Read Diospa Simin Qelqa JOSUÉ 22 Bible Online

JOSUÉ 22 - Diospa Simin Qelqa bible

JOSUÉ 22

¹Chaymantataq Josueqa Rubén aylluta, Gad aylluta, Manasés aylluq kuskannintawan waqyarispa

²nirqan: — Qankunan Señor Diospa kamachin Moisespa kamachikusqantapas ñoqaq kamachikusqaytapas llapanta kasukurqankichis.

³Kunankaman wawqeykichiskunataqa manapuni saqerparirqankichischu, cheqaqtapunin hunt'arqankichis Diosninchis Señor Diospa kamachikusqantaqa.

⁴Señor Diospas rimarisqantaqa hunt'anmi, wawqeykichiskunata sumaq kawsaypi tiyachispa. Chay hinaqa, qankunapas ripuychis Jordán mayu inti lloqsimuy ladopi Señor Diospa kamachin Moisespa qosqasuykichis hallp'api wasiykichisman.

⁵Chaypitaq Moisespa kamachisqasuykichis kamachikuytapas yachachikuytapas llapantapuni hunt'ankichis, Diosninchis Señor Diostan munakunkichis, munaynintan hunt'ankichis, kamachikuyninkunatan ruwankichis, paymanpunin k'askakunkichis, tukuy almaykichiswan, tukuy sonqoykichiswan payta kasukunkichis, nispa.

⁶Chaymantataq Josueqa paykunata saminchaykuspa kacharparipurqan, hinan paykunaqa wasinkuman ripurqanku.

⁷Manasés aylluq hukkaq kuskanninmantaq Moisesraq Basán hap'iypi hallp'ata ñawpaqraq qosqa, hukkaq kuskanninmantaq Josueña Jordán mayu inti haykuy ladopi Israel runakunaq hallp'an ukhupi hallp'ata qorqan. Ahinatan Josueqa paykunata saminchaykuspa wasinkuman kacharparipurqan.

⁸Kay hinatataq niykurqan: Kunanmi wasiykichisman kutipunkichis askha imaymanayoq, askha uywakunayoq, qoriyoq, qolqeyoq, bronceyoq, fierroyoq, askha p'achakunayoq ima. Awqaykichismanta qechusqaykichistaqa chaypi wawqeykichiskunaman phasmiykunkichismi, nispa.

⁹Ahinapin Canaán suyu Silopi kashaspanku, Rubén ayllu, Gad ayllu, Manasés aylluq kuskanninpiwan wakin Israel wawqenkumanta t'aqanaykakapurqanku. Hinaspan Galaadpi wasinkuman kutipurqanku, chay ñawpaqña Señor Diospa Moiseswan kamachikusqanman hina hap'isqanku hallp'aman.

¹⁰Rubén ayllu, Gad ayllu, Manasés aylluq kuskanninpiwan Jordán mayu qaylla Gelilotman chayaspanku hinan, Canaán hallp'a ukhullapiraq kashaspanku, mayu patapi hatun altarta perqarqanku.

¹¹Israel runakunataq uyarirqanku: Rubén ayllu, Gad ayllu, Manasés aylluq kuskanninpiwansi hallp'anchis ukhu Jordán mayu pata Gelilotpi altarta ruwakunku, nisqata.

¹²Chayta yachaspanku hinan Silopi llapanku huñunakurqanku paykunawan maqanakuq rinankupaq.

¹³Ñawpaqtaqa sacerdote Eleazarpa churin Fineestan Galaadman rinanpaq kacharqanku, Rubén ayllu, Gad ayllu, Manasés aylluq kuskanninpa kasqanman.

¹⁴Paywantaq rirqanku Israelpa chunka aylluq umalli runankuna.

¹⁵Galaadpi Rubén ayllu, Gad ayllu, Manasés aylluq kuskanninpa kasqanman chayaspankutaq nirqanku:

¹⁶— Ñoqaykun Señor Diospa llaqtanpa sutinpi niykiku: ¿Imanaqtinmi kay hatun huchata ruwarqankichis Israelpa Diosnin contra? ¡Qankunan mana kasurqankichischu, Señor Diosta wasanchaspataq huk altarta ruwakamusqankichis!

¹⁷¿Manachu Peor nisqa cheqaspi huchallikusqapas pasaqta qhellichaykuwarqanchis? Manaraqmi chaymantapas ch'uyanchasqaraqchu kashanchis, chay hucha hawataqmi Diospa phiñakuyninwan askha runakuna wañurarqanku.

¹⁸Chay tukuypiwanpas, ¿manachu manchakunkichis Señor Diosmanta t'aqakuyta? Manapunitaqchus kasukunkichis chayqa, paqarinpachan Señor Diosqa llapan Israel llaqtapaq phiñakunqa.

¹⁹Kay hallp'aykichispi tiyaspa Señor Diosta mana yupaychayta atinkichis chayqa, Señor Diospa hallp'anpi karpanpa kasqanman hampuychis. Ñoqayku ukhupi hallp'ata hap'ikuspa tiyakapuychis. Ichaqa ama Señor Dios contrapas ñoqayku contrapas sayariychischu, Diosninchis Señor Diospa altarnin kashaqtin wak altarta ruwakamuspaykichisqa.

²⁰Yuyariychisyá Zeraq churin Ahanmanta, paymi huchallikurqan Señor Diospa sutinpi ch'usaqyachinapaq kaqta hoqarispa, chay huchamantan llapan Israel llaqtapaq Señor Diosqa phiñakurqan. ¡Manataqmi sapan Ahanllachu huchallikusqanmantaqa wañurqan! nispa nirqanku.

²¹Hinaqtinmi Rubén ayllu, Gad ayllu, Manasés aylluq kuskanninpiwan Israel umalli runakunata nirqanku:

²²— ¡Señor Diosmi dioskunaq Diosninqa! ¡Señor Diosmi dioskunaq Diosninqa! Señor Diosmi yachan imachus ruwasqaykutapas, chay ruwasqaykutataqmi munayku Israel runakunaq yachananta. Señor Dios contra hatarispa, mana iñiqman tukuspa chayta ruwarqayku chayqa, ama khuyapayaspa wañuchipuwayku.

²³Señor Diosmanta t'aqakapunayku yuyaywanchus chay altarta ruwakurqayku, otaq chaypi ruphachina sacrificiota, ruru ofrendata, sumaq kawsay sacrificiotapas haywasaqku chayqa, kikin Señor Diospuni muchuchiwachunku.

²⁴Ichaqa manan chay yuyaywanchu ruwarqayku, ñoqaykuqa manchakurqaykun wawaykichiskuna, wawaykuta qhepa p'unchayman: ¿Iman ruwanaykichis Israelpa Diosnin Señorniykuwan? ninankuta.

²⁵Señor Diosmi Jordán mayuta churarqan qankuna Rubén ayllu Gad ayllupiwan qorpanchis kananpaq, manan ñoqaykuwan imapas ruwanaykichischu Señor Diosniykuwanpas, nispa wawaykuta ninankuta. Chay hinapin wawaykichis wawaykuq Señor Dios yupaychananta qonqachipunkuman.

²⁶Chayraykun huk altar perqayta yuyaykurqayku, ichaqa manan Señor Diosman ruphachina sacrificiotapas ima rikch'aq ofrendatapas haywanaykupaqchu,

²⁷aswanmi qankunawan ñoqaykuwan wawanchiskunawanpas huk yuyariy kanallanpaq. Chay altarqa willakunqan ñoqaykupas Señor Dios yupaychayta atisqaykuta, kaqllataq ruphachina sacrificiotapas, huchamanta sacrificiotapas, sumaq kawsay sacrificiotapas Señor Diospa ñawpaqenpi haywaq kasqaykutawan willakunqa. Chay hinapin qhepa p'unchayman wawaykichis wawaykuta mana niyta atinqakuchu: ¿Iman Señor Diosniykuwan ruwanaykichis? nispa.

²⁸Yuyaykullarqaykutaq: Pipas chaymanta imatapas ñoqaykutapas wawaykutapas tapuwankuman chayqa, nisaqku: ¡Qhawariychis! Ñawpa taytaykun Señor Diospa altarninman rikch'akuqta ruwarqanku, ichaqa manan ruphachina sacrificiotapas sumaq kawsay sacrificiotapas haywanaykupaqchu, aswanmi ñoqaykuqpas qankunaqpas yuyarinallanchispaq, nispa ninaykupaq.

²⁹Ñoqaykuqa manan hayk'aqpas Dios contraqa sayariykumanchu qonqaykumanpaschu, huk altarta ruwaspayku ruphachina sacrificiota, ruru ofrendata, sumaq kawsay sacrificiotapas haywanaykupaq. Señor Diospa karpanpa ñawpaqenpi altar kashaqtinqa, manan huk altartaqa ruwaykumanchu, nispa.

³⁰Sacerdote Fineesmi paywan riq llaqtaq umalli runankunapiwan uyarirqanku Rubén aylluq, Gad aylluq, Manasés aylluq kuskanninpiwan rimarisqankuta, allintaq paykunamanqa rikch'akurqan.

³¹Chaymi sacerdote Eleazarpa churin Fineesqa nirqan: — Kunanqa allintan yachayku Señor Diosqa ñoqanchiswan kashasqanta, qankunapas mana pay contrachu sayarisqaykichista, chay hinapin Señor Diospa ñak'arichinanmanta Israel llaqtata qespichinkichis, nispa.

³²Chaymantataq Fineesqa paywan riqkunapiwan paykunawan kacharparinakamurqanku, hinaspan Galaad suyumanta kutimpurqanku wakin Israel runakunaq tiyasqan Canaanman. Chay Canaanpi kaqkunaman wakin ayllukunaq nimusqanta willaqtinkutaq,

³³paykunaqa: — Allinmi, nirqanku, hinaspataq Diosta yupaycharqanku. Chaymantapachataq manaña astawan yuyaykurqankuchu Rubén ayllu, Gad ayllu, Manasés aylluq kuskannin contra sayarispa hallp'anku purunyachimuytaqa.

³⁴Rubén ayllu Gad ayllupiwantaq nirqanku: — Kay altarmi kanqa ñoqanchis ukhupi Señor Diosqa Diospuni kasqanta willakuq, nispa. Chaymi altar ruwasqankuta suticharqanku: “Willakuq”, nispa.