Read Diospa Simin Qelqa 2 TESALONICENSES 2 Bible Online

2 TESALONICENSES 2 - Diospa Simin Qelqa bible

2 TESALONICENSES 2

¹Wawqe-panaykuna, Señorninchis Jesucristoq kutimunanmanta, paywan kuska huñukunanchismantawan

²valekuykiku, ama yuyayniykichista usqhaylla hukman t'ikraychischu, amataq mancharikuychispaschu “Señorpa kutimunan p'unchayqa chayamunñan” nisqata uyarispa. Yaqapaschá chayta uyariwaqchis karqan profetizasqapipas, willasqapipas, otaq chayta leewaqchis karqan ñoqaykuq cartaykupas kanman hinata.

³Amapuni imaynallamantapas q'otuchikuychischu. Señorpa kutimunan p'unchay manaraq chayamushaqtinqa, Diospa contranpi sayariyraqmi kanqa, hinan millay-millay awqa sonqo runa rikhurimunqa, chay runaqa muchunanpaq t'aqasqañan.

⁴Chay runan sayarimunqa Dios contra, llapa yupaychanapaq kaqkuna contrapiwan, chaykunamantapas aswan munayniyoqman tukuspan Dios yupaychana wasimanraq haykunqapas, hinaspan chaypi dueñochakuspa ninqa: “Ñoqaqa Diosmi kani”, nispa.

⁵¿Manachu yuyarinkichis qankunawan kashaspayraq chayta qankunaman nisqayta?

⁶Kunanqa yachankichismi imachus chay runata hark'ashasqanta, ahinapin chay runaqa rikhurimunan tiempollapi rikhurimunqa.

⁷Chay millay-millaypa pakasqa atiyninqa ruwakushanñan, ichaqa chay hark'aqqa apasqa kanankaman hark'ashallanqapuni.

⁸Chaypachan chay millay-millay awqa sonqo runaqa rikuchikunqa, paytan Señorqa hamuspa samayninwan wañurqachinqa, lliphlli-kayninwantaq thuninqa.

⁹Chay awqa sonqo runaqa Satanaspa atiyninwanmi rikhurimunqa, hinaspan imaymana llulla milagrokunata, señalkunata, musphanakunatawan ruwanqa.

¹⁰Hinallataq tukuy rikch'aq mana chanin ruwaykunata ruwaspa q'otunqa ñak'ariyman ripuqkunata. Paykunaqa ñak'ariyman ripunku qespichisqa-kayta mana munaspa, cheqaq-kayta pisichaspa mana chaskisqankurayku.

¹¹Chaymi Diosqa paykunaman chayachimun sinchi pantachiq yuyayta, llullakaqta chaskinankupaq,

¹²ahinapi cheqaq-kayta mana chaskiy munaqkuna llapallanku muchuchisqa kanankupaq. Paykunaqa millay mana chanin kaqpin q'ochukurqanku.

¹³Señorpa munakusqan wawqe-panaykuna, ñoqaykuqa qankunamanta Diosman graciasta qonaykupunin, qallariymantapacha qespichisqa kanaykichispaq Diospa akllakusqasuykichismanta. Qankunataqa Diosmi qespichisunkichis Santo Espíritu paypaq t'aqasqasuykichisrayku, cheqaq-kaypipas iñisqaykichisraykupiwan.

¹⁴Chaypaqmi Diosqa waqyarqasunkichis allin willakuykunata willasqaykuwan, Señorninchis Jesucristoq hatunchasqa-kayninpi paywan kuska kanaykichispaq.

¹⁵Chay hinaqa, wawqe-panaykuna, allintapuni sayashaychis, simiwanraq cartawanraq qankunata yachachisqaykuta ama qonqaspa.

¹⁶Kikin Señorninchis Jesucriston Dios Yayanchispiwan, munakuwaspanchis sumaqta qhawariwanchis, wiñaypaqmi sonqochawanchis, allin suyakuytapas qowanchis.

¹⁷Paypunin sonqoykichista kallpachasunkichis, hinallataq tukuy allin rimaypipas ruwaypipas allinta takyachisunkichis.