Read Diospa Simin Qelqa 2 TIMOTEO 1 Bible Online

2 TIMOTEO 1 - Diospa Simin Qelqa bible

2 TIMOTEO 1

¹Ñoqa Pablon Jesucristoq apostolnin kani, Diospa munayninman hina, Jesucristopi prometesqa kawsayta willanaypaq.

²Munasqa churíy Timoteo, Dios Yaya, Señorninchis Jesucristopiwan anchata saminchasunki, khuyapayasunki, thak-kaynintapas qosunki.

³Diosmanmi graciasta qoshallanipuni, tuta-p'unchay mañakuspan yuyarikullaykipuni. Diostan ch'uya sonqowan servini, imaynan ñawpa tayta-mamaykuna servirqan hinata.

⁴Waqasqaykita yuyarispaymi maytapuni qanta rikuykuyta munayki anchata kusikunaypaq.

⁵Yachanin cheqaqtapuni Diospi iñisqaykita. Ñawpaqtaqa hatun mamayki Loidawan mamayki Eunicepiwanmi chay hina iñiyniyoq karqanku, allintan yachani qanpas chay hina iñiynillayoqtaq kasqaykita.

⁶Makiykunata qanman churaykuqtiymi Diosqa atiy qokuyta qorqasunki, chaymi yuyarichiyki chay atiy qokuyta ninata hina sansarichinaykipaq.

⁷Diosqa manan manchapakuy espiritutachu qowarqanchis, aswanpas atiyta, munakuyta, kikinchista cuidakuytawanmi qowarqanchis.

⁸Chay hinaqa, ama p'enqakuychu Señorninchismanta willakuytaqa, amallataq ñoqa preso kasqaymantapas p'enqakuychu, aswanpas Diospa kallpachasqasuykiman hina Cristomanta allin willakuykunarayku ñoqa hina ñak'ariy.

⁹Paymi qespichiwarqanchis, hinaspa ch'uyata kawsananchispaq waqyawarqanchis, ichaqa manan allin ruwasqanchisraykuchu, aswanpas paypa yuyaykusqanman khuyapayawasqanchisman hinan. Chay hinatan Diosqa Jesucristopi khuyapayawarqanchis manaraq kay pachapas qallarishaqtin.

¹⁰Kunanmi ichaqa qespichiqninchis Jesucristoq hamusqanwan chay khuyapayakuyninta rikuchiwanchis, paymi wañuyta atipanña, hinaspan allin willakuykunawan sut'ita rikuchirqan mana hayk'aq tukukuq wiñay-wiñay kawsayta.

¹¹Diosmi ñoqata apostolnin kanaypaq churawarqan allin willakuyninkunata willanaypaq yachachinaypaqwan.

¹²Chayraykun ñak'ariykunata muchushani, ichaqa manan p'enqakunichu, ñoqaqa Jesucristota reqsinin, paypin iñini, allintataq yachanipas paypa qowasqanta[1] taripay p'unchaykama waqaychananpaq atiyniyoq kasqanta.

¹³Ñoqamanta uyarisqayki cheqaq yachachikuykunata hap'ikuy, chayman hinataq yachachiy, hinaspa Jesucristowan hukllachasqa kaspa iñiywan munakuywan kawsay.

¹⁴Diospa hap'ichisqasuyki allin yachachikuyta waqaychay, ñoqanchispi tiyaq Santo Espirituq yanapayninwan.

¹⁵Imaynan yachankiña hina, Asia provinciapi kaqkunaqa llapallankun saqerpariwanku, paykuna ukhupin kanku Figelowan Hermogeneswan.

¹⁶Onesiforoq wasinpi kaqkunata Señor khuyapayachun, payqa askha kutipin kallpachaykuwarqan, manataq preso kasqaymantapas p'enqakurqanchu,

¹⁷aswanmi Roma llaqtaman chayamuspa hina tukuy sonqo maskhawarqan tarinawankama.

¹⁸Señorninchis taripay p'unchaypi payta khuyapayachun. Qanmi allinta yachanki Efeso llaqtapipas anchatapuni yanapawasqanta.