Read Diospa Simin Qelqa 2 CORINTIOS 10 Bible Online

2 CORINTIOS 10 - Diospa Simin Qelqa bible

2 CORINTIOS 10

¹Ñoqa Pablon, Cristoq llamp'u sonqo, munakuq sonqo kasqanrayku niykichis: Ñoqas qankunawan kashaspa huch'uyyaykukuni, qankunamanta karupi kashaspataqsi mana manchakuspa rimani.

²Chayraykun valekuykichis, qankunaman watukuq hamuqtiyqa amayá k'arakta rimachiwankichischu. Pikunachus runa yuyayman hina purisqaykuta huchachawaqniykunataqa k'araktapunin nisaq.

³Runalla kayku chaypas, manan mana iñiyniyoq runa hinachu maqanakuyku.

⁴Maqanakunayku armakunaqa manan kay pachaq arman hinachu, aswanpas chaykunaqa Diospa qowasqanku atiyniyoq armakunan, allin pukarakunata thuninapaq.

⁵Ahinatan pantasqa yuyaykuykunatapas Diospa yachayninta hark'aq tukuy hatunchakuykunatapas thuniyku. Hinallataq runakunaq tukuy yuyaynintapas atipaspa Cristoman kasuchiyku.

⁶Qankuna hunt'asqata kasukuqtiykichismi, llapa mana kasukuqkunata muchuchinaykupaq listo kashayku.

⁷Qankunaqa rikch'aynillantan imatapas qhawankichis. Pipas sut'ita yachakun Cristoq kasqanta chayqa, yachanallantaqmi imaynan paypas Cristoq kashan, chay hinallataq ñoqaykupas Cristoq kasqaykuta.

⁸Atiyniykumanta aswantapuniraq hatunchakuni chaypas, manan imamantapas p'enqakunichu. Señorqa chay atiyta qowarqanku qankunata iñiypi wiñachinaykupaqmi, manan qankunata urmachinaykupaqchu.

⁹Manan munanichu: Pabloqa cartankunawanmi manchachikun, nispa niwanankutaqa.

¹⁰Hukkunan ninku: Cartankunallapin riman phiñata, sinchi k'arakta, pay kikinwan tupasqataq ichaqa mana kasuylla, rimayninpas mana kasunapaq hinallan, nispanku.

¹¹Chay hina rimaq runaqa allinta yachachun, imaynan cartakunata qelqamuspa nimurqayku, chay hinallatataqmi qankunaman chayamuspaykupas ruwasaqku.

¹²Paykuna kikinkuta hatunchakuq wakin runakunawanqa manan kuskachakuytapas paykunawan yupasqa kaytapas atiykumanchu. Paykunaqa kikinkuta tupukuspankun, paykunapura kuskachakuspankutaq, mana yuyayniyoq kapunku.

¹³Ñoqaykuqa iman kaqllamantan hatunchakusaqku, may cheqastachus Diosqa rikuchiwarqanku llank'anaykupaq chayllamantan hatunchakusaqku, qankunapas chay llank'anayku ukhupin kashankichis.

¹⁴Chayrayku, qankunaman Cristomanta allin willakuykunata willanaykupaq hamuspaykuqa, Diospa rikuchiwasqanku cheqasllapin llank'arqayku.

¹⁵Manan hukkunaq llank'asqanwanchu hatunchakuyku, aswanpas suyashaykun iñiyniykichis wiñaqtin qankuna ukhupi aswanta llank'anaykuta, ichaqa llank'anayku cheqaskunallapi.

¹⁶Chaymantataq qankunamanta aswan haqayneqkunakamaraq Cristomanta allin willakuykunata willamusaqku, manan hukpa llank'asqanman haykuspachu, manataq hukpa ruwasqanpi hatunchakuspachu.

¹⁷Qelqan nin: “Hatunchakuyta munaqqa Señor Diospa ruwasqanwan hatunchakuchun”, nispa.

¹⁸Pay kikinta hatunchakuq runaqa manan allinpaq qhawasqachu, aswanpas Señorpa hatunchasqan runan allinpaq qhawasqaqa.