Read Diospa Simin Qelqa JOSUÉ 1 Bible Online

JOSUÉ 1 - Diospa Simin Qelqa bible

JOSUÉ 1

¹Señor Diospa kamachin Moisespa wañukapusqan qhepatan, Señor Diosqa Moisespa yanapaqnin Nunpa churin Josueta nirqan:

²— Kamachiy Moisesmi wañukapun, ahinaqa qanpas Israel runakunapas wakichikuychis Jordán mayuta chimpaspa qankunaman qonay hallp'aman haykunaykichispaq.

³Chaypin qosqaykichis llapan chayasqaykichis hallp'ata imaynan Moisesman prometerqani hinata.

⁴Chay hallp'aykichismi kanqa wichay lado Líbano orqo-orqomanta uray lado ch'inneqkama, hinallataq inti lloqsimuy lado hatun Eufrates mayumanta inti haykuy lado lamar-qochakama, chaypi kaq Het runakunaq hallp'anpas qankunaqmi kapunqa.

⁵Kawsashaqtiykiqa manan pipas atipasunkichu, imaynan Moiseswanpas kasharqani hinallataqmi qanwanpas kasaq, ahinaqa manapunin saqerparisqaykichu manallataqmi wikch'usqaykipaschu.

⁶Kallpachakuy, allin qhari kay, qanmi ñawpa taytaykichisman qonaypaq prometesqay hallp'ata kay llaqtaman rakinki.

⁷¡Kallpachakuy! ¡Allinta sayay! Kamachiy Moisespa qosqasuyki kamachikuykunata llapantapuni hunt'ay, amapunin chaykunamantaqa t'aqakunkichu pañamanpas lloq'emanpas, chay hinapin allillan kasunki may purisqaykipipas.

⁸Kamachikuy simi qelqamantaqa rimashallankipunin, chaytaqa tuta-p'unchaymi yuyaymanallankipuni qelqaq kamachikusqanman hinapuni ruwanaykipaq. Chay hinapin tukuy ima ruwasqaykipas allinkama kasunki.

⁹Qhawariy, ñoqan kamachiyki, kallpachakuspa qhari hinapuni sayay. Ama manchakuychu, amataq pisi kallpayaychu, ñoqa Diosniyki Señor Diosqa qanwanpunin kashasaq maytaña riqtiykipas, nispa.

¹⁰Hinan Josueqa Israel umalli runakunata kamachirqan:

¹¹— Riychis llapan runakunaman, kamachimuychistaq qoqawata ruwakunankupaq. Kinsa p'unchaymanta hinan Jordán mayuta chimpasunchis, Diosninchis Señor Diospa qowananchis hallp'ata hap'ikapunanchispaq, nispa.

¹²Hinallataq Josueqa Rubén ayllu runakunata, Gad ayllu runakunata, Manasés kuskan ayllu runakunatapas nirqan:

¹³— Señor Diospa kamachin Moisespa nisqasuykichis simita yuyariychis, paymi nirqan: “Diosniykichis Señor Diosmi kay hallp'ata qosunkichis mana kuyuq tiyanaykichispaq”, nispa.

¹⁴Jordanpa kay ladonpi Moisespa qosqasuykichis hallp'apin saqenkichis warmiykichista, wawaykichista, uywaykichiskunatapas. Allin maqanakuq qharikunallan maqanantinkama, wakin ayllukunaq ñawpaqenta mayuta chimpankichis, paykunata yanapanaykichispaq.

¹⁵Señor Dios mana kuyuqta tiyachinankama imaynan qankunatapas tiyachirqasunkichis hinata, yanapallankichistaqmi Diosniykichis Señor Diospa qonan hallp'ata hap'ikapunankukama. Chaymantataq kutimpunkichis Moisespa qosqasuykichis kay hallp'aykichista hap'ikapunaykichispaq, nispa.

¹⁶Paykunataq Josueta nirqanku: — Arí, llapan kamachiwasqaykikutan ruwasaqku, maytaña: Riychis, niwaqtiykikupas risaqkun.

¹⁷Imaynan Moisestapas tukuy kamachiwasqankuta kasurqayku ahinallataqmi qantapas kasusqaykiku. Ñoqaykuqa munaykun Diosniyki Señor Diosllapuni qanwan kananta, imaynan Moiseswanpas karqan hinata.

¹⁸Kamachikusqaykita mana kasukuqkunapas qan contra sayariqkunapas wañuchisqan kanqaku. Chhaynaqa, kallpachakuy, qhari hinapuni sayay, nispa.