Read Diospa Simin Qelqa JOSUÉ 7 Bible Online

JOSUÉ 7 - Diospa Simin Qelqa bible

JOSUÉ 7

¹Judá ayllumantan huk qhari karqan Ahán sutiyoq, taytanmi karqan Carmi, Carmiq taytantaq Zabdi, Zabdiq taytantaq Zera. Paymi Señor Diospa sutinpi ch'usaqyachinapaq kaqkunamanta imaymanata hoqarikurqan. Chayraykun llapa Israel runakunaqa huchachasqa rikukurqanku, Señor Diospa phiñakuynintaq paykunapaq rawrarirqan.

²Josuemi Jericomanta Hai llaqtaman runakunata kachaspa nirqan: — Wichaychis, hinaspa chay hap'iyta qhawaramuychis, nispa. Paykunataq rispanku Hai llaqtata qhawaramurqanku. Chay llaqtaqa Betelpa inti haykuy ladon Bet-avén[3] llaqta qayllapin karqan.

³Chaymanta kutimuspataq Josueta nirqanku: — Ama yanqaqa llapaykuta kachawaykuchu, iskay waranqa otaq kinsa waranqapas Hai llaqtata hap'iqqa richunku. Ama llaqtantin runataqa kachawaykuchu, pisillan chay llaqtamanta hark'apakamuqqa kasqaku, nispa.

⁴Hinan Hai llaqtaman kinsa waranqa hina qharikunalla seqaykurqanku. Hai runakunataq ichaqa paykunata atiparqospa qatirimurqanku.

⁵Llaqta punkumantapacha rumi horqonakama qatishaspan, ura qhatapi kinsa chunka soqtayoq Israel runakunata wañurachirqanku. Chayraykun Israel runakunaq kallpanqa pasaqta chiriyarqan.

⁶Chaymi Josueqa Israel kurak taytakunantin llakikuymanta p'achankuta llik'ikurqanku, umankumanpas ñut'u hallp'awan hach'ikurqanku. Hinaspataq Señor Diospa arcan qayllapi pampakama k'umuykukuspa, chaypi qhepakurqanku ch'isiyanankama.

⁷Josuetaq nirqan: — ¡Ay! Apu Señor Diosníy, ¿imapaqraqmi Jordán mayutaqa kay llaqtaykita chimpachimuwarqankiku? ¿Amor runakunaq hap'isqan kanaykupaqchu hamurqayku? ¿Paykunaq thunisqan rikukunaykupaqchu hamurqayku? ¡Aswanchá Jordán mayuq chimpallanpiraq kamushaykuman karqan!

⁸¡Ay! Señor Diosníy, ¿kunanri ima nispataq rimarisaq Israel runakuna awqanmanta ayqerikapun chayri?

⁹Canaán suyupi tiyaq runakunaqa ayqerikapusqaykuta lliwchá yacharqonqaku, hinaspachá llapanku huñunarqokuspa ch'usaqta tukurqapuwanqaku. Qanri, chay hina kaqtin, ¿imanankitaq hatun sutiykimanta? nispa.

¹⁰Señor Diostaq nirqan: — ¡Sayariy! ¿Imatan k'umurayashanki?

¹¹Israel runakunan huchallikunku, paykunawan rimanakusqayta p'akispanku. Ch'usaqyachinapaq kaqmantan hoqarimunku, llullakunkuraqtaq, suwakusqankutapas kaqninku ukhumanmi pakarqonku.

¹²Chayraykun Israel runakunaqa awqankuwan churanakuyta mana atipunkuchu, aswanpas ayqerikapunku. Qankunapas ch'usaqyachinallapaqtaqmi kapushankichis, manachus ch'usaqyachinapaq kaqta kunan ch'usaqyachinkichis chayqa, manan ñoqaqa hayk'aqpas qankunawan kasaqchu.

¹³Sayariy, runakunata ch'uyanchamuy. Paykunata nimuy, Israelpa Señor Diosninmi nin: Israel runakuna, qankunan ch'usaqyachinapaq kaqkunata hoqarimurqankichis. Chaytachus qankunamanta mana llapantachu ch'usaqyachinkichis chayqa, manapunin awqaykichiswan churanakuytaqa atinkichischu. Chayrayku, paqarinpaq ch'uyanchakamuychis, nispa.

¹⁴Paqarinmi llapalla ayllu-ayllu hamunkichis, akllasqay ayllutaqmi chimpamuwanqa mirayninkuman hina t'aqa-t'aqa, akllasqay t'aqataqmi chimpamuwanqa familia-familia, akllasqay familiataqmi chimpamuwanqa ch'ulla-ch'ullamanta qharikuna.

¹⁵Chay qharikunamanta mayqentachus huchachasaq chaymi kanasqa kapunqa llapan familiantin, kaqninkunantin, ñoqawan rimanakusqata mana hunt'aspa Israelpi millay p'enqayta ruwasqanmanta, nispa.

¹⁶Qhepantin paqartaq tutallamanta sayarispa, Josueqa runakunata huñuchimurqan ayllu-ayllu t'aqasqata, chaymantataqmi Señor Diosqa Judá aylluta akllarqan.

¹⁷Hinan Josueqa Judá ayllu runakunata kamachirqan mirayninkuman hina t'aqa-t'aqata reqsichinanpaq, chaymantataqmi Zera nisqa t'aqa akllasqa karqan, chay t'aqamantataq Zabdi familia akllasqa karqan.

¹⁸Zabdiq wawankunañataq ch'ulla-ch'ullamanta chimparqanku, chaypitaq Carmiq churin Ahán hap'isqa karqan. Carmiq taytanmi karqan Zabdi, Zabdiq taytantaq Judá ayllumanta Zera.

¹⁹Hinaqtinmi Josueqa Ahanta nirqan: — Wawalláy, Israelpa Diosnin Señorta hatunchay, ama pakaykuspa sut'illanta ima ruwasqaykitapas willaykuway, nispa.

²⁰Chaymi Ahanqa willakurqan: — Arí, cheqaqtapunin Israelpa Diosnin Señor contra huchallikurqani.

²¹Jericó llaqtamanta hoqarimusqaykupin rikurqani Babiloniamanta huk sumaq capata, iskay kilo kurak qolqeta, kuskan kilo kurak wask'a qoritawan. Chaykunan sonqoyta suwarqowarqan, chaymi aparikamurqani, chaykunatan karpay ukhuman p'ampaykurqani, qolqetaqmi chaykunaq pachanpiraq kashan, nispa.

²²Josuetaq Ahanpa karpanman runakunata kacharqan, paykunataq tarirqamurqanku llapan pakasqa kaqkunata, qolqetataq aswan ukhunpi.

²³Hoqarispataq Josueman Israel runakunamanwan aparqanku, chaytataq Señor Diospa ñawpaqenman churaykurqanku.

²⁴Ahantataq Llakikuy Wayq'oman pusarqanku, llapan wawankunantinta, hinallataq wakankunantinta, asnonkunantinta, ovejankunantinta, karpantapas, lliw kaqninkunatapas, kaqllataq chay qolqeta, capata, wask'a qoritapas apallarqankutaq.

²⁵Hinan Josueqa nirqan: — ¿Imanaqtinmi kay hatun llakiman churaykuwankiku? Kunanmi Señor Diosqa hatun llakiwan muchuchisunki, nispa. Chayta niykuqtinmi llapan Israel runakunaqa rumiwan ch'aqespa Ahanta wañuchirqanku, chaymantataq tukuy imaymanankunatawan kanaykurqanku.

²⁶Chay patamantaq askha rumiwan tawqaykurqanku, chaymantapachan chay rumi tawqasqaqa hinalla kapurqan. Chayraykutaqmi chay cheqasta suticharqanku Llakikuy Wayq'o nispa. Chayraqmi Señor Diosqa Israel contra manaña phiñakurqanchu.