Read Diospa Simin Qelqa JOSUÉ 17 Bible Online

JOSUÉ 17 - Diospa Simin Qelqa bible

JOSUÉ 17

¹Hinallataq Josepa kurak churin Manasés aylluman sorteopi hallp'ata qorqanku. Manasespa kurak churinmi karqan Galaadpa taytan Maquir, allin maqanakuq qhari, paymanmi Jordán mayu inti lloqsimuy ladopi Galaad hap'iyta Basán suyutawan qorqanku.

²Manasespa wakin mirayninkunataq inti haykuy ladopi hallp'ata chaskirqanku, paykunan karqanku Josepa nieton Abiezerpa, Helecpa, Asrielpa, Shehempa, Heferpa, Semidaqpa mirayninkuna.

³Huk runan karqan Zelofehad sutiyoq, taytantaq karqan Hefer, machulankunataq Galaad, Maquir, Manasespiwan. Paypaqa manan qhari wawan karqanchu, aswanpas phisqa ususinkunallan: Maala, Noa, Hogla, Milca, Tirsapiwan.

⁴Paykunataq rirqanku sacerdote Eleazarman Josuemanwan llaqta umalli runakunamanwan, hinaspan nirqanku: — Señor Diosmi Moisesta kamachirqan ñoqaykumanpas hallp'akunata qowanankupaq aylluykumanwan kuskata, nispa. Chaymi Josueqa Señor Diospa kamachikusqanman hina ayllunkumanwan kuskata hallp'ata qoykapurqan.

⁵Chhaynapin Manasés aylluqa Jordán mayu inti lloqsimuy ladopi Galaad hap'iyta Basantawan chaskirqan, chaymantapas chaskillarqantaqmi chunka t'aqa hallp'akunatawanraq,

⁶Manasespa ususinkuna qharikunawan kuska hallp'ata chaskisqankuraykun, Galaad hap'iyqa Manasespa wakin mirayninkunapaq karqan.

⁷Manasés ayllu hallp'ataq karqan Asermanta Shehem inti lloqsimuy ladopi Micmetatkama, chaymantataq qorpanqa uray ladoman aysakurqan Tapuapi pukyukama.

⁸Hinaña Manasés aylluq Tapúa hallp'an karqan chaypas, kikin Manasespa qorpanpi kaq Tapúa llaqtaqa Efraín aylluqmi karqan.

⁹Tapuapi pukyumanta qorpaqa uraykurqan Caná mayukama. (Mayuq uray ladonpi Manasés hallp'api llaqtakunan Efraín aylluq kapurqan). Chaymantataq qorpaqa rirqan mayuq wichay lado patanta lamar-qochakama.

¹⁰Efraín hallp'ataq mayuq uray ladonpi karqan, Manasés aylluñataq mayumanta wichayman karqan. Lamar-qochataq inti haykuy ladomanta qorpa karqan. Manasespa wichay ladon qorpataq Aser aylluwan karqan, inti lloqsimuy lado wichaymantataq Isacar aylluwan karqan.

¹¹Hinallataq Manasesman tuparqan Isacarpa, Aserpawan hallp'anpi kay llaqtakuna ayllukunantin: Bet-seán, Ibleam, lamar-qocha patapi Dor, Endor, Taanac, Meguidopiwan.

¹²Manasés ayllun ichaqa chay llaqtakunata mana hap'ikapuyta atirqankuchu, Canaán runakunan mana kuyuriyta munaspanku kikinpi tiyakapurqanku.

¹³Chaymantañan Israel runakunaqa qhepaman allin kallpayoq kapuspa Canaán runakunawan mit'anipi servichikurqanku, manataq qarqoyta atirqankuchu.

¹⁴Josepa miraynintaq Josueta nirqan: — ¿Imanaqtintaq sorteaspa huk t'aqa hallp'allata qowankiku? Señor Diosmi saminchawanku, chaymi askhallaña kapuyku, nispa.

¹⁵Josuetaq paykunata nirqan: — Askhañataq qankuna kankichis, manañataq Efraín orqo-orqopas taripasunkichisñachu chayqa, sach'a-sach'ata rispa sach'akunata kumpaspa Ferez runakunaq Refaim runakunaqpiwan hallp'ankuta llank'akamuychis, nispa.

¹⁶Paykunataq nirqanku: — Chay orqo-orqopas manan aypawankuñachu. Pampapi tiyaq Canaán runakunapas Bet-seanpi ayllunkunantinpi tiyaqkunapas, Jezreel pampapi tiyaqkunapas fierro carretakunayoqmi kanku, nispa.

¹⁷Chaymi Josueqa Efraín aylluta Manasés ayllutawan nirqan: — Qankunaqa askhamá kankichis, kallpasapakunataq, chayraykun mana huk t'aqa hallp'allachu qankunapaq kanqa,

¹⁸aswanpas chay sach'akunayoq orqo-orqopas qankunaqmi kanqa, sach'akunata kumpaspa llapanpi tiyakapuychis. Canaán runakunatataq chaymanta qarqopunkichis, hinaña paykuna kallpasapa fierro carretakunayoq kanku chaypas, nispa.