Read Diospa Simin Qelqa 1 CORINTIOS 6 Bible Online

1 CORINTIOS 6 - Diospa Simin Qelqa bible

1 CORINTIOS 6

¹Mayqenniykichispas huk iñiqmasinwan ima hawallapas churanakuspaqa, ¿imanaqtintaq Diospi mana iñiq juezkunaman quejakuq phawarinkichis? ¿Manachu Diospi ch'uya iñiq runakunaman willakunaykichis?

²Icha, ¿manachu yachankichis Diospi iñiqkunaqa kay pachata juzgananta? Qankunataq kay pachata juzgankichis chayqa, ¿manachu atinkichis chay huch'uy kaqkuna juzgayta?

³¿Manachu yachankichis angelkunatawanpas juzgananchista? ¿Chaychu mana atisunman kay pachapi kaqkuna juzgayta?

⁴Kay pacha kaqkunamanta churanakushaspaykichisqa, ¿imanaqtintaq Diospi mana iñiq juezkunamanqa rinkichis?

⁵Chaytaqa nini qankunaq p'enqakunaykichispaqmi. ¿Manachu qankuna ukhupi hukllapas yuyayniyoq kan, iñiqpura ch'aqwayniykichista juzgay atiq?

⁶Qankunataq ichaqa iñiqmasintin ch'aqwaspa mana iñiq juezkunamanraqtaq quejakunkichis

⁷Chay hinaqa, qankunapura quejanakusqaykichisqa sinchi p'enqaymi. Aswan allinmi mana chanin-kayta muchukuyqa, aswan allinmi qechupakuqkunaman qopuypas.

⁸Qankunataq ichaqa iñiq-masiykichistaraqtaq mana chaninta ruwankichis, paykunamantataq qechunkichispas.

⁹¿Manachu yachankichis mana chanin runakunaqa Diospa qhapaqsuyunman mana haykunankuta? Ama pantaychischu. Qhelli huchapi puriqkunapas, ídolo yupaychaqkunapas, wasanchaqkunapas, warmiman tukuqkunapas, qharipura t'inkikuqkunapas,

¹⁰suwakunapas, payllapaq kananta munaqkunapas, machaqkunapas, yanqa tunpaqkunapas, ch'achukunapas, Diospa qhapaqsuyunmanqa manan haykunqakuchu.

¹¹Chay hinan qankunapas wakinniykichisqa karqankichis, chaywanpas ñan Señor Jesuspa sutinpi, Diosninchispa Espiritunpa atiyninpiwan huchamanta mayllisqaña, ch'uyanchasqaña, chaninchasqaña kankichis.

¹²Runaqa ninmi: Tukuy imatapas munaspaqa ruwallaymanmi, nispa. Arí, hinapunin chayqa, ichaqa manan llapanchu allinninchispaq kanman. Tukuy ima munasqaytapas ruwallaymanmi, ichaqa manan mayqenwanpas atipachikuymanchu.

¹³Runaqa ninmi: Wiksaqa mikhuypaqmi, mikhuypas wiksapaqtaqmi, nispa. Arí, hinapunin chayqa, ichaqa Diosmi iskayninta ismuchipunqa. Cuerpoqa manan qhelli huchapi purinapaqchu, aswanpas Señorta servinapaqmi, Señortaq cuerpota uywan.

¹⁴Señor Jesusta kawsarichimpuq Diosmi ñoqanchistapas atiyninwan kawsarichimpullawasuntaq.

¹⁵¿Manachu yachankichis cuerpoykichisqa Cristowan hukllachasqa kasqanta? Chay hinaqa, ¿Cristoq cuerponmanta t'aqaspaychu rabona warmiman hukllachasaq? ¡Manapunin imaynamantapas!

¹⁶Icha, ¿manachu yachankichis pipas rabona warmiwan puñuqqa iskayninku ch'ulla cuerpolla kasqankuta? Diospa Simin Qelqan nin: “Iskayninkun huk cuerpollaña kanqaku”, nispa.

¹⁷Pipas Señorwan hukllachakuqmi ichaqa, espiritupi paywan hukllachasqa kapun.

¹⁸Qhelli huchapi puriymanta ayqeychis. Ima huchatapas huk runa ruwan chayqa, manan cuerpon contrachu ruwan, qhelli huchapi puriqmi ichaqa kikin cuerpon contra huchallikun.

¹⁹Icha, ¿manachu yachankichis Diosmanta chaskisqaykichis cuerpoykichisqa Santo Espirituq wasin kasqanta? ¿Manachu yachankichis Santo Espiritupas qankunapi tiyasqanta? Qankunaqa manan cuerpoykichispa dueñonchu kankichis.

²⁰Diosmi preciowan rantirqasunkichis. Chayrayku Diosta yupaychaychis cuerpoykichiswan.