Read Diospa Simin Qelqa GÁLATAS 3 Bible Online

GÁLATAS 3 - Diospa Simin Qelqa bible

GÁLATAS 3

¹¡Ay, Galacia provinciapi tiyaq mana yuyayniyoq wawqe-panaykuna! ¿Pitaq pantachirqasunkichis cheqaq willakuykunata mana kasukunaykichispaq? Qankuna kikiykichismanmi chakatasqa Jesucristomanta ancha sut'itapuni willarqaykichis.

²Kayllatan tapuriyta munaykichis: ¿Kamachikuy simita hunt'aspaykichischu Diospa Espiritunta chaskirqankichis? Icha, ¿iñiywan uyarispaykichischu chaskirqankichis?

³¿Chay hina mana yuyayniyoqpunichu kankichis? ¿Santo Espirituwan mosoq kawsayta qallarisqaykichistachu kunanqa kikiykichispa ruwasqaykichiswan aypayta munashankichis?

⁴¿Ñak'ariyta muchusqaykichispas yanqapaqchu karqan? Amayá yanqapaqqa kachunchu.

⁵Diosmi Espiritunta qosunkichis, hinaspa qankuna ukhupi milagrokunata ruwan. Chaytaqa ruwan, ¿kamachikuy simita hunt'asqaykichisraykuchu? Icha, ¿iñiywan uyarisqaykichisraykuchu?

⁶Abrahamta yuyariychis, paymi Diospi iñirqan, chaymi chaninchasqa kapurqan.

⁷Chayrayku, allinta yachaychis, cheqaq iñiyniyoq kaqkunan Abrahampa mirayninkunaqa.

⁸Mana judío runakunatan Diosqa iñisqankurayku chanincharqan, chaymi ñawpaqmantaña Qelqaqa Abrahamman allin willakuykunata willarqan: “Qanpin lliw suyu runakunaqa saminchasqa kanqa”, nispa.

⁹Abrahammi Diospi iñispa saminchasqa karqan, chay hinallataqmi pipas iñiqqa saminchasqa kanqa.

¹⁰Kamachikuy simita hunt'asqanpi hap'ipakuqkunaqa ñakasqan kanku. Diospa Simin Qelqan nin: “Pipas kamachikuy simipi tukuy qelqasqakunata mana hunt'aqqa, ñakasqan”, nispa.

¹¹Chay hinaqa, ancha sut'in kashan, manan pitapas kamachikuy simita hunt'asqanraykuchu Diosqa chaninchanqa. Diospa Simin Qelqan nin: “Chanin runaqa iñiyllawanmi kawsanqa”, nispa.

¹²Kamachikuy simi hunt'ayqa manan Diospi iñiymantachu paqarin, aswanpas Diospa Simin Qelqan nin: “Kamachikuy simi hunt'aq runaqa, chaykuna hunt'asqanwanmi kawsanqa”, nispa.

¹³Kamachikuy simiq ñakayninmantaqa Criston kacharichiwarqanchis, paymi ñoqanchisrayku ñakasqa karqan. Diospa Simin Qelqan nin: “Pillapas kurkupi warkusqa kaqqa Diospa ñakasqanmi”, nispa.

¹⁴Paymi kacharichiwarqanchis Abrahamman prometesqa samincha mana judío runakunaman Jesucristopi qosqa kananpaq, hinallataq llapapas Diospi iñispa prometesqa Espirituta chaskinanchispaq.

¹⁵Wawqe-panaykuna, runaq kawsayninwan rikch'anachispan yachachisqaykichis: Huk runa rimanakusqanta firman chayqa, manan pipas chayta yanqayachinmanchu, nitaq imatapas yapaykunmanchu.

¹⁶Chay hinaqa, Abrahammanmi mirayninmanwan Diosqa prometerqan. Qelqaqa manan mirayniykikunaman ninchu, askhamantapas rimashanman hina, aswanpas huk runamanta hinallan nin: “Mirayniykiman”, nispa. Chay mirayqa Criston.

¹⁷Chayta nispaqa kaytan niyta munani: Diosqa Abrahamwan rimanakuspaqa hunt'ananpaqpunin prometekurqan. Chayraykun tawa pachak kinsa chunka wata qhepataña rikhurimuq kamachikuy simiqa Diospa prometekuspa rimanakusqantaqa mana yanqayachinmanchu.

¹⁸Kamachikuy simimantachus Diospa qosqan herencia kanman chayqa, manañan prometesqanraykuchu kanman, ichaqa Diosmi prometekusqanrayku Abrahamman mana ima ruwasqallanmanta chay herenciata qorqan.

¹⁹Chay hinaqa, ¿imapaqtaq servin kamachikuy simiqa? Runakunaq huchallikusqankunata sut'inchanapaqmi qhepataña yapasqa karqan, Abrahamman prometesqan miray chayamunankamallan karqan. Kamachikuy simiqa angelkunawanmi willachisqa karqan, Moisestaq runakunapaq chayta chaskirqan.

²⁰Ch'ulla runaq asuntonpiqa manan necesitakunchu paypa rantinpi rimaqqa, Diosmi ichaqa ch'ullalla.

²¹Chay hinaqa, ¿kamachikuy simiqa Diospa prometesqankuna contrachu? Manapunin hinachu. Kamachikuy simichus kawsachiyta atinman chayqa, chaninchasqa kayqa kamachikuy simi hunt'aywanpunin kanman karqan.

²²Ichaqa Diospa Simin Qelqan llapa runa huchaq kamachin kasqanta sut'inchan, ahinapin Diosqa iñiqkunaman prometesqanta qon Jesucristopi iñisqankuraykulla.

²³Jesucristopi iñinanchispaq manaraq tiempo chayamushaqtinmi kamachikuy simiqa presota hina hap'iwarqanchis, imaynatachus Cristopi iñinanchista Diospa sut'inchawananchiskama.

²⁴Chay hinaqa, kamachikuy simiqa Cristoman pusawananchispaq wawata hina uywawaqninchismi karqan, paypi iñispanchis Diospa chaninchasqan kananchispaq.

²⁵Kunantaq Jesucristopi iñinanchis chayamuqtin, manaña uywaqpa makinpiñachu kapunchis.

²⁶Jesucristopi iñispan llapallaykichis Diospa wawankuna kankichis.

²⁷Llapallaykichismi Cristowan hukllachasqa kanaykichispaq bautizasqa kankichis, chaymi Cristowan huk p'achawan hina p'achachisqa kashankichis.

²⁸Manañan kanchu judío runapas, mana judío runapas, manañan kanchu kamachipas, mana kamachipas, manañan kanchu qharipas warmipas, llapallaykichismi Jesucristowan hukllachasqa kaspa hukllaña kapunkichis.

²⁹Qankunapas Cristoqpuni kankichis chayqa, Abrahampa mirayninpunin kankichis, Abrahamman Diospa prometesqantapas chaskillankichistaqmi.