Read Diospa Simin Qelqa JOSUÉ 11 Bible Online

JOSUÉ 11 - Diospa Simin Qelqa bible

JOSUÉ 11

¹Hazor llaqta rey Jabintaq Israel runakunaq imaymana ruwasqanta uyarispa, willaqkunata kacharqan Madón llaqta rey Jobabman, Simrón llaqta reyman, Acsaf llaqta reymanwan,

²hinallataq wichay lado orqo-orqopi reykunaman, Cineret qochaq uraynin Jordán qheswa wayq'o reykunaman, Shefela moqo-moqopi reykunaman, lamar-qocha pata Dor llaqtaq muyuriqninpi reykunamanpas.

³Kachallarqantaq Jordán qheswa wayq'opi tiyaq Canaán runakunaman, lamar-qocha patapi tiyaq Canaán runakunaman, orqo-orqopi tiyaq Amor runakunaman, Het runakunaman, Ferez runakunaman, Jebus runakunaman, Mizpa hap'iypi Hermón orqo qhatapi tiyaq Hev runakunamanpas.

⁴Hinan llapan chay reykunaqa lloqsimurqanku askha soldadokunantin, caballokunantin, carretakunantin ima. Paykunan karqanku qocha patapi aqo hina mana yupay atiyraq.

⁵Llapankutaq huñuykukurqanku, hinaspan Merom pukyu-pukyu patapi samarqanku Israel runakunaman phawaykunankupaq.

⁶Señor Diosmi Josueta nirqan: — Ama paykunataqa manchakuychu, paqarin kay horastan lliw wañusqataña rikuchisqaykichis. Qantaqmi caballonkuq hank'untaraq kuchunki, carretankutapas ninawan kanaykunki, nispa.

⁷Chaymi Josueqa Israel soldadokunantin qonqaylla Merom pukyu-pukyu patapi paykunaman phawaykurqan.

⁸Señor Diostaq Israel runakunawan atipachirqan, chaymi paykunaqa p'analla qatiykacharqanku hatun Sidón llaqtakama, Misrefotmaim llaqtakama, hinallataq inti lloqsimuy lado Mizpa wayq'okama. Manapunin hukllapas kawsarqanchu.

⁹Josueqa Señor Diospa nisqanta hunt'aspan caballonkuq hank'unta kuchurqarirqan, carretankutapas kanaykurqan.

¹⁰Chaymanta kutimuspataq Hazor llaqtata atiparqan, reynintapas wañuchirqan. Hazor llaqtaqa chay llaqtakunaq umanmi karqan.

¹¹Hazorpi tiyaq llapan runakunatan wañuchirqanku, llaqtankutapas kanaykurqanku.

¹²Chay hinatakaman chay huñunakuq reykunaq llaqtankunata hap'irqan, hinaspan llapanta wañuchispa llaqtakunata thunirqan, Señor Diospa kamachin Moisespa nisqanman hina.

¹³Chay tukuywanpas moqo patapi llaqtakunamantaqa Hazor llaqtallatan kanarqanku.

¹⁴Chay llaqtakunapi tiyaqkunataqa llapallantapuni wañurachispankun uywankunata lliw kaqninkutawan llat'anarqanku.

¹⁵Imaynatachus Señor Diosqa Moisesta kamachirqan, kaqllatataqmi Moisespas Josueta kamachirqan, Josuetaqmi chay kamachikuyta llapachallanta hunt'arqan.

¹⁶Chay hinatan Josueqa suyuntinta hap'ikapurqan: uray ladopi orqo-orqota, Neguev hap'iyta, Gosén llapan hap'iyta, Shefela moqo-moqotawan, Jordán qheswa wayq'ota, wichay ladopi llapan orqo-orqota, chaypi kaq moqokunatawan.

¹⁷Hap'ikapusqan suyuqa karqan uray lado Seir qaylla Halac[5] orqomanta Hermón orqo chaki Libanoq qheswanpi Baal-Gad llaqtakama, Josueqa llapantan chay llaqtakunaq reyninkunata wañuchirqan.

¹⁸Josueqa unaytan chay reykunawan maqanakurqan.

¹⁹Gabaonpi Hev runakunallan Israel runakunawanqa sumaqta rimanakurqan, wakin llaqtakunataq atipasqakama karqanku.

²⁰Señor Diosqa awqakunaq sonqontan rawrarichisqa Israel runakunawan maqanakunanpaq, chaymi Israel runakunaqa mana khuyapayaykuspa llapanta wañurachirqanku Señor Diospa Moisesta kamachisqanman hina.

²¹Chay p'unchaykunapin Josueqa Hebrón llaqtapi, Debir llaqtapi, Anab llaqtapi, uray lado orqo-orqopi, wichay lado orqo-orqopi tiyaq Anac runakunata atipaspa wañuchirqan, llaqtankunatapas thunirqan.

²²Chay hinapin Israel suyupi Anac runakunaqa llapallan wañuchisqa karqanku, aswanpas Gaza llaqtapi, Gad llaqtapi, Asdod llaqtallapiwanmi Anac runakunaqa qheparqanku.

²³Ahinatan Josueqa Señor Diospa Moisesta kamachisqanman hina suyuntinta hap'ikapurqan. Chaymantataq llapan Israel runakunaman rakirqan ayllunkunaq kasqanman hina paykunaq hallp'an kapunanpaq. Chaymantaraqmi suyuntinpi maqanakuymanta samarirqanku.