Read Diospa Simin Qelqa 1 TESALONICENSES 1 Bible Online

1 TESALONICENSES 1 - Diospa Simin Qelqa bible

1 TESALONICENSES 1

¹Ñoqa Pablon, Silvanopiwan Timoteopiwan kay cartata Tesalónica llaqtapi kashaq iglesiaman qelqamuni. Qankunaqa Dios Yayawan Señor Jesucristopiwanmi hukllachasqa kashankichis: Dios Yayanchis Señor Jesucristopiwan anchata khuyapayasunkichis thak-kaytapas qosunkichis.

²Llapaykichismantan Diosman graciasta qollaykupuni, mañakuyniykupipas qankunamantaqa yuyarikullaykupunin.

³Dios Yayanchispa ñawpaqenpin yuyarillaykupuni ancha hatun iñiywan ruwasqaykichismanta, munakuywan llank'asqaykichismanta, Señorninchis Jesucristopi ancha pacienciawan suyakuyniykichismantapas.

⁴Wawqe-panaykuna, Diosmi munakusunkichis, yachaykutaqmi paypa akllakusqan kasqaykichistapas.

⁵Cristomanta allin willakuyniykutan willarqaykichis, manan runaq simillanwanchu, aswanpas atiywanmi Santo Espirituq kallpachasqan mana iskayrayaspa willarqaykichis. Allintataqmi yachankichispas imaynatachus qankuna ukhupi allinniykichispaq kawsasqaykutapas.

⁶Qankunaqa ñoqaykumantan yachaqakurqankichis, hinallataq Señormantapas, hinaspan sinchita ñak'arishaspaykichispas Diospa siminta chaskirqankichis Santo Espirituq kusikuy qosqanwan.

⁷Chay hinapin Macedonia provinciapipas Acaya hap'iypipas llapa iñiqkunaq yachaqakunankupaq hina karqankichis.

⁸Qankunan Señorpa simintaqa mast'arirqankichis, manan Macedoniallapichu manataq Acayallapichu, aswanpas tukuy hinantinpin Diospi iñisqaykichisqa uyarikurqan, chaymi manaña imapas rimarinaykupaq kanñachu.

⁹Paykuna kikinkupunin willakunku imaynatachus ñoqaykuta chaskiwasqaykikuta, imaynatachus idolokunata saqepuspa Diosman kutirikusqaykichistapas, kawsaq cheqaq Diosta servinaykichispaq.

¹⁰Willakullankutaqmi wañusqanmanta Diospa kawsarichimpusqan hanaq pachamanta hamuq Diospa Churin Jesusta suyakushasqaykichistapas, Jesusmi hamushaq manchay ñak'ariymanta qespichiwaqninchisqa.