Read Diospa Simin Qelqa JOSUÉ 8 Bible Online

JOSUÉ 8 - Diospa Simin Qelqa bible

JOSUÉ 8

¹Señor Diostaq Josueta nirqan: — Ama manchakuychu, aswanpas kallpachakuy. Llapan soldadokunapiwan Hai llaqtawan maqanakuq puririy, ñoqan chay llaqta reyta runankunantinta atipachisqayki, hinaspa qopusqayki llaqtanta lliw hallp'ankunatawan.

²Imaynatachus Jericó reytapas runankunatapas ruwarqanki chay hinallatataqmi Hai reytapas runankunatapas ruwanki. Kunan kutipiqa qankunan uywankunatapas kaqninkunatapas apakamunkichis. Soldadokunataq llaqta qhepapi pakakunqaku qonqaylla phawaykunankupaq, nispa.

³Chaymi Josueqa llapan soldadokunantin Hai llaqtawan maqanakuq puririnanpaq wakichikurqan. Hinaspan kinsa chunka waranqa allichachaq soldadokunata akllaspa, paykunata tutalla kacharparispa

⁴nirqan: — Makilla uyariwaychis. Rispaykichismi llaqta qhepa qayllallapi pakarqarikunkichis, listollan kashankichis phawarqamunaykichispaq.

⁵Ñoqataq wakin soldadokunantin llaqtaman asuykusaqku, Hai runakuna maqaqniyku lloqsimuqtinkutaq ñawpaq kutipi hina paykunamanta ayqerikusaqku.

⁶Hinan paykuna ninqaku: Ñawpaq kuti hinan ayqekushawanchis, nispa. Ñoqaykutaq hinalla karukama qatichikusaqku.

⁷Chaykamataq qankunaqa pakakusqaykichismanta lloqsirqamuspa llaqtaman phawaykunkichis, Diosniykichis Señor Diosmi chay llaqtata qosunkichis.

⁸Hap'ispaykichis hinan llaqtata kanaykunkichis Señor Diospa nisqanman hina. Kamachisqayta hinan ruwankichis, nispa.

⁹Hinaspan Josueqa kacharparirqan, paykunataq Hai llaqtaq inti haykuy ladon Betelwan tupaypi pakakamurqanku. Josuetaq kaq karpallankupiraq illarirqan.

¹⁰Qhepantin paqartaq Josueqa tutallamanta sayarispa soldadonkunata huñuchirqan. Hinaspan payqa Israel kurak taytakunapiwan Hai llaqtawan maqanakuq soldadokunata pusarikuspa rirqan.

¹¹Paykunataq llaqtaq ñawpaqenta rispa wichay ladonpi samarqanku. Llaqtata paykunatawantaq wayq'o t'aqarqan.

¹²Josueqa phisqa waranqa hina soldadokunatan pakamusqa Hai llaqtaq inti haykuy ladon Betelwan tupayman.

¹³Chay hinan soldadokunaqa iskayman t'aqasqa karqanku, huk t'aqan llaqta inti haykuy ladopi pakasqa kasharqan, hukkaq t'aqataq wichay lado karpankupi kasharqan. Josueñataq chay tuta kuskan wayq'okama ñawparqan.

¹⁴Hai llaqta reymi chayta rikurqamuspa tutallamanta llapa soldadokunantin Jordán mayu ladoman usqhaylla lloqsimurqan Israel runakunawan maqanakunankupaq. Payqa manan yacharqanchu llaqtan qhepapi wakin Israel soldadokuna pakasqa kashasqanta.

¹⁵Josuetaq soldadokunantin Hai llaqta soldadokunamanta ch'inneq ñanninta waktasqanta ayqekurqan.

¹⁶Llapan Hai llaqta runakunataq Josueta qatinankupaq kamachisqa kaspanku llaqtankumanta karunchakurqanku.

¹⁷Llapallanpunin qharikunaqa Betelmantapas Haimantapas Israel runakunata qatiykachaq lloqsirqanku, chaykamataqmi llaqta punkukunaqa kicha-kicha wikch'usqa kasharqan.

¹⁸Chaymi Señor Diosqa Josueta nirqan: — Hap'isqayki lanzata hoqarillayña Hai llaqta ladoman, kunanmi chay llaqtata qopusqayki, nispa. Hinan Josueqa lanzanta Hai ladoman hoqarirqan,

¹⁹chaymi usqhayllata pakakusqankumanta phawarqamuspa llaqtaman phawaykurqanku, hap'ispataq ninawan kanaykurqanku.

²⁰Hai llaqta runakunataq qhepankuta qhawarikuspa, llaqtankumanta q'osñispa cielomanña hunt'aykushaqta rikurqamurqanku. Ch'inneq ñanninta ayqekuq Israel runakunapas paykunaman kutirirqamuqtinmi, manaña maynintapas ayqeyta atirqankuchu.

²¹Josuemi Israel runakunapiwan llaqtata ninaq ruphaykushasqanta qhawarispanku Hai llaqta soldadokunawan maqanakuq kutirimurqanku.

²²Chaymantataq llaqtaman haykuqkunaqa lloqsirqamurqanku, ahinapin Hai llaqta soldadokunaqa Israel soldadokunaq chawpinasqan rikukurqanku. Israel runakunataq llapallanta wañurachirqanku.

²³Hai llaqta reytan ichaqa kawsashaqllata Josueman aparqanku.

²⁴Paykuna qatiykachaq Hai llaqta soldadokunata llapanta espadawan wañuchispankutaq, Israel runakunaqa Hai llaqtaman kaqta kutiykurqanku chaypi qhepamuqkunata wañuchimunankupaq.

²⁵Chay p'unchaymi Hai llaqta runakuna llapallanku wañurqanku, chunka iskayniyoq waranqa qharikuna warmikuna ima.

²⁶Josueqa lanzanta Hai llaqta ladoman hoqarispan kaqlla kaykusharqan chay llaqta runakunata llapallanta wañurachinankukama.

²⁷Chaymantataq Israel runakunaqa llapan uywakunata runakunaq kaqninkunatawan paykunapaq apakurqanku, Señor Diospa Josueta kamachisqanman hina.

²⁸Josuepa kanaykachisqanmi Hai llaqtaqa chaymantapacha hinallapuni raqay-raqay kapurqan.

²⁹Hai llaqta reytataq Josueqa mallkipi seq'ochispa ch'isiyaqta warkurayachirqan. Inti haykuqtintaq ayanta apaqachispa llaqta haykuna cheqasman wikch'uchimurqan. Aya patamantaq rumita tawqaykurqanku, chaymantapachan chay rumi tawqasqaqa hinallapuni kapurqan.

³⁰Josueqa Ebal orqopin Israelpa Diosnin Señorpaq huk altarta ruwapurqan.

³¹Chaytan ruwarqan Señor Diospa kamachin Moisespa Israel runakunata kamachisqanman hina. Moisespa kamachikuy qelqanpin qelqasqa kashan: Mana thupasqa rumimanta altarta ruwapuwanki, nisqa. Hinan Israel runakunaqa ruphachina sacrificiota sumaq kawsay sacrificiotawan chay altarpi haywarqanku.

³²Chaymantataq Israel runakunaq ñawpaqenpi Josueqa chay altar rumikunapi Moisespa paykunaman qosqan kamachikuyta qelqarqan.

³³Chaykamataq llapan Israel runakuna, wak llaqtayoqkunapas, kurak taytakunapas, oficialkunapas, juezkunapas llapallanku Señor Diospa rimanakuy arcan qayllapi chimpapurantin sayaykurqanku, arca wantuq Leví runa sacerdotekunataq chawpinkupi karqan. Israel runakunaqa iskayman t'aqasqan karqanku saminchasqa kanankupaq, huk t'aqan Gerizim orqo ladopi karqan, huk t'aqataq Ebal orqo ladopi, Señor Diospa kamachin Moisespa kamachikusqanman hina.

³⁴Chaymantataq Josueqa kamachikuy qelqata llapallanta leeykurqan, saminchay simikunatapas ñakay simikunatapas.

³⁵Josueqa Moisespa qelqasqan kamachikuy simita llapachallantapunin llapa Israel qharikunaman, warmikunaman, wawakunaman, paykuna ukhupi tiyaq wak llaqtayoqkunamanpas leeykapurqan.