Read Diospa Simin Qelqa GÁLATAS 4 Bible Online

GÁLATAS 4 - Diospa Simin Qelqa bible

GÁLATAS 4

¹Kaytapas nillanitaqmi: Herencia chaskiq wawaqa warmallaraq kashaspanqa, manan imapipas huk-hinachu wasipi kamachimantaqa, tukuy imaymana paypaqña kashan chaypas.

²Aswanmi uywaqkunaq waqaychaqkunaq makillanpiraq kashan, taytanpa nisqan tiempo chayamunankama.

³Chay hinallataqmi ñoqanchispas warmallaraq kashaspanchisqa, kamachi karqanchis kay pachapi kamachikuq espiritukunata kasukuspa.

⁴Ichaqa tiempo hunt'akuqtinmi Diosqa Churinta kachamurqan, payqa warmimanta nacespanmi kamachikuy simiman hina kawsarqan,

⁵kamachikuy simipi kawsaqkunata kacharichiwananchispaq, ahinapi Diospa adoptasqan wawankuna kananchispaq.

⁶Wawankuna kasqanchisraykun, Diosqa Churinpa Espiritunta sonqonchisman kachamurqan, chay Espiritun rimachiwanchis: ¡Yayalláy! nispa.

⁷Chay hinaqa, Diospa wawanñan kanki, manan kamachiñachu. Wawan kasqaykiraykun Diosmanta herenciata chaskinki.

⁸Ñawpaqqa Diosta mana reqsispan espiritukunaq kamachin karqankichis, chaykunaqa manan dioschu.

⁹Kunanqa Diosta reqsispaña, otaq Diospa reqsisqanña kashaspaykichisqa, ¿imaynataq chay mana kallpayoq wakcha espiritukunamanqa kutirikapunkichis? ¿Wakmantachu chaykunaq kamachin kayta munankichis?

¹⁰Qankunaqa hatun p'unchaykunata, mosoq killakunata, fiesta mitakunata, watakunata ima waqaychankichis.

¹¹Manchakushanin, paqtan qankuna ukhupi llank'asqay yanqapaq kanman.

¹²Wawqe-panaykuna, valekuykichismi, ñoqa hinayá kaychis, ñoqapas qankuna hinan kapuni. Qankunaqa manan ima mana allintapas ruwarqankichischu.

¹³Yachankichisñan onqosqay hawa ñawpaq kutita qankunaman allin willakuykunata willasqayta.

¹⁴Chay onqoyqa huk prueban qankunapaqqa karqan, ichaqa manan onqosqa kaqtiypas qankunaqa pisichawarqankichischu, wikch'uwarqankichischu, aswanpas Diospa angelninta hinan, kikin Cristo Jesusta hinan chaskiwarqankichis.

¹⁵¿Maypitaq chay hatun kusikuyniykichisri? Ñoqaqa allintan reqsiykichis, atikunmanchus karqan chayqa, ñawiykichistapas horqokuspa qoykuwankichismanmi karqan.

¹⁶¿Cheqaqkaqta qankunaman nispaychu awqaykichis kapuni?

¹⁷Chay runakunaqa qankunamantan sienteq tukunku, ichaqa manan allinniykichispaqchu, aswanpas ñoqaykumantan t'aqayta munashasunkichis, tukuy sonqowan paykunaman k'askakunaykichispaq.

¹⁸Allin kaqpaqqa kusapunin hukkunamanta sienteq kayniykichisqa, ichaqa tukuy tiempo, ama qankunawan kashaqtillaychu.

¹⁹Wawallaykuna, huktawanmi qankunamanta nanayta muchushani, imaynan wachakuq warmipas nanayta muchun hinata. Muchushallasaqpunitaqmi Cristoq rikch'aynin qankunapi rikhurinankama.

²⁰Maytan munashani kunanpacha qankunawan kashayta, mana k'amispa qankunata rimaykunaypaq, manan qankunamanta ima niytapas atishanichu.

²¹Niwaychis kamachikuy simiq kamachikuyninpi kayta munaqkuna, ¿manachu chay kamachikuy simiq nisqanta uyarinkichis?

²²Diospa Simin Qelqapin Abrahampa iskay churiyoq kasqanta nin, hukninmi karqan kamachin Agarpi, huknintaq karqan libre kaq esposan Sarapi.

²³Kamachi warmipi kaq churinqa aychaman hinallan nacerqan, libre kaq esposaq churinmi ichaqa Diospa prometesqanman hina nacerqan.

²⁴Chayqa huk rikch'anachiy hinan. Chay warmikunaqa iskay rimanakuymanmi rikch'akun: hukninmi Sinaí orqopi rimanakuyman rikch'akun, chaymi Agar. Paymi kamachi kanankupaq wawakunata wachakun.

²⁵Chay Agarqa Arabia suyupi Sinaí orqomanmi rikch'akun, chay orqotaqmi kunan Jerusalén llaqtaman rikch'akun, chay llaqta wawakunantin kamachi kashasqanrayku.

²⁶Hanaq pacha Jerusalenmi ichaqa mana kamachichu, chaymi llapanchispa mamanchisqa.

²⁷Diospa Simin Qelqan nin: “Kusikuy, mana wiksallikuq warmi, q'ochukuy, mana wachakuq warmi, kusisqa qapariy, wachakuy nanayta mana reqsiq warmi. Wikch'usqa warmiq wawankunan aswan askha, qosayoq warmiq wawankunamantaqa”, nispa.

²⁸Ahinaqa, wawqe-panaykuna, ñoqanchismi Isaac hina Diospa prometesqan wawakuna kanchis.

²⁹Imaynan chay tiempopi aychaman hina naceq runaqa Santo Espirituq atiyninwan naceq runata qatiykacharqan, chay hinallataqmi kunanpas qatiykachashan.

³⁰Ichaqa, ¿ima nintaq Diospa Simin Qelqari? Kay hinatan nin: “Kamachi warmitaqa wawantinta qarqoy, kamachi warmiq wawanqa manan herenciata chaskinmanchu libre kaq esposaq wawan hinaqa”, nispa.

³¹Chay hinaqa, wawqe-panaykuna, manan kamachi warmiq wawankunachu kanchis, aswanpas casada warmiq wawankuna kaspan libre kanchis.