Read Diospa Simin Qelqa 2 CORINTIOS 13 Bible Online

2 CORINTIOS 13 - Diospa Simin Qelqa bible

2 CORINTIOS 13

¹Kunanwanqa kinsa kutitañan watukamusqaykichis. Yuyariychis: “Iskay otaq kinsa testigokunaq rimarisqanwanmi ima huchachaypas chaninchakunqa”, nisqata.

²Iskaykaq kutipi watukamuspaymi huchallikuqkunata anyarqani, paykunatan kunanpas karupi kashaspay wakmanta anyamuni, hinallataq wakinkunatapas. Huktawan hamuspayqa manan paykunataqa hinallatachu qhawasaq.

³Chaymi qankuna yachankichis ñoqata Cristo rimachiwasqanta, chaytapunitaqmi maskhasharqankichispas. Cristoqa manan qankunapaq pisi kallpachu, aswanpas qankunapin atiyninta rikuchin.

⁴Arí, pisi kallpa hinan chakatasqa karqan, ichaqa Diospa atiyninwanmi kawsashan. Ñoqaykupas Cristowan hukllachasqa kaspan pisi kallpa kayku, ichaqa Diospa atiyninwanmi paywan kawsasaqku qankunata yanapanaykupaq.

⁵Qankuna kikiykichista t'aqwikuychis allinpunichus iñiypi kashasqaykichista, arí, qankuna kikiykichista reqsikuychis. ¿Manachu qankuna kikiykichis yachankichis Jesucristo qankunapi kashasqanta? Diospa mana chaskisqan kaspallachá manaqa yachawaqchischu.

⁶Ichaqa munanin ñoqaykuqa Diospa chaskisqan kasqaykuta yachanaykichista.

⁷Diosmantataq mañakuyku ama ima mana allintapas ruwanaykichispaq, manan ñoqayku allinpaq hap'isqa kanaykupaqchu, aswanpas qankuna allinkaqta ruwanaykichispaqmi, manan imananpaschu Diospa mana chaskisqan hinaña kayku chaypas.

⁸Manan imatapas ruwayta atiykumanchu cheqaq-kaypa contranpiqa, aswanpas cheqaq-kaypa allinnillanpaqpunin.

⁹Chayraykun pisi kallpa kaspaykupas qankuna kallpasapa kaqtiykichis kusikuyku. Hinaspa Diosmanta mañakushayku hunt'asqa-kayman chayanaykichispaq.

¹⁰Kay cartatan qelqamuykichis manaraq hamushaspay, chayman chayamuspa Señorpa atiy qowasqanwan amaña k'arak simikunawan qankunata ninaypaq. Señorqa chay atiyta qowarqan qankunata iñiypi wiñachinaypaqmi, manan qankunata urmachinaypaqchu.

¹¹Chay hinaqa, wawqe-panaykuna, kusikuychis. Kawsayniykichispi hunt'asqa-kayta munaychis, yuyaychasqayta hap'ikuychis, huk sonqolla kawsaychis, thak-kaypi kawsaychis, hinan thak-kayta qowaqninchis munakuwaqninchis Dios qankunawan kashanqa.

¹²Hukkuna hukkunawan ch'uya much'aykuywan napaykunakuychis.

¹³Iñiypi llapa wawqe-panakunan napaykamusunkichis.

¹⁴Señor Jesucristoq saminchaynin, Diospa munakuynin, Santo Espirituq yanapayninpas llapallaykichiswan kachun.