Read Diospa Simin Qelqa JOSUÉ 2 Bible Online

JOSUÉ 2 - Diospa Simin Qelqa bible

JOSUÉ 2

¹Chaymantataq Nunpa churin Josueqa Sitim[1] pampamanta iskay qhamiyaqta pakallapi kachaspa nirqan: — Riychis, chay suyuta qhawararqamuychis, aswantaqa Jericó llaqtata, nispa. Paykunataq rispanku, Jericopi rabona Rahab warmiq wasinman haykuykurqanku, chaypitaq qorpachakurqanku.

²Chaytan Jericó llaqta reyman willarqamurqanku: — Israel runakunan llaqtanchis qhawaraq hamusqaku, nispa.

³Chaymi reyqa Rahabman kachaspa nichimurqan: — Wasiykiman haykumuq qharikunata horqomuy, paykunaqa llaqtanchis hallp'anchis qhawaraqmi hamunku, nispa.

⁴Warmitaq ichaqa iskaynin qhamiyaq qharikunata pakarqamusqaña, hinaspa nirqan: — Arí, chay runakunaqa hamusqakun wasiyta, ichaqa manan yacharqanichu maymantachus kasqankuta.

⁵Llaqta punku wisq'ana horastan tutayarqoshaqtinña chay runakunaqa kaymanta lloqsirqapunku, manataqmi yachanichu maymanchus risqankuta. Qhepantayá phawaychis, tariparqonkichisraqmi, nispa.

⁶Warmitaq ichaqa chay iskaynin qhamiyaqkunata wasi pataman wicharqachispa pakarqamurqan ch'akinanpaq churasqa lino montón ukhuman.

⁷Hinan reypa runankunaqa maskhaq puririrqanku Jordán mayu chimpanakama. Qatipaq lloqsiqtinku hinataq, llaqta punkutaqa wisq'apurqanku.

⁸Rahabtaq wasi pataman seqarqorqan pakasqan runakuna manaraq puñushaqtin,

⁹hinaspa nirqan: — Ñoqaqa yachanin kay hallp'ata Señor Dios qopusqasuykichista, chaymi ñoqaykuqa sinchita manchakushaykiku, llapan kay suyupi tiyaqkunan qankuna hawa pasaqllataña khatatataykushayku.

¹⁰Uyarirqaykun qankuna Egiptomanta lloqsimushaqtiykichis Puka Qochata chimpanaykichispaq Señor Diospa ch'akirqachisqanta. Yachallarqaykutaqmi Jordanpa chimpanpi Amor runakunaq iskaynin reyninta, Sehonta Ogtawan, wañuchisqaykichistapas.

¹¹Chayta uyarirqospayku hinallaraqmi pasaqta mancharikurqayku, llaksakuymantan kallpaykupas chiriyapurqan. Diosniykichis Señor Diosqa hanaq pachapipas kay pachapipas Diosmi.

¹²Chayraykun ñoqa valekuykichis, Señor Diospa sutinpi juraspa niwaychis, ñoqata llapa familiaytawan khuyapayawanaykichispaq, imaynan ñoqapas sumaqta khuyapayarqaykichis hinata. Kunanqa imallatapas saqeykuwaychis hunt'aq runa kasqaykichista yachanaypaq.

¹³Chay hinaqa, amapuni wañuchiwankikuchu tayta-mamayta, turaykunata, ñañaykunata, paykunaq wawankunatawan, nispa.

¹⁴Paykunataq nirqanku: — Kay rimasqaykuta mana hunt'aqtiykuqa Señor Dios ñoqaykuta wañuchiwachunku. Qanpas amapunin ima ruwashasqaykutapas pimanpas rimarinkichu. Señor Dios kay hallp'ata qowaqtinkun ñoqaykuqa rimarisqaykuta hunt'aspa khuyapayasqaykiku, nispa.

¹⁵Rahabqa tiyarqan kikin llaqta perqa patapi ruwasqa wasipin, chaymi payqa wasi ventananta waskhawan warkuykuspa paykunata kacharparipurqan.

¹⁶Niykurqantaq: — Orqo-orqoman ripuychis ama maskhaqniykichiswan qonqay tupanaykichispaq. Kinsa p'unchaymi pakakunkichis paykuna kutimunankukama, chaymantañan ripunkichis, nispa.

¹⁷Qharikunataq payta nirqanku: — Qanpa jurachiwasqaykikutaqa hunt'asaqkupunin.

¹⁸Llaqtaman haykumushaqtiykun, lloqsipusqayku ventanaman kay yawar puka waskhata warkuykunki. Wasiykimantaq huñunki tayta-mamaykita, turaykikunata, ñañaykikunata, taytaykiq llapan ayllunkunatawan.

¹⁹Pillapas wasiykimanta lloqsirqamunqa chayqa, wañuchisqan kanqa, ñoqaykuqa manan ima huchayoqpaschu kasaqku. Qanwan kuska kashaqtataqchus imananqakupas chaymi ichaqa, ñoqaykuq huchayku kanqa.

²⁰Imallatapas hamusqaykumanta rimayta ch'eqechinki chayqa, qanpa jurachiwasqaykikutaqa manañan hunt'anaykuñachu kanqa, nispa.

²¹Rahabtaq nirqan: — Arí, qankunaq nisqaykichis hinapuni kachun, nispa. Kacharparipuqtintaq qharikunaqa ripurqanku. Chaymantataq ventanaman yawar puka waskhata warkullarqanña.

²²Iskaynin qhamiyaqkunataq orqo-orqoman rirqanku, chaypin kinsa p'unchay pakakamurqanku. Maskhaqkunataq hinantinta maskhaykurqanku, mana tarispankutaq Jericoman kaqta kutiykapurqanku.

²³Hinan iskayninku orqo-orqomanta uraykamurqanku, Jordán mayuta chimpaspankutaq Josuepa kasqanman chayapurqanku. Paymantaq lliwta willaspa

²⁴nirqanku: — Cheqaqtapunin Señor Diosqa llapan chay suyuta qowanchis, ñoqanchis hawan kikinpi tiyaqkunapas khuyaytaña manchakushanku, nispa.