Read Diospa Simin Qelqa 1 CORINTIOS 3 Bible Online

1 CORINTIOS 3 - Diospa Simin Qelqa bible

1 CORINTIOS 3

¹Chaywanpas, wawqe-panaykuna, manan Diospa Espiritunpa pusasqan runakunaman hinachu rimapayarqaykichis, aswanpas rimapayarqaykichisqa aychaq ruwayninkunaman hina puriqkunamanmi, Cristopi chayllaraq iñiqkunaman hina.

²Wawaman lecheta ukyachiq hinallan facilkaqllata yachachirqaykichis, qankunaqa manaraqmi mikhuyta atirqankichischu. Kunanpas manapuniraqmi mikhuyta atishankichischu,

³aychaq munayninman hina puriq kasqaykichisrayku. Qankuna envidianakunkichis, churanakunkichis chayqa, aychaq munasqanman hinan purishankichis, Diospi mana iñiq runakuna hinallan ruwashankichis.

⁴Qankunapuran ninakunkichis: Ñoqaqa Pabloq t'aqanmi kani, nispa. Ñoqaqa Apolospa t'aqanmi kani, nispa. Chay hinata ninakushaspaqa, ¿manachu Diospi mana iñiq runakuna hina kashankichis?

⁵Chay hinaqa, ¿pitaq Apolosri? ¿Pitaq Pablopas? Ñoqaykuqa Diospa kamachinkunallan kayku, ñoqayku hawataq qankunaqa Señorpi iñirqankichis. Sapankaykun Señorpa qowasqanku llank'anapi llank'ayku.

⁶Ñoqan tarpurqani, Apolostaq qarparqan, Diosmi ichaqa wiñachirqan.

⁷Chay hinaqa, manan tarpuqpas qarpaqpas imapaschu, aswanpas Diosmi, paymi tarpusqata wiñachin.

⁸Tarpuqpas qarpaqpas kaqkamallan, sapankamantaqmi Diosqa llank'asqanman hina pagapunqa.

⁹Ñoqaykuqa Diospa llank'aysiq-masinkunan kayku, qankunataq Diospa llank'ashasqan chakra hina kankichis, Diospa sayarichishasqan wasi hina kankichis.

¹⁰Diospa qowasqan yachaywanmi allin albañil hina teqsita churarqani, huktaq chay patapi perqashan. Ichaqa sapanka qhawakuchun imaynatachus chay patapi perqashasqanta.

¹¹Manan pipas wak teqsitaqa churayta atinmanchu churasqaña kashaqtinqa, chay teqsiqa kikin Jesucriston.

¹²Pipas chay teqsi patapiqa perqanmanmi qoriwanpas, qolqewanpas, umiñawanpas, k'ulluwanpas, q'achuwanpas, ichhuwanpas,

¹³ichaqa sapankaq ruwasqanmi taripay p'unchaypiqa rikuchisqa kanqa. Chay p'unchaymi, Diosqa ninawan probanqa imaynatachus sapankaq ruwasqanta.

¹⁴Chay teqsi patapi piqpa perqasqantachus nina mana ruphanqachu chayqa, chay runaqa premiontan chaskinqa.

¹⁵Piqpa ruwasqantachus ruphapunqa chayqa, lliwtan chinkachipunqa. Chaywanpas payqa qespichisqan kanqa, ichaqa nina ukhumanta suchurqamuq hinallaña.

¹⁶¿Manachu yachankichis qankunaqa Diospa tiyanan wasi kasqaykichista? ¿Manachu yachankichis qankunapi Diospa Espiritun tiyashasqantapas?

¹⁷Pipas Diospa tiyanan wasita thuninqa chayqa, Diosmi payta ch'usaqyachinqa, Diospa wasinqa payllapaqpunin, chay wasin qankunaqa kankichis.

¹⁸Ama pipas pay kikinta q'otukuchunchu. Pipas kay pachaq yachayninwan yachayniyoq kasqanta yuyan chayqa, mana ima yachaq hina kachun, cheqaq yachayniyoq kananpaq.

¹⁹Kay pacha yachayqa mana yuyayniyoq kaymi Diospaqqa. Diospa Simin Qelqan nin: “Diosmi yachaysapakunataqa kikin yuyaysapa-kayninkupi toqllapi hina hap'irparin”, nispa.

²⁰Nillantaqmi: “Señor Diosqa yachanmi yachaysapakunaq yuyayninqa mana imapaq serviq kasqanta”, nispa.

²¹Chay hinaqa, ama pipas runakunata qatikuspaqa hatunchakuchunchu. Tukuy imaymanapas qankunaqmi:

²²Pablopas, Apolospas, Pedropas, kay pachapas, kawsaypas, wañuypas, kunankaqpas, hamuqkaqpas. Tukuy chaykunapas qankunaqmi,

²³qankunataq Cristoq kankichis, Cristotaq Diospa.