Read Diospa Simin Qelqa 2 CORINTIOS 6 Bible Online

2 CORINTIOS 6 - Diospa Simin Qelqa bible

2 CORINTIOS 6

¹Chaymi Diospa llank'ananpi llank'aysikuq kaspayku, qankunata valekuykiku Diospa sumaq sonqo-kayninta ama pisichanaykichispaq.

²Diosmi nin: “Chaskina tiempopin uyarirqayki, qespichina p'unchaypin yanaparqayki”, nispa. Kayqa, kunanmi Diospa chaskinan tiempo, kunanmi Diospa qespichinan p'unchaypas.

³Manan pimanpas ima misk'anatapas churaykuchu, llank'ayniykumanta ama p'enqayta rimanankupaq.

⁴Aswanpas tukuypin Diospa kamachinkuna kasqaykuta rikuchikuyku: ancha pacienciawanmi muchukuyku ñak'ariykunata, pisichikuykunata, sasachakuykunatawan.

⁵Hinallataq suq'awanku, carcelman wisq'awanku, ch'aqwaykunapipas maqawanku. Sinchi sasakunapin llank'ayku, pisi puñusqan kayku, yarqaytapas muchuykun.

⁶Rikuchikullaykutaqmi Diospa kamachinkuna kasqaykuta ch'uya kawsasqaykuwan, yachasqaykuwan, llamp'u sonqo kasqaykuwan, sumaq sonqo kasqaykuwan, Santo Espíritu ñoqaykupi kashasqanwan, cheqaq sonqowan munakuq kasqaykuwan,

⁷cheqaq rimaq kasqaykuwan, Diospa atiynin ñoqaykupi kashasqanwan, chanin-kay armakunata paña makiykupipas lloq'e makiykupipas hap'isqaykuwan.

⁸Wakin kutipin allinpaq qhawasqa kayku, wakin kutipitaq mana allinpaq qhawasqa kayku. Wakin kutipin ñoqaykumanta allinta rimanku, wakin kutipitaq mana allinta rimanku. Cheqaqtaña rimashaqtiykupas llullapaqmi hap'iwanku.

⁹Allin reqsisqaña kashaqtiykupas mana reqsisqata hinan rikuwanku. Wañuy patallapiñan kashayku, ichaqa kawsashaykuraqmi, sinchi muchuchisqan kayku, ichaqa manan wañuchiwankuraqchu.

¹⁰Sinchi llakisqaña kashayku chaypas, kusisqallapunin kayku. Wakchaña kayku chaypas, askha runatan qhapaqyachiyku. Mana imayoqña kayku chaypas, tukuy imaymanayoqmi kayku.

¹¹Corinto llaqtapi kaq wawqe-panaykuna, qankunamanmi ancha sut'i simiykuwan rimaykuykichis, sonqoykutan qankunapaq kicharpariyku.

¹²Sonqoykuqa qankunapaq mast'arisqan kashan, qankunan ichaqa sonqoykichista mana kichariwankikuchu.

¹³Sonqoykichista kichariychis, imaynan ñoqaykupas qankunapaq kichariyku hinata, wawaykunata hinan rimapayaykichis.

¹⁴Ama iñiqkunaqa mana iñiqkunawan yugoman watasqa hina pareschakuychischu. Chanin-kayqa mana chanin-kaywanqa manan hukllachakunmanchu. K'anchayqa laqhayaqwanqa manan tupachinkumanchu.

¹⁵Cristowan Satanaswanqa manan sonqota tupachinkumanchu. Iñiqwan mana iñiqwanqa manan sonqota tupachinkumanchu.

¹⁶Dios yupaychana wasiwan ídolo yupaychana wasiwanqa manan kaqkamachu. Ñoqanchisqa kawsaq Diospa tiyanan wasin kanchis. Kikin Diosmi nirqan: “Ñoqan paykunawan tiyasaq, paykuna ukhupin purisaq, Diosninkutaq kasaq, paykunataq llaqtay kanqaku”, nispa.

¹⁷Chaymi Diosqa nillantaq: “Paykuna ukhumanta lloqsiychis, paykunamanta t'aqakuychis, ama ima qhelli kaqtapas llamiychischu, hinan ñoqa chaskisqaykichis.

¹⁸Qankunaq Yayaykichismi kasaq, qankunataq churiykuna ususiykuna kankichis, ninmi Tukuy-atiyniyoq Señor Diosqa”, nispa.