Read Diospa Simin Qelqa 1 TIMOTEO 3 Bible Online

1 TIMOTEO 3 - Diospa Simin Qelqa bible

1 TIMOTEO 3

¹Kay rimayqa cheqaqmi: Pipas umalli kaytapuni munan chayqa, allin llank'aytan akllakun.

²Chaymi umalliqa kay hina kanan: mana huchachana, ch'ulla warmiq qosallan, pay kikinta allinta cuidakuq, allin yuyaywan puriq, respetanapaq hina kawsaq, qorpachaqllapuni, yachachinanpaqpas allin wakichisqa.

³Paymi kanan mana machaq, mana saltaq sonqo, aswanpas llamp'u sonqo, munakuq, piwanpas mana churanakuq, qolqemanpas mana k'askakuq.

⁴Paymi kanan wasinpi kaqkunata allinta kamachiq, wawankunatapas kasukuqta, respetakuqta yachachiq.

⁵Wasinpi kaqkunata mana kamachiyta yachaqqa, ¿imaynatan Diospa iglesianta cuidanman?

⁶Umalliqa ama chayllaraq iñiqchu kachun, paqtan sinchita hatunchakuspa saqra hina huchachasqa kanman.

⁷Diospi mana iñiq runakunaqpas allinpaq hap'isqanmi kanan, ama p'enqaymanpas saqraq toqllanmanpas urmaykunanpaq.

⁸Chay hinallataqmi diaconokunapas respetana runakuna kananku, rimasqankuta hunt'aqkuna, mana machaqkuna, ama q'otuspa qolqeta tariy munaqkuna ima.

⁹Paykunaqa ch'uya concienciawanmi k'askakunanku iñiymanta sut'inchasqa yachachikuyman.

¹⁰Chay runakunaq kawsaynintaqa ñawpaqtan allintaraq qhawarinaykichis, chaymantañan mana huchachana hina kaqtinku diácono kanankupaq churanaykichis.

¹¹Hinallataq warmikunapas[1] respetana warmikuna kananku, ama simi apachu, pay kikinta allinta cuidakuq, tukuy imapipas hunt'aq.

¹²Diaconokunaqa ch'ulla warmiq qosallanmi kananku, wawankutapas wasinkupi kaqkunatapas allintan kamachinanku.

¹³Allinta llank'aq diaconokunaqa, allin respetasqan kanqaku, Jesucristopi iñiyninkupitaq astawan kallpachakuspa wiñanqaku.

¹⁴Usqhayllan qanwan tupaykuyta munashani, ichaqa paqtan manapas usqhamuymanchu, chaymi kay cartata qelqamushayki,

¹⁵imaynatachus Diospi iñiqkuna ukhupi purinanchista yachanaykipaq, chayqa kawsaq Diospa iglesianmi. Chay iglesiataqmi Diosmanta cheqaq-kayta takyachinpas waqaychanpas.

¹⁶Diospi iñiymanta sut'inchawasqanchis may hatunpuni kasqantaqa lliwmi yachanku: Criston runa cuerpoyoq rikuchikurqan, Santo Espiritun chanin kasqanta sut'incharqan, angelkunaq rikusqanmi karqan, hatun suyukunaman willasqan karqan, kay pachapi runakunan paypi iñirqan, hanaq pachapi chaskisqan karqan.