Read Diospa Simin Qelqa GÁLATAS 5 Bible Online

GÁLATAS 5 - Diospa Simin Qelqa bible

GÁLATAS 5

¹Criston qespichiwarqanchis libre kananchispaq, chay libre-kaypi qaqata sayaychis amataq kamachi-kaymanqa huktawan kutiriychischu.

²Uyariwaychis, ñoqa Pablon niykichis, qhari-kayniykichista señalachikunkichis chayqa, manan Cristoqa imapaqpas servisunkichischu.

³Huktawanmi nini, pi runapas qhari-kayninta señalachikuqqa kamachikuy simiq lliw kamachisqantan hunt'ananpuni.

⁴Qankunachus kamachikuy simita hunt'asqaykichiswan chaninchasqa kayta yuyankichis chayqa, Cristomanta t'aqasqan kashankichis, Diospa munakuyninmantapas karunchakapunkichismi.

⁵Ñoqanchisqa Jesucristopi iñispanchismi Santo Espirituq kallpachasqan kaspa, makilla suyakushanchis Diospa chaninchawananchista.

⁶Jesucristowan hukllachasqa kashanchis chayqa, qhari-kayninchis señalasqa kaypas mana señalasqa kaypas manan imapaqpas serviwanchischu, aswanpas Jesucristopi iñispa munanasqa kawsaynillanchismi servin.

⁷Qankunaqa allintan purisharqankichis, ¿pitaq hark'arqasunkichis cheqaq-kayta mana kasunaykichispaqri?

⁸Chay wak yachachikuyqa manan waqyaqniykichis Diosmantachu rikhurimurqan.

⁹Rimaymi kan: “Huk pisi qonchullan llapa masata poqochin”, nisqa.

¹⁰Chaywanpas Señorpi confiakuspaymi qankunamanta mana iskayrayanichu huk-hinata yuyanaykichistaqa. Ichaqa Diosmi chay pantachiqniykichis runata huchachanqa, pi runaña kachun chaypas.

¹¹Wawqe-panaykuna, ñoqachus yachachiykichismanraq: Qhari-kayniykichista señalachikuychis, nispa chayqa, manachá judío runakunaqa qatiykachawanmanchu. Chay hina kaqtinqa: Criston cruzpi wañurqan, niqtiypas, manachá phiñakunkumanchu.

¹²Allinmi kanman qhari-kayniykichista señalachikuychis, nispa yachachiqniykichiskunaqa, ¡paykuna kikinku qhari-kayninkuta hukpaqkama wit'ukuchunku!

¹³Qankunaqa, wawqe-panaykuna, libre kanaykichispaqmi waqyasqa karqankichis, ichaqa ama libre-kayniykichisqa aychaykichispa millay munaynillanta ruwanaykichispaqchu kachun, aswanpas munanakuspa hukkuna-hukkunawan yanapanakuychis.

¹⁴Diospa llapa kamachikuynin simikunaqa ch'ulla kamachikuyllamanmi huñukun, chaymi nin: “Runamasiykitan qan kikiykita hina munakunki”, nispa.

¹⁵Qankunapurachus qhansanakunkichis mikhuykunakunkichis chayqa, allinta cuidakuychis, paqtataq qankunapurallataq ch'usaqyachinakuwaqchis.

¹⁶Kaytan niykichis: Santo Espirituq munasqanman hina kawsaychis, amataq aychaykichispa munasqantachu ruwaychis.

¹⁷Runaq sonqonqa Santo Espirituq mana munasqantan munan, Santo Espiritutaq runaq sonqonpa munasqanta mana munanchu. Chaykunan paykunapura churanakunku, hinan munasqaykichista mana ruwayta atinkichischu.

¹⁸Santo Espiritutaqchus pusashasunkichis chayqa, manan kamachikuy simiq kamachisqanñachu kankichis.

¹⁹Runaq millay munasqan ruwaykunaqa sut'i reqsisqan, chaykunaqa kaykunan: wasanchaykuna, qhelli huchapi puriykuna, millay viciokunapi kawsaykuna,

²⁰ídolo yupaychaykuna, layqakuykuna, cheqninakuykuna, quejanakuykuna, lerq'opayanakuykuna, k'arak phiñakuykuna, payllapaq kananta munaykuna, ch'eqechinakuykuna, wak t'aqata hatarichiykuna,

²¹envidiakuykuna, [runa wañuchiykuna],[1] machaykuna, aycha kusichiypi waqlliykuna, chaykunaman rikch'akuq ruwaykunapiwan. Chaykuna hawan anchata anyaykichis, imaynan nirqaykichisña hina, chay hinata ruwaqkunaqa manan Diospa qhapaqsuyunman haykunqakuchu.

²²Santo Espiritun ichaqa kawsayniykichispi ruruchin: munakuyta, q'ochukuyta, sumaq kawsayta, pacienciayoq-kayta, sumaq sonqo-kayta, allin runa-kayta, rimasqanta hunt'aq-kayta,

²³llamp'u sonqo-kayta, cuerpo kamachiq kaytawan. Chay ruwaykuna contraqa manan ima kamachikuy simipas kanchu.

²⁴Cristoq kaqkunaqa ñan chakatankuña aycha cuerpoq millay yuyaykuyninta sinchi munapakuynintawan.

²⁵Santo Espiritun kawsachiwanchis, chaymi Santo Espirituq pusasqan hinapuni kawsananchis.

²⁶Ama yanqa hatunchakuqchu kasunchis, amataq hukkuna-hukkunawan phiñachinakuspachu nitaq envidianakuspachu.