Read Diospa Simin Qelqa 1 TESALONICENSES 5 Bible Online

1 TESALONICENSES 5 - Diospa Simin Qelqa bible

1 TESALONICENSES 5

¹Wawqe-panaykuna, tiempokunamanta p'unchaykunamantawanqa manan qankunaman qelqamunayñachu.

²Qankuna kikiykichismi allinta yachankichis, Señorpa kutimunan p'unchayqa qonqayllan chayamunqa, imaynan suwapas tutalla hamun hinata.

³Runakunan nishanqaku: Thak-kaypin kashanchis, allin waqaychasqan kashanchis, nispa. Chayllamanmi qonqaylla manchay wañuray paykunata hap'inqa, imaynan onqoq warmita wachakuy nanay qonqaylla hap'in hinata, manataqmi ayqeytaqa atinqakuñachu.

⁴Qankunaqa, wawqe-panaykuna, manan laqhayaqpiñachu kashankichis, chay hinaqa, Señorpa kutimunan p'unchayqa manañan suwa hinachu hap'isunkichis.

⁵Qankunaqa llapaykichismi k'anchaypi kawsaq runakuna kankichis, p'unchaypi kawsaq runakuna, qankunaqa manan tutayaqpi kawsaq runakunachu, nitaq laqhayaqpi kawsaq runakunapaschu kankichis.

⁶Chayrayku, ama wakinkuna hinaqa puñusunchischu, aswanpas rikch'ashasunchis, allin yuyayninchispitaq kashasunchispas.

⁷Puñuqkunaqa tutan puñunku, machaqkunapas tutan machanku.

⁸Ñoqanchis ichaqa, p'unchaypi kawsaq runakuna kaspa allin yuyayninchispi kasunchis, iñiywanpas munakuywanpas fierro unkuwan hina churakusunchis, Diospa qespichiwananchista suyakuywanpas cascowan hina churakusunchis.

⁹Diosqa manan phiñakuyninwan muchuchisqa kananchispaqchu churawarqanchis, aswanpas Señorninchis Jesucristopi iñispa qespichisqa kananchispaqmi.

¹⁰Jesucriston ñoqanchisrayku wañurqan, kawsaspapas wañuspapas paywan kuska kawsananchispaq.

¹¹Chayrayku, hukkuna hukkunawan sonqochanakuychis kallpachanakuychis, imaynan ruwashankichispuni hinata.

¹²Wawqe-panaykuna, valekuykichismi, qankuna ukhupi llank'aqkunata respetanaykichispaq. Paykunan Señorwan kawsayniykichispi umallispa pusasunkichis yuyaychasunkichis.

¹³Paykunataqa llank'asqankuraykun allinta rikunaykichis, anchatataq munakunaykichispas. Qankunapura sumaqta kawsaychis.

¹⁴Wawqe-panaykuna, valekullaykichistaqmi, qellakunata anyaykuychis, manchalikunata yanapaykuychis, pisi kallpakunata kallpachaykuychis, hinallataq llapapaqpas pacienciayoq kaychis.

¹⁵Qhawariychis, paqtataq pipas mana allinman mana allinllawantaq kutichiwaqchis, aswanpas hukkuna-hukkunapaq allinkaqllatapuni ruwaychis, hinallataq llapapaqpas.

¹⁶Kusisqallapuni kaychis.

¹⁷Diosmantaqa mañakushallaychispuni.

¹⁸Tukuy imaña hayk'aña kaqtinpas Diosman graciasta qollaychispuni, Diosqa munan Jesucristowan hukllachasqa kaspa chay hinata kawsanaykichistan.

¹⁹Santo Espiritutaqa ama ninata hina chiriyachiychischu.

²⁰Diospa yuyaychasqan profetizaykunataqa ama pisipaq hap'iychischu.

²¹Tukuy ima nisqatapas allinta t'aqwiychis, hinaspa allinkaqninta hap'iqakuychis.

²²Tukuy mana allinkaqmanta t'aqakuychis.

²³Thak-kayta qoq kikin Dios qankunata hunt'asqata ch'uyayachisunkichis, lliw cuerpoykichistapas almaykichistapas espirituykichistapas, allin waqaychasqata mana huchachanata waqaychasunkichis, Señorninchis Jesucristoq kutimunankama.

²⁴Waqyaqninchis Diosqa hunt'aqmi, payqa tukuy chaykunataqa hunt'anqapunin.

²⁵Wawqe-panaykuna, ñoqaykupaqpas Diosmanta mañapuwayku.

²⁶Llapallan wawqe-pananchiskunawan ch'uya much'aykuywan napaykunakuychis.

²⁷Señorpa sutinpin kamachiykichis llapallan wawqe-panakunaman kay qelqata leepunaykichispaq.

²⁸Señorninchis Jesucriston sumaqta saminchasunkichis.