Read Diospa Simin Qelqa EFESIOS 5 Bible Online

EFESIOS 5 - Diospa Simin Qelqa bible

EFESIOS 5

¹Diospa munasqa wawankunan kankichis, chayrayku payman rikch'akuq kaychis.

²Munanakuypi kawsaychis, imaynan Cristopas munakuwarqanchis hinata. Payqa ñoqanchisraykun sacrificiopi pay kikinta haywakurqan Diospa sonqonman chayaq sumaq q'apay ofrendata hina.

³Qankunaqa Diospaq t'aqasqa runakunan kankichis, chayrayku qankuna ukhupiqa ama rimayllapas kachunchu qhelli huchapi puriymanta, tukuy mana chanin kaymanta, munapayaymantapas.

⁴Amataq millayta rimaychischu, p'enqay simikunata, asichikuq qhelli simikunatapas, chaykunaqa manan allinchu, aswanpas Diosman graciasta qospallapuni kaychis.

⁵Qankunaqa yachankichisñan, pipas qhelli huchapi purin, mana chaninta ruwan, munapayanpas chayqa, Cristoqpas Diospapas qhapaqsuyunmanqa manan haykunqakuchu (munapayayqa idolokunata yupaychay hinan).

⁶Ama piwanpas yanqa simikunawan q'otuchikuychischu, chay huchakuna hawan mana kasukuqkunaman Diospa phiñakuyninqa chayamun.

⁷Ama paykunaq ruwaqmasinqa kaychischu.

⁸Huk tiempopiqa laqhayaqpin kawsarqankichis, kunanmi ichaqa Señorwan hukllachasqa kaspa k'anchaypi kashankichis.

⁹K'anchayqa paqarichin tukuy sumaq sonqo-kayta, chanin kawsayta cheqaq-kaytawan.

¹⁰K'anchaypi kashaq runakuna hina kawsaychis, imachus Señorpa sonqonta kusichiq kaqta ruwaspa.

¹¹Laqhayaqpi kashaq runakunaq mana valeq ruwasqankutaqa ama ruwaysikuychischu, aswanpas mana chanin ruwasqankumanta anyaychis.

¹²Paykunaq pakapi ruwasqankumantaqa rimayllapas p'enqakuymi.

¹³Ichaqa tukuy imaymanapas k'anchayman horqosqa kaqtinqa lliwmi sut'inchasqa kapun, k'anchaymi tukuy imatapas sut'ita rikuchiqqa.

¹⁴Chayraykun nin: “Puñusqaykimanta rikch'ariy, wañusqakunamanta kawsariy, chaymi Cristo k'anchaykusunki”, nispa.

¹⁵Chayrayku, allintapuni reparakuychis imaynatachus kawsashasqaykichista, ama mana yuyayniyoq hinaqa kawsaychischu, aswanpas yachayniyoq hinapuni kawsaychis.

¹⁶Tiempotaqa ama usuchiychischu, kay p'unchaykuna mana allin kasqanrayku.

¹⁷Ama mana yuyayniyoqqa kaychischu, aswanpas imachus Señorpa munaynin kasqanta allintapuni reparaychis.

¹⁸Ama vinowan machaychischu, machaypiqa waqlliymi kan, aswanpas Santo Espirituwan hunt'a kaychis.

¹⁹Qankunapura kallpachanakuychis salmokunawan, yupaychana takikunawan, Santo Espirituq yuyaychasqan takikunawan. Señorman takispa payta tukuy sonqo yupaychaychis.

²⁰Tukuy imaymana kaqkunamanta Señorninchis Jesucristoq sutinpi Dios Yayaman graciasta qollaychispuni.

²¹Cristota manchakuspa kasunakuychis.

²²Imaynan Señorninchista kasunkichis chay hinata casarasqa warmikuna qosaykichista kasuychis.

²³Qosaqa esposaq umanmi, imaynan Cristopas iglesiaq uman hina. Criston iglesiaq qespichiqninqa, chay iglesian paypa cuerpon.

²⁴Imaynan iglesiaqa Cristota kasukun, ahinallataqmi casarasqa warmikunapas tukuy imapi qosankutaqa kasukunanku.

²⁵Qosakuna, esposaykichista munakuychis, imaynan Cristopas iglesiata munakuspa payrayku wañurqan hinata.

²⁶Chaytan payqa ruwarqan iglesiata unupi mayllispa Diospa siminwan ch'uyanchananpaq,

²⁷ancha sumaq iglesiata pay kikinman qayllaykachinanpaq, mana qhelliyoqta, mana sip'uyuqta, mana imaq tupaykusqanta, aswanpas ch'uyata, mana huchachanata ima.

²⁸Chay hinatan qosakunapas esposankutaqa munakunanku, kikinkuq cuerponkuta hina. Esposanta munakuqqa pay kikintan munakun.

²⁹Manan pipas pay kikinpa cuerpontaqa hayk'aqpas cheqnikunchu, aswanpas mikhuchispanmi allinta uywan, imaynan Cristopas iglesiapaq ruwan hinata.

³⁰Ñoqanchisqa Cristoq cuerponmi kanchis, chay cuerpoq miembronkuna ima.

³¹Chayraykun Diospa Simin Qelqaqa nin: “Runaqa taytanta mamanta saqepuspan warminwan hukllachaykakapunqa, iskayninkutaq huk cuerpollaña kapunqaku”, nispa.

³²Kay pakasqa yachayqa sasa entiendeymi, aswanpas ñoqaqa nishani Cristomanta iglesiamantawanmi.

³³Chayrayku, qosakuna, sapankaykichis qankuna kikiykichista hinapuni esposaykichista munakuychis, hinallataq qankunapas esposakuna qosaykichista respetaychis.