkuna kaqtinqa, iskay runakunalla rimachunku, mana chayqa kinsakamapas rimachunku, ichaqa ch'ulla-ch'ullamanta. Huktaq chay simikunata t'ikrachun.

²⁸Manachus mana yachasqa simi t'ikraq kanman chayqa, amaña iglesiapi rimachunchu, aswanpas pay kikillanpaq Diospaqwan rimachun.

²⁹Chay hinallataq profetakunapas kan chayqa, iskaypas kinsapas willachunku, wakintaq rimasqankuta chaninchachunku.

³⁰Chaypi tiyashaq runaman imatapas Dios rikuchispa sut'inchanman chayqa, rimashaq runa upallachun.

³¹Ahinapin llapaykichis ch'ulla-ch'ullamanta profetizawaqchis, llapan uyariqkuna yachaqanankupaq kallpachakunankupaqwan.

³²Profetakunaqa Santo Espirituq qosqan qokuykunatan cuidakuspa rimanan.

³³Diosqa manan ch'aqwa hatarichiq Dioschu, aswanpas thak kawsay qoq Diosmi. Imaynan llapa iglesiakunaq huñukuyninkupi ruwanku hina,

³⁴warmiykichisqa huñukuypi ch'inlla kachunku, paykunaqa manan rimanankuchu, aswanpas kasukuqmi kananku, Diospa kamachikuy siminman hina.

³⁵Imatapas yachayta munaspaqa, wasipiña qosankuta tapukuchunku. P'enqaymi iglesiaq huñukuyninpi warmiq rimananqa.

³⁶Icha, ¿Diospa siminqa qankunawanchu qallarirqan? ¿Qankunallachu chaskirqankichispas?

³⁷Pipas profeta kasqantapas Santo Espirituq yuyaychasqan kasqantapas yuyan chayqa, qankunaman kay qelqamusqay qelqaqa Señorpa kamachikuyninkuna kasqanta yachachun.

³⁸Kay kamachikuyta mana chaskinchu chayqa, aman paytapas chaskinkichischu.

³⁹Chay hinaqa, wawqe-panaykuna, Diospa simin profetizayta tukuy sonqo munaychis, amataq mana yachasqa simipi rimaqkunatapas hark'aychischu.

⁴⁰Ichaqa tukuy imatapas chaninninpi ruwaychis, maychus ruwanaman hinapuni.