Read Diospa Simin Qelqa JOSUÉ 10 Bible Online

JOSUÉ 10 - Diospa Simin Qelqa bible

JOSUÉ 10

¹Jerusalén llaqta rey Adonisedectaq[4] uyarirqan Josuepa Hai llaqtata reynintinta thunisqanta imaynatachus Jericó llaqtatapas reynintapas ruwasqanta. Hinallataq uyarirqan Gabaón runakuna Israel runakunawan rimanakuspa paykunawan tiyapushasqanta.

²Gabaonqa reyniyoq hatun llaqta sayaymi karqan, Hai llaqtamantapas aswan hatun, llapan qharikunapas kallpasapakaman karqan. Chaymi Adonisedecqa sinchita mancharikurqan,

³hinaspan payqa Hebrón llaqta rey Hohamman, Jarmut llaqta rey Pireamman, Laquis llaqta rey Jafiaman, Eglón llaqta rey Debirmanwan willachirqan:

⁴Hamuychis Gabaón runakunawan maqanakuypi yanapawayku, paykunaqa Josuewan Israel runakunapiwanmi rimanakusqakuña, nispa.

⁵Chaymi Amor runakunaq phisqantin reyninkuna Jerusalenmanta, Hebronmanta, Jarmutmanta, Laquismanta, Eglonmantawan soldadontinkama huñukurqanku. Gabaonta muyuykuspataq phawaykurqanku.

⁶Gilgal karpa-karpapi Josué kashaqtintaq, Gabaón runakunaqa payman willachimurqanku: Ama “manan” niwaykuchu, kay kamachiykikunata yanapaykuwayku. Orqo-orqopi tiyaq Amor runakunaq reyninkunan llapanku huñukuspa contraykupi sayarimunku. Usqhaylla hamuspayki hark'aykukuwayku, nispa.

⁷Hinan Josueqa Gilgalmanta llapan soldadokunantin kallpasapa qharikunantin seqaykurqan.

⁸Señor Diostaq Josueta nirqan: — Ama mancharikuychu, ñoqan qanman hap'iykachisqayki, manataqmi hukllapas qanwan churanakuyta atinqachu, nispa.

⁹Chaymi Josueqa Gilgalmanta lloqsirqan, illariqta purispataq qonqaylla Amor runakunata hap'irparirqan.

¹⁰Señor Diosmi chay runakunata Israel runakunaq ñawpaqenpi q'aqcharqan, chay hinapin Israel runakunaqa Gabaonpi askhatapuni wañurachirqan. Chaymantapas Bet-horón q'asanta qatiykachaspa Amor runakunata Azeca ñanpi Maceda ñanpi wañuchirqanku.

¹¹Bet-horón q'asa qhatataña Amor runakuna Israel runakunamanta ayqeshaqtinkutaq, Señor Diosqa paykuna pataman Azeca ñannintinpi hatuchaq chikchita chikchichimurqan, chay chikchin Israel runakunaq wañuchisqanmantapas aswan askhataraq wañuchirqan.

¹²Señor Diosqa Israel runakunaq makinman Amor runakunata hap'iykachiqtinmi, Josueqa Señor Diosta rimapayarqan. Hinaspan Israel runakunaq ñawpaqenpi nirqan: — Inti, kaq Gabaonllapi sayaykuy. Killa, Ajalón wayq'ollapi takyaykuy, nispa.

¹³Hinan intipas killapas kasqallanpi sayarparirqan Israel runakuna awqankuta atipanankama. Intin kuskan cielopi sayarparirqan, huk p'unchay ch'isiyaqta hinapuni mana haykuspa. (Chaytaqa Chanin Runaq Qelqan nisqapin willakun).

¹⁴Chay p'unchaymi Señor Diosqa Israel runakunarayku maqanakurqan, runaq mañakusqantapas uyarispa. Manataq chay hina p'unchayqa hayk'aqpas karqanchu, ñawpaqpas qhepamanpas.

¹⁵Chaymantataq Israel runakunaqa Josuepiwan Gilgalpi karpankuman kutipurqanku.

¹⁶Phisqantin reykunataq ayqekuspa Maceda qaqa wasipi pakakurqanku.

¹⁷Chaymantataq Josueman willarqanku: — Phisqantin reytan Maceda qaqa wasipi pakakushaqta tarirqamuyku, nispanku.

¹⁸Hinan Josueqa kamachirqan: — Qaqa wasi punkuta wisq'arqoychis hatuchaq qaqakunata tanqaykuspa, runakunatataq qhawananpaq saqeykunkichis.

¹⁹Chaykamaqa aman chayllapichu qhepakunkichis, aswanpas awqanchistan qatinkichis, qhepa riq soldadokunamantaq phawaykunkichis. Llaqtankumanqa aman kutichinkichisñachu, Diosninchis Señor Diosmi makinchismanña hap'iykachipuwanchis, nispa.

²⁰Josuemi Israel runakunantin askhatapuni wañuchispanku Amor runakunata pasaqtapuni atiparqanku, wakillanmi Amor runakunaqa ayqekuspa allin perqayoq llaqtankupi pakakurqanku.

²¹Israel soldadokunataq Josuepa kasqan Macedapi karpankuman allin qhali mana imanasqa kutipurqanku. Manataq pillapas Israel runakuna contra rimaqqa karqanchu.

²²Hinan Josueqa nirqan: — Qaqa wasi punku wisq'asqa qaqakunata tanqaqaychis, hinaspa phisqantin reykunata pusamuwaychis, nispa.

²³Chaymi Israel runakunaqa qaqa wasimanta Jerusalenpa, Hebronpa, Jarmutpa, Laquispa, Eglonpa reyninkunata horqomurqanku.

²⁴Josuepa ñawpaqenman apamuqtinkutaq, Josueqa llapan Israel runakunata waqyarispa paywan riq soldado umallikunata nirqan: — Asuykamuychis, hinaspa kay reykunaq kunkanta saruychis, nispa. Paykunataq sarurqanku.

²⁵Payqa nillarqantaq: — Ama mancharikuychischu, ama pisi kallpayaychischu, aswanpas kallpachakuychis, qhalichakuychis. Kikin Señor Diosmi llapan awqaykichista kay hinata ruwanqa, nispa.

²⁶Chaymantataq Josueqa reykunata wañuchirqan, hinaspa sapankata mallkiman warkurqan, chaypin ch'isiyaqta warkurayarqanku.

²⁷Inti haykuytataq Josueqa mallkimanta apaqachimurqan, hinaspa kaq pakakusqanku qaqa wasiman ayakunata wikch'uykachimurqan. Chaymantataq hatuchaq qaqakunawan punkuta wisq'achirqan, chaymi hinallapuni kashan.

²⁸Chay kikin p'unchaymi Josueqa Maceda llaqtaman phawaykuspa runakunata wañuchirqan, llaqtatapas lliwta thunirqan. Manataq ch'ullallatapas kawsashaqtaqa saqerqanchu, imaynatan Jericó reyta ruwarqan, chay hinallatataqmi Maceda llaqta reytapas ruwarqan.

²⁹Chaymantataq Josueqa Israel runakunawan Libna llaqtaman rispa maqanakurqan.

³⁰Señor Diostaq chay llaqtata reynintinta paykunaman hap'iykachirqan, manataq ch'ullallatapas kawsashaqtaqa saqerqanchu. Imaynatan Jericó llaqtata reynintapas ruwarqan, chay hinallatataqmi Libna llaqtata reynintapas ruwarqan.

³¹Chaymantataq Josueqa Israel runakunantin Libnamanta Laquisman rispa llaqtata muyuykurqanku phawaykunankupaq.

³²Qhepantin p'unchaytaq Señor Diosqa paykunaman Laquista hap'iykachirqan, chaymi Libnapi ruwasqankuta hina Israel runakunaqa llapan chaypi tiyaq runakunata espadawan wañuchirqanku.

³³Gezer llaqta rey Horamtaq soldadonkunantin Laquis llaqtata yanapaq hamurqan, Josuetaq ichaqa atipaspa chay runakunatapas lliwta wañurachirqan.

³⁴Laquismantataq Josueqa llapan Israel runakunantin Eglón llaqtaman rirqan, llaqtata muyuykuspataq phawaykurqan.

³⁵Chay kikin p'unchaymi chay llaqtata hap'irqan, hinaspan llapan chaypi tiyaqkunata wañurachirqan Laquispi ruwasqanta hina.

³⁶Eglonmantataq paykunaqa Hebrón llaqtaman wicharqanku, chaytapas phawaykullarqankutaq.

³⁷Hap'ispankutaq reyta llapan runankunatawan espadawan wañurachirqanku, hinallataq huch'uy llaqtankunatapas hap'irqanku. Lliwtapunin thunirqanku Eglonpi ruwasqankuta hina.

³⁸Chaymantapas Josueqa Israel runakunantin Debir llaqtamanñataq kutiykamurqanku, chaytapas phawaykullarqankutaq.

³⁹Hap'irqorqankutaq reyninta huch'uy llaqtankunatawan, lliw chaypi tiyaqkunatataq espadawan wañurachirqanku, manataq huk runallapas kawsarqanchu. Imaynatan Hebronta Libnata reyninkunatapas ruwarqan, chay hinallatataqmi Debir llaqtata reynintapas ruwarqan.

⁴⁰Chay hinatan Josueqa munaychakurqan orqo-orqo hap'iyta, Neguev hap'iyta, Shefela moqo-moqo hap'iyta, Shefelawan orqo-orqowan tupaypi hap'iytawan, chay hap'iykunaq reyninkunata atipaspan llapan kawsaqkunatapas ch'usaqyachipurqan, Israelpa Diosnin Señorpa kamachikusqanman hina.

⁴¹Josueqa lliwtan atiparqan Cades-barnea llaqtamanta Gaza llaqtakama, hinallataq Gosén hap'iytapas wichay lado Gabaón llaqtakama.

⁴²Señor Diosmi Israel runakunata maqanakuyninkupi yanaparqan, chaymi Josueqa hukpaqkamallaña llapan reykunata atiparqan, hinaspan hallp'ankuta qechupurqan.

⁴³Chaymantataq Josueqa llapan Israel runakunantin Gilgalpi karpankuman kutipurqanku.