Read Diospa Simin Qelqa JOSUÉ 4 Bible Online

JOSUÉ 4 - Diospa Simin Qelqa bible

JOSUÉ 4

¹Llapallan runakuna mayuta chimpaqtinku hinan, Señor Diosqa Josueta nirqan:

²— Sapanka ayllumanta huk qharita akllaychis.

³Hinaspan paykunata kamachinki sacerdotekunaq sayasqan Jordán mayu chawpimanta chunka iskayniyoq rumikunata horqomunankupaq. Chaytan kunan tuta apanqaku maypichus puñunkichis chay cheqasman churanankupaq, nispa.

⁴Chaymi Josueqa chunka iskayniyoq akllasqan runakunata waqyaspa

⁵nirqan: — Mayu chawpiman kutiykuychis Diosniykichis Señor Diospa arcanpa kashasqanman. Sapankaykichistaq chay cheqasmanta huk rumitakama rikraykichispi aparikamunkichis, Israelpa chunka iskayniyoq ayllunpa kasqanman hina.

⁶Chay rumikunataqmi yuyarichisunkichis imatachus Señor Diospa ruwapusqasuykichista. Hinan qhepa p'unchayman wawaykichiskuna tapuspa: “¿Imapaqtaq chay tawqasqa rumikunari?” niqtinku,

⁷willankichis: Sacerdotekuna Señor Diospa arcanta wantuspa Jordán mayuman haykuqtinkun mayuqa iskayman t'aqakurqan. Chayta yuyarinanchispaqmi chay rumikunataqa tawqarqanku, nispaykichis, nispa.

⁸Paykunataq Josuepa kamachisqanta hina ruwarqanku, Jordán mayu chawpimanta chunka iskayniyoq rumikunata horqomurqanku, sapanka ayllupaq huk rumitakama. Chaytataq karpankuq kasqanman apaspa chaypi tawqarqanku, Señor Diospa Josueta nisqanman hina.

⁹Josuepas Jordán mayu chawpipi chunka iskayniyoq rumita tawqallarqantaq Señor Diospa arcanta wantuq sacerdotekunaq sayasqan cheqaspi. Chay rumi tawqasqataq kashallaqpuni.

¹⁰Rimanakuy arcata wantuq sacerdotekunan Jordán mayu chawpipi sayaykurqanku, Josuewan Señor Diospa kamachisqanta Israel runakunaq lliwta ruwanankama. Llapallanmi ruwakurqan Moisespa Josueman kamachisqanman hina. Runakunataq usqhayllata chimparqorqanku.

¹¹Llapanku mayuta chimparqoqtinkuñan sacerdotekunapas chimpamullarqankutaq Señor Diospa arcanta wantuykukuspa, hinaspataq runakunaq ñawpaqenman churaykurqanku.

¹²Moisespa kamachisqanman hinan Rubén ayllu, Gad ayllu, Manasés kuskan ayllu maqanakuqkunapas wakin Israel runakunaq ñawpaqenta rispa maqanantinkama chimparqanku.

¹³Llapankutaq yaqa tawa chunka waranqa hina Señor Diospa qayllanpi Jericó pampaman maqanakunankupaq chayarqanku.

¹⁴Chay p'unchaymi Señor Diosqa Josueta hatuncharqan Israel runakunaq qayllanpi, chaymi paykunaqa wañukapunankama respetarqanku, imaynan Moisestapas respetarqanku hinata.

¹⁵Chaymantataq Señor Diosqa Josueta nirqan:

¹⁶— Kamachikuy simi qelqayoq arcata wantuq sacerdotekunata kamachiy mayumanta lloqsimunankupaq, nispa.

¹⁷Josuetaq sacerdotekunata kamachirqan lloqsimunankupaq,

¹⁸paykunataq mayumanta lloqsimuspanku, chayllaraq ch'aki pampaman saruykuqtinku hina, mayuqa kaqta suchuripurqan chimpa-chimpantinta llimp'asparaq.

¹⁹Israel runakunaqa Jordán mayuta chimparqanku wata qallariy killaq chunkakaq p'unchayninpin, Gilgalpitaq karpakurqanku Jericó llaqtaq inti lloqsimuy ladonpi.

²⁰Chaypin Josueqa Jordanmanta apasqanku chunka iskayniyoq rumikunata tawqaykurqan,

²¹Israel runakunatataq nirqan: — Qhepa p'unchayman wawaykichiskuna tapuspa: ¿Imapaqtaq chay rumikuna tawqasqari? niqtinkun,

²²qankunaqa paykunaman willankichis: Ñoqaykun Jordán mayuta ch'akita chimpamurqayku.

²³Diosniykichis Señor Diosmi mayuta ch'akichirqan chimpamunaykupaq, imaynan Puka Qochatapas ch'akichirqan chimpamunaykupaq hinata, nispaykichis.

²⁴Señor Diosmi chaykunata ruwarqan tukuy-atiyniyoq kasqanta kay pachantinpi lliw llaqtakuna yachanankupaq, hinallataq qankunapas Diosninchis Señor Diosllatapuni yupaychanaykichispaq, nispa.