Read Diospa Simin Qelqa 2 CORINTIOS 1 Bible Online

2 CORINTIOS 1 - Diospa Simin Qelqa bible

2 CORINTIOS 1

¹Diospa munayninrayku Jesucristoq apostolnin ñoqan Pablon, wawqe Timoteopiwan qelqamuni Corinto llaqtapi kashaq Diospa iglesianman, Acaya hap'iynintinpi kashaq ch'uya iñiq llapallan wawqe-panakunamanwan:

²Dios Yayanchis, Señor Jesucristopiwan anchata khuyapayasunkichis thak-kaynintapas qosunkichis.

³Yupaychasqa kachun Señorninchis Jesucristoq Yayan Diosqa, payqa khuyapayakuq Yayan, tukuy imapi sonqochakuq Diostaq.

⁴Diosmi tukuy llakikuyniykupi sonqochawanku, ñoqaykupas ima llakipiña kaqkunatapas Diospa sonqochawasqanku sonqochaywan sonqochanaykupaq.

⁵Imaynan Cristowan hukllachasqa kaspa sinchita ñak'ariyku, chay hinallataqmi Cristorayku Diosqa anchata sonqochawanku.

⁶Ñoqayku ñak'ariyku chayqa, qankunaq sonqochasqa qespichisqa kanaykichispaqmi, hinallataq sonqochasqa kayku chayqa, qankunaq sonqochasqa kanaykichispaqmi, ahinapi ñak'arisqaykuta hina ñak'arispaykichis pacienciakuspa allinta sayanaykichispaq.

⁷Qankunapiqa anchatapunin confiakushayku, yachaykun imaynan ñak'ariq-masiyku kankichis, chay hinallataq sonqochasqa-masiyku kanaykichistapas.

⁸Wawqe-panaykuna, Asia provinciapi sinchi llakipi kasqaykumantaqa yachanaykichistapunin munayku. Ahinaqa sinchi llakiq ñit'isqanmi karqayku, chaymi manaña kawsanaykutapas yuyarqaykuchu.

⁹Ñoqayku kikiykun wañuchinapaq huchachasqa kasqaykuta hinaña yuyasharqayku, ichaqa chaymi yachachiwarqanku ama ñoqayku kikiykuman hap'ipakunaykupaq, aswanpas wañusqakunata kawsarichimpuq Diosllaman hap'ipakunaykupaq.

¹⁰Diosmi chay hina manchay wañuymanta qespichiwarqanku, hinaspa qhepamanpas qespichiwanqaku, chaymi suyakushayku Diosllapuni qespichiwanankuta,

¹¹qankunapas Diosmanta ñoqaykupaq mañapuwaqtiykikuqa. Askha runan ñoqaykupaq Diosmanta mañakunqaku, hinan Diosqa saminchawanqaku, chaymi askha runa Diospa saminchawasqankumanta graciasta qonqaku.

¹²Ñoqaykuq kusikuyniykuqa kaymi: Concienciaykun willawanku ch'uya sonqo-kaywan cheqaq sonqo-kaypiwan kay pachapi allin purisqaykuta, astawanqa qankunawan imaynatachus purisqaykuta, ichaqa manan runaq yachayninwanchu, aswanpas Diosmi khuyapayakuyninpi yanapawarqanku allinta purinaykupaq.

¹³Qankunaman qelqamusqaykuqa leenaykichispaq entiendenaykichispaq hinallan, kunanqa wakillantaraqmi entiendewankiku.

¹⁴Ichaqa munanin hunt'asqatapuni entiendewanaykichista, ahinapin Señor Jesús kutimunan p'unchaypi qankunaqa ñoqaykumanta alabakunkichis, imaynan ñoqaykupas qankunamanta alabakusaqku hinata.

¹⁵Chay hinata yuyaykuspaymi, ñawpaqta qankuna waturikuq hamuyta munarqani, kay iskaykaq kutipi qankunata kallpachaykunaypaq.

¹⁶Ñoqaqa yuyaykurqanin Macedoniata riq hina qankunata watukuyta, kaqllataq Macedoniamanta kutimuspaypas qankunata watukuyta. Chaymantataq Judeaman riqtiy yanapaykuwanaykichista.

¹⁷Ñoqari, ¿hawan-ukhunta yuyaykuspachu chayta ruwarqani? Icha, ¿qankuna creenkichischu mana iñiq runa hina yuyaykuq kasqayta? Mana iñiqkunallan ninku: “Arí, arí” nispa, chaymantaqa: “Manan, manan”, nispañataq.

¹⁸Diosqa hunt'aqmi, paymi yachan qankunaman: “Arí”, nispaykuqa, manañan: “Manan”, niyta atiykumanchu.

¹⁹Ñoqaqpas Silvanoqpas Timoteoqpas qankunaman willasqayku Diospa Churin Jesucristoqa manapunin “arí” nishaspaqa, manan, “mana” ninmanchu. Aswanpas Diosqa Cristowanmi “arí”, nishallanpuni.

²⁰Diospa llapa prometesqankunaqa Jesucristopin hunt'akun, chayraykun Diosta yupaychaspaqa Jesucristoq sutinpi “amén”, ninchis.

²¹Diosmi qankunatapas ñoqaykutapas Cristowan hukllachaspa allinta takyachiwanchis, paypaqmi akllawarqanchispas.

²²Hinaspa paypaña kasqanchista rikuchinanpaq sellowarqanchis,[1] Santo Espiritutataq sonqonchispi churawarqanchis, chaskinanchis señal kananpaq.

²³Almay hawan Diospa ñawpaqenpi sut'ita rimarini, paymi yachan, qankunata mana llakichinayrayku Corinto llaqtata manaraq hamusqayta.

²⁴Iñiyniykichispiqa allin takyasqañan kashankichis, chaymi iñiyniykichispi mana kamachikuytachu munayku, aswanpas kusikunaykichispaqmi yanapaykuyta munayku.