Read Diospa Simin Qelqa JOSUÉ 18 Bible Online

JOSUÉ 18 - Diospa Simin Qelqa bible

JOSUÉ 18

¹Llapan suyu atipasqaña kashaqtinmi, lliw Israel ayllukunaqa Silopi huñuykukuspa Dios yupaychana karpata karparqanku.

²Karqanraqmi Israel runakunamanta qanchis ayllu hallp'ankuta mana chaskiqkuna.

³Chaymi Josueqa Israel runakunata nirqan: — ¿Hayk'aqkaman suyankichis taytaykichispa Diosnin Señorpa qosqasuykichis hallp'ata hap'ikapunaykichispaq?

⁴Akllaychis sapanka ayllumanta kinsa qharikunata, paykunatataq kachasaq llapan hallp'ata qhawamunankupaq. Hinan suyuntinta rispa tukuy rikusqankuta qelqamunqaku, kutimuspataq willawanqaku.

⁵Chay hallp'atan qanchisman t'aqamunqaku, Judá aylluta uray ladoman saqerparispa, Josepa miraynintapas wichay ladoman saqerparispa.

⁶Chay hallp'ata qanchisman t'aqarqarimuspataq qelqasqata apamuwanqaku, ñoqataq Diosninchis Señor Diospa qayllanpi sorteasaq.

⁷Leví ayllumanmi ichaqa mana maypipas hallp'ata qonqakuchu, paykunaq herencianqa Señor Diospa sacerdoten kayninkun. Gad ayllupas, Rubén ayllupas, Manasespa kuskan ayllunpas hallp'ayoqñan kanku Jordán mayu inti lloqsimuy ladopi, chaytan Señor Diospa kamachin Moisesraq qorqan, nispa.

⁸Hallp'a qhawaq riqkunataq puririnankupaq q'epichakurqanku, hinan Josueqa kamachirqan: — Riychis, llapan suyuta t'aqarqarimuychis. T'aqasqaykichistataq qelqamunkichis. Tukuspataq kayman kutimunkichis Señor Diospa qayllanpi sorteanaypaq, nispa.

⁹Chay runakunataq puririrqanku suyuntinta muyumunankupaq, hinaspan qanchis t'aqaman suyuta t'aqamuspa qelqamurqanku. Chaymantan Josuepa kasqan Silopi karpa-karpaman kutimurqanku.

¹⁰Chaypitaq Josueqa Señor Diospa qayllanpi sorteaspa, hallp'akunata Israel runakunaman rakiykapurqan.

¹¹Benjamín aylluq mirayninkunapaq sorteaqtinkutaq hallp'aqa tuparqan, Judá aylluq Josepa miraynin ayllukunaq chawpinpi.

¹²Wichay ladon qorpataq qallarirqan Jordán mayumanta, chaymantataq wicharqan Jericó wichay lado qhatanta, chaymantataq qorpaqa orqo-orqonta inti haykuy ladoman rirqan, chaymantataq Bet-avenpa ch'inneqninman lloqsirqan.

¹³Chaymantataq Betel nisqa Luz llaqtanta uray ladoman rirqan, chaymantataq uraykurqan Ura Bet-horonpa uran orqopi Atarot-adarkama.

¹⁴Chaymantataq qorpaqa kutirirqan uray ladoman Bet-horonpa ñawpaqenpi orqoq wichay lado qhatanta Quiriat-jearim nisqa Quiriat-baalkama (chay llaqtaqa Judá aylluqmi karqan). Chaytaq inti haykuy qorpa karqan.

¹⁵Uray lado qorpataq Quiriat-jearimmanta Neftoa pukyukama rirqan,

¹⁶chaymantataq uraykurqan Ben-hinom wayq'oq ñawpaqenpi orqo chakikama (chay orqoqa Refaim wayq'oq wichay ladonpin karqan). Chaymantataq uraykurqan Jebusman seqamuna uray lado Ben-hinom wayq'onta En-rogelkama aysakamuspa.

¹⁷Chaymantataq kutirirqan wichay ladoman, lloqsirqantaq Ensemesman, chaymantataq aysakurqan Adumín wichana qhataq ñawpaqenpi Gelilotkama, chaymanta uraykurqan Rubenpa churin nisqa Bohán Qaqakama.

¹⁸Chaymantataq Jordán qheswa wayq'oq ñawpaqen qhataq wichay ladonta Jordán mayukama aysakurqan.

¹⁹Bet-hoglaq wichay lado wasanta pasaspataq Kachi Qochaman uraykurqan, Jordán mayuq haykunan patapitaq tukukurqan. Chaytaq uray ladon qorpa karqan.

²⁰Jordán mayutaq inti lloqsimuy ladomanta qorpa karqan. Chaykunan karqan Benjamín aylluq mirayninkunaman qosqa hallp'akunaq qorpankuna.

²¹Benjamín aylluq mirayninkunaman qosqa llaqtakunan kaykuna karqan: Jericó, Bet-hogla, Emec-casis,

²²Bet-arabá, Zemaraim, Betel,

²³Avim, Pará, Ofra,

²⁴Quefar-haamoni, Ofni, Gabapiwan, llapanpin chunka iskayniyoq llaqtakuna ayllukunantin karqan.

²⁵Chaymantapas Gabaón, Ramá, Beerot,

²⁶Mizpa, Cafira, Mozah,

²⁷Requem, Irpeel, Tarala,

²⁸Zela, Elef, Jebus (chayqa Jerusalenmi), Gabaa, Quiriat-jearimpiwan, llapanpi chunka tawayoq llaqtakuna ayllukunantin. Chay llaqtakunan rakisqa karqan Benjamín aylluman mirayninkunaman hina.