Read Diospa Simin Qelqa FILIPENSES 1 Bible Online

FILIPENSES 1 - Diospa Simin Qelqa bible

FILIPENSES 1

¹Jesucristoq kamachinkuna, Pablowan Timoteopiwanmi qelqamuykichis Filipos llaqtapi kashaq Jesucristopi ch'uya kawsaq llapa wawqe-panakunaman, umallikunaman, diaconokunamanwan:

²Dios Yayanchis, Señor Jesucristopiwan anchata khuyapayasunkichis, thak-kaytapas qosunkichis.

³Sapa kuti qankunamanta yuyarikuspaymi Diosniyman graciasta qoni.

⁴Sapa kuti llapaykichispaq mañakuspaymi kusisqa mañapuykichis,

⁵qallariy p'unchaymantapacha kunankama allin willakuykunata willaypi llank'aysiwasqaykichismanta.

⁶Cheqaqtapunin qankunapi allin ruwayta qallariq Diosqa, Jesucristoq kutimunan p'unchaykama qankunapi ruwashasqanta hunt'anqa.

⁷Qankunaqa sonqoypipunin kashankichis, chaymi qankunamanta chay hina rimasqayqa chaninpuni. Preso kashaqtiypas libre kashaspa allin willakuykunata defiendeshaqtiypas, allinta takyachishaqtiypas, qankunaqa Diospa qowasqan llank'anapi llank'aqmasiymi kankichis.

⁸Diosmi yachan imaynatachus llapaykichista Jesucristoq munakuyninwan maytapuni munakusqayta.

⁹Kaytan Diosmanta mañakuni, munanakuyniykichis wiñachun aswan-aswantaraq tukuy yachaypipas allin reparaypipas,

¹⁰aswan allin kaqtapuni akllakunaykichispaq, Cristoq hamunan p'unchaypi ch'uya sonqoyoq mana huchachana kanaykichispaq.

¹¹Ahinapin Jesucristoqa chanin ruwasqaykichiskunata kawsayniykichispi askhayachinqa, Diosta hatunchanapaq yupaychanapaqwan.

¹²Wawqe-panaykuna, yachanaykichistan munani, tukuy imaymana sucedewasqanqa allin willakuykunatan astawan wiñarichin.

¹³Chay hinapin Cristorayku preso kasqayta Roma reypa wasinpi kaq soldadokunapas wakin runakunapas yachankuña.

¹⁴Chaymi askha wawqe-panakunapas preso kasqayta yachaspanku astawan Señorpi kallpachakuspanku mana manchakuspa Diospa siminta willashanku.

¹⁵Cheqaqtapunin wakinqa envidiakuspa churanakuspa Cristomanta willanku, chaywanpas wakinqa allin yuyaywanmi willanku.

¹⁶Allin yuyaywan willaqkunaqa munakuspankun Cristomanta willanku, paykunaqa yachankun allin willakuykunata defendenaypaq kaypi kashasqayta.

¹⁷Chay envidiakuqkunan ichaqa mana tukuy sonqowanchu willanku, aswanmi paykunaqa allinnillankuta maskhaspa ruwanku, preso kashaqtiy astawanraq llakichiwayta yuyaspanku.

¹⁸Chaywanpas manan imananpaschu, aswanmi imaynallamantapas Cristomanta willanku, tukuy sonqowanpas mana tukuy sonqowanpas, chaymi ñoqaqa anchatapuni kusikuni. Arí, astawanraqmi kusikusaqpas.

¹⁹Yachanin tukuy chaykunaqa kachariwanankupaq kasqanta, mañapuwasqaykichisrayku, Jesucristoq Espiritunpas yanapawasqanrayku ima.

²⁰Ñoqaqa makillapunin suyakushani ama imapipas p'enqachisqa kanayta, aswanpas kallpawanraq rimarinayta. Chay hinapin wañusaqña kawsasaqña chaypas, kunanpas qhepamanpas ñoqapi Cristoqa hatunchasqa kanqa.

²¹Ñoqaqa Cristollapaqñan kawsashani, wañuspaytaq ichaqa aswan allinraq kasaq.

²²Chaywanpas kay pachapi kawsashaspayqa Señorpaqmi imatapas allinta llank'ayman, chaymi mana mayqentapas akllakuyta atishanichu.

²³Kay iskayninmantan mana mayqen kaqtapas akllakuyta atishanichu: Munaymanmi wañukapuspay Cristowan kuska kashayta, chaymi ñoqapaqqa aswan allin.

²⁴Chaywanpas, kay pachapi kawsayniyqa aswan allinraqmi qankunapaq kallantaq.

²⁵Chayta yachaspan ñoqaqa yachakuniña manaraq wañunayta, chaymi qankunawan kashasaq aswan allinta kawsayniykichispi yanapaykunaypaq, iñiyniykichispipas kusikunaykichispaqwan.

²⁶Chay hinaqa, huktawan qankunaman hamuqtiymi qankunaqa Jesucristota ñoqa hawa astawan hatunchankichis kusikuymanta.

²⁷Cristomanta allin willakuykunaman hinapuni allinta kawsaychis. Chayrayku watukuq hamuspaypas karupiña kashaspaypas, munanin qankunamanta yachayta huk sonqolla kusata sayashasqaykichista, allin willakuykunapi iñiyta defendespa huk-nisqalla allinta llank'ashasqaykichista,

²⁸awqaykichiskunata mana manchakuspa kashasqaykichistapas. Chayqa sut'itan rikuchin ñak'ariyman paykuna rishasqankuta, qankunapaqtaq ichaqa sut'inchan qespichisqa kasqaykichista, chaytaqa Diosmi ruwanqa.

²⁹Cristoraykun qankunaqa samiyoq kankichis, manan iñinallaykichispaqchu, aswanpas payrayku ñak'arinaykichispaqwanmi.

³⁰Qankunaqa rikurqankichismi muchusqayta, qankunapas chay hinallatataqmi muchushankichisña, uyarishallankichistaqmi muchushasqaytapas.