Read Diospa Simin Qelqa JOSUÉ 14 Bible Online

JOSUÉ 14 - Diospa Simin Qelqa bible

JOSUÉ 14

¹Sacerdote Eleazarwan, Josuewan, Israel ayllukunaq umallinkunawanmi Canaán suyuta Israel runakunaman rakirqanku. Kaytaqmi chaymanta willakuy.

²Paykunan chay hallp'akunata isqon ayllu kuskanniyoqman sorteaspa rakirqanku, Señor Diospa Moisesta kamachisqanman hina.

³Ñawpaqtañan Moisesqa Jordán mayu inti lloqsimuy lado hallp'akunata Rubén aylluman, Gad aylluman, Manasés aylluq kuskanninmanwan qorqan, Leví ayllumanmi ichaqa mana hallp'ata qorqanchu.

⁴(Josepa mirayninmi iskay aylluman tukurqan: Manasés aylluman, Efraín ayllumanwan). Leví ayllumanmi ichaqa mana hallp'ata qorqankuchu, aswanpas llaqtakunallata tiyanankupaq uywa michina campontinta.

⁵Ahinatan Israel runakunaqa hallp'ata rakinakurqanku Señor Diospa Moisesta kamachisqanman hina.

⁶Judá ayllu runakunataq Gilgalta rirqanku Josuewan parlaq, chaypitaq Jefoneq churin Cen runa Calebqa Josueta nirqan: — Qanqa yachankin Cades-barneapi Señor Diospa Moisesman ñoqanchismanta nisqanta.

⁷Tawa chunka watayoq kashaqtiymi, Moisesqa Cades-barneamanta hallp'a qhamiyaqta kachawarqan, kutimuspaypas ñoqaqa sut'intan willakurqani.

⁸Ñoqawan wakin riqkunan ichaqa llaqtata iskayrayachirqanku, ñoqataqmi Diosniy Señor Diospaq tukuy sonqo karqani.

⁹Chaymi Moisesqa juraspa niwarqan: Qanqa tukuy sonqopunin Señor Diospaq karqanki, chayraykun saruykusqayki hallp'aqa qanpaqpuni mirayniykipaqwan kapunqa, nispa.

¹⁰Israel runakuna ch'inneq pampapi kashallaqtinkuraqmi Señor Diosqa chayta Moisesman nirqan, chaymantapachataqmi tawa chunka phisqayoq watantin payqa kunankama kawsachikushallawanpuni. Kunanqa pusaq chunka phisqayoq watayoqñan kashani,

¹¹ichaqa hallp'a qhamiyaqta kachashawarqan chay p'unchay kallpayoq hinallaraqmi kashani. Maqanakuypi tupanaypaqpas, ima ruwanaypaqwanpas allinraqmi kashani.

¹²Chayraykun valekuyki Señor Diospa prometewasqan orqo-orqota qowanaykipaq. Qanmi uyarirqanki Anac runakunaq allichachaq hatun llaqtakunayoq chaypi tiyashasqankuta. Ichapaschá Señor Diosqa yanapawanman, yanapawaqtinqa chay runakunata qarqosaqraqmi, Señor Diospa nisqanman hina, nispa.

¹³Chaymi Josueqa Calebta samincharqan, hinaspan Hebronta qopurqan paypaq mirayninpaqwan hallp'anku kapunanpaq.

¹⁴Hinan Hebrón orqo-orqoqa chay p'unchaymantapacha Jefoneq churin Calebpa, mirayninpaqwan kapurqan, Calebpa Israelpa Diosnin Señorpaq tukuy sonqo kawsasqanrayku.

¹⁵Hebronpa ñawpaq sutintaq kasqa Quiriat-arba, Arbaqa allin reqsisqan karqan Anac runakuna ukhupi. Chaymantaraqmi suyuntinpi maqanakuymanta samarirqanku.