Read Diospa Simin Qelqa JOSUÉ 21 Bible Online

JOSUÉ 21 - Diospa Simin Qelqa bible

JOSUÉ 21

¹Leví aylluq umallinkunan rirqanku sacerdote Eleazarman, Numpa churin Josueman, Israel ayllukunaq kurak taytankunamanwan.

²Paykunan Canaán suyu Silo llaqtapi kasharqanku, hinaspan nirqanku: — Señor Diosqa Moiseswanmi kamachikurqan tiyanaykupaq llaqtakunata, uywa michinaykupaq campoyoqta qowanaykikupaq, nispa.

³Chaymi Israel runakunaqa Señor Diospa kamachikusqanman hina paykunaq hallp'ankupi llaqtakunata uywa michina campoyoqta Leví runakunaman qorqanku.

⁴Ñawpaqtan Leví ayllu Cohatpa mirayninkunaman llaqtakunata qonankupaq sortearqanku. Chaymi sacerdote Aaronpa mirayninkunaman chunka kinsayoq llaqtakunata qorqanku Judá ayllumanta, Simeón ayllumanta, Benjamín ayllumantawan.

⁵Wakin Cohatpa mirayninkunamantaq sorteaspa chunka llaqtakunatawan qorqanku Efraín ayllumanta, Dan ayllumanta, Manasés aylluq kuskanninmantawan.

⁶Chaymantataq Gersonpa mirayninkunaman sorteaspa chunka kinsayoq llaqtakunata qorqanku Isacar ayllumanta, Aser ayllumanta, Neftalí ayllumanta, Basanpi kaq Manasés aylluq kuskanninmantawan.

⁷Merariq mirayninkunamantaq chunka iskayniyoq llaqtakunata qorqanku Rubén ayllumanta, Gad ayllumanta, Zabulón ayllumantawan.

⁸Chay hinatan Israel runakunaqa sorteaspa Leví runakunaman llaqtakunata uywa michina campoyoqtakama qorqanku, Moiseswan Señor Diospa kamachikusqanman hina.

⁹Chay qosqanku llaqtakunaqa karqan, Judá ayllumanta, Simeón ayllumantawanmi.

¹⁰Ñawpaqtan sortearqanku Aarón miray Leví ayllu Cohatpa mirayninkunaman llaqtakunata qonankupaq, kay llaqtakunatan qorqanku:

¹¹Judá orqo-orqopi Hebrón nisqa Quiriat-arbata llaqta muyuriq uywa michina campontinta qorqanku. (Arbaqa Anacpa taytanmi karqan).

¹²Aswan ñawpaqtaraqmi Jefoneq churin Calebman kay llaqtaq camponkunata chakrakunantinta qorqanku.

¹³Hebrontaq karqan mana yuyaypichu runa wañuchiqkunaq pakakunan llaqta. Sacerdote Aaronpa mirayninmanqa kay llaqtakunatapas qollarqankutaqmi: Libnata,

¹⁴Jatirta, Estemoata,

¹⁵Holonta, Debirta,

¹⁶Ainta, Jutata, Bet-semestawan, isqon llaqtakunata uywa michina campoyoqtakama.

¹⁷Benjamín ayllumantataq qorqanku Gabaonta, Gebata,

¹⁸Anatot-ta, Almontawan, chay tawantin llaqtakunata uywa michina campoyoqtakama.

¹⁹Ahinapin sacerdote Aaronpa mirayninpa llaqtankunaqa chunka kinsayoq karqan uywa michina campoyoqkama.

²⁰Wakin Leví t'aqa Cohatpa mirayninkunamantaq Efraín ayllumanta llaqtakunata qorqanku.

²¹Efraín orqo-orqopi kaq Shehemta qorqanku, chay llaqtan karqan mana yuyaypichu runa wañuchiqkunaq pakakunanpaq. Qollarqankutaqmi Gezerta,

²²Kibsaimta, Bet-horontawan, tawantin llaqtakunata uywa michina campoyoqtakama.

²³Dan ayllumantataq chaskirqanku Eltequeta, Gibetonta,

²⁴Ajalonta, Gat-rimontawan, tawantin llaqtakunata uywa michina campoyoqtakama.

²⁵Manasés aylluq kuskanninmantataq chaskillarqankutaq Taanacta Gat-rimontawan uywa michina campoyoqtakama.

²⁶Chay hinapin chay Cohatpa mirayninkunaq llaqtankunaqa chunka karqan.

²⁷Gersonpa mirayninkunamantaq Manasés aylluq kuskanninmanta iskay llaqtata qorqanku, uywa michina campoyoqtakama: Beesterata, Basanpi kaq Golantawan, chay llaqtan karqan mana yuyaypichu runa wañuchiqkunaq pakakunanpaq.

²⁸Isacar ayllumantataq qorqanku Cisonta, Daberat-ta,

²⁹Jarmut-ta, En-ganimtawan, tawantin llaqtakunata uywa michina campoyoqtakama.

³⁰Aser ayllumantan qorqanku Misaelta, Abdonta,

³¹Helcat-ta, Rehobtawan, tawantin llaqtakunata uywa michina campoyoqtakama.

³²Neftalí ayllumantataq qorqanku kinsa llaqtakunata uywa michina campoyoqtakama: Hamot-dorta, Cartanta, Galileapi kaq Cedestawan, chay llaqtan karqan mana yuyaypichu runa wañuchiqkunaq pakakunanpaq.

³³Chay hinapin Gersonpa mirayninkunaq llaqtankuna chunka kinsayoq karqan.

³⁴Wakin Leví runakuna Merariq mirayninkunaman Zabulón ayllumanta qorqanku Jocneamta, Cartata,

³⁵Dimnata, Naalaltawan, tawantin llaqtakunata uywa michina campoyoqtakama.

³⁶Rubén ayllumantapas qollarqankutaq Beserta, Jahazata,

³⁷Cademot-ta, Mefaat-tawan, tawa llaqtakunata uywa michina campoyoqtakama.

³⁸Gad ayllumantapas qollarqankutaq Galaadpi Ramot-ta, chay llaqtan karqan mana yuyaypichu runa wañuchiqkunaq pakakunanpaq. Qollarqantaqmi Mahanaimta,

³⁹Hesbonta, Jazertawan, tawa llaqtakunata uywa michina campoyoqtakama.

⁴⁰Chay hinapin Merariq mirayninkunaq llaqtankuna chunka iskayniyoq karqan.

⁴¹Israel runakunaq hallp'anpin tawa chunka pusaqniyoq llaqtakunata uywa michina campoyoqtakama Leví runakunaman qorqanku.

⁴²Chay llaqtakunaqa sapankan muyuriqninpi uywa michina campoyoqkama karqan.

⁴³Ahinatan Señor Diosqa Israel runakunaq ñawpa taytankunaman: Qosqaykichis, nispa jurasqan hallp'ata paykunaman qoykapurqan, paykunataq chayta hap'ikapuspa tiyakapurqanku.

⁴⁴Señor Diosqa rimarisqanta hunt'aspan suyuntinta thak-kaypi tiyachirqan. Chaymi awqankuqa mana Israel runakunawan churanakuyta atirqankuchu, aswanmi Señor Diosqa awqankuta paykunaman hap'iykachirqan.

⁴⁵Señor Diospa Israel runakunaman allin rimarisqan simikunaqa llapanpunin hunt'akurqan.