Read Diospa Simin Qelqa 2 TIMOTEO 2 Bible Online

2 TIMOTEO 2 - Diospa Simin Qelqa bible

2 TIMOTEO 2

¹Qanqa, churíy Timoteo, Jesucristoq ancha khuyapayakuyninwan kallpachakuy.

²Askha testigokunaq qayllanpi uyariwasqaykita yachachiy confiakuna iñiq runakunaman, paykunapas wakichisqa kaspa hukkunaman yachachinankupaq.

³Qanpas Jesucristoq allin soldadon hinapuni ñak'ariykunata muchuysikuy.

⁴Manan pi soldadopas serviciopi kashaspaqa llaqta kawsaypi ruwaykunata ruwaysikunchu, aswanpas kamachiqninpa munaynillantan ruwan.

⁵Chay hinallataqmi llallinakuypi phawaqpas manachus kamachisqaman hina phawan chayqa, manan premiota chaskinqachu.

⁶Chakrata allinta llank'aqqa payraqmi chakraq rurusqanta cosechanan.

⁷Chay nisqayta allinta yuyaymanay, hinan Señorqa tukuyta entiendechisunki.

⁸Yuyariy Jesucristomanta, paymi wañusqanmanta kawsarimpurqan, paymi Davidpa miraynin, chaymi willasqay allin willakuykunaqa.

⁹Chay allin willakuykunaraykun muchushani, mana allin ruwaq hina cadenawan watasqa kanaykama. Diospa siminmi ichaqa mana watasqachu kashan.

¹⁰Chaymi tukuyta muchuni Diospa akllakusqankunarayku, paykunapas Jesucristowan hukllachasqa kaspa qespichisqa kanankupaq Dioswan wiñayta kawsanankupaqwan.

¹¹Kay simiqa cheqaqmi: Jesucristowanchus wañusunchis chayqa, payllawantaqmi kawsasunchispas.

¹²Pacienciawanchus muchusun chayqa, payllawantaqmi kamachisunchispas. Paytachus negasunchis chayqa, paypas negallawasunchistaqmi.

¹³Manaña hunt'aq kaqtinchispas, payqa hunt'aqllapunin kashanqa, payqa manan pay kikinta negakuyta atinmanchu.

¹⁴Iñiqkunaman chaykunata yuyarichiy. Hinaspa Señorpa ñawpaqenpi tukuy sonqowan anyay, yanqa thawtiy simikuna hawa ama ch'aqwanankupaq. Chay ch'aqwaykunaqa manan imapaqpas valenchu, aswanpas uyariqkunatan waqllichin.

¹⁵Diospa ñawpaqenpi allinpaq hap'isqa kanaykipaq kallpachakuy, mana imamantapas p'enqakuyniyoq llank'aq hina, cheqaq-kay simita allinta yachachinaykipaq.

¹⁶Dios contra thawtiykunamanta t'aqakuy, chay hina thawtiqkunaqa astawanraqmi mana chaninpi chinkaykapunqaku.

¹⁷Paykunaq yachachikuyninkuqa gangrena hinaraqmi mast'arikushan. Paykunamantan Himeneowan Filetowan kashanku,

¹⁸paykunan cheqaq-kaymanta t'aqakapuspa ninku: Kawsarimpuyqa ñan karqanña, nispa. Chay hinapin wakinkunaq iñiynintapas waqllichinku.

¹⁹Diospa teqsi churasqanmi ichaqa mana kuyuriq sayashan, chay teqsipin kay hina qelqasqa kashan: “Señorqa reqsinmi paypa kaqkunataqa”, nispa. Kashallantaqmi: “Señortaqa reqsinin” niqkuna mana chanin-kaymanta t'aqakuchun, nisqapas.

²⁰Huk hatun wasipiqa manan qorimanta qolqemanta serviciokunallachu kan, aswanpas kallantaqmi k'ullumanta, t'urumanta serviciokunapas. Wakinmi allin kaqkunapi servikunanpaq, wakintaq sapa p'unchay qhellichanapaq.

²¹Chhaynaqa, pipas chay qhelli kaqmanta ch'uyanchakun chayqa, chaniyoq serviciokuna hina qhawasqan kanqa. Payqa Señorninpaq ch'uyanchasqan kanqa, payta servinanpaq, tukuy allin kaqta ruwananpaqpas wakichisqa.

²²Wayna-kaypa waqllisqa munapayayninkunamanta ayqey, hinaspa munashallaypuni chanin kawsayta, hunt'aq-kayta, munakuyta, hukkunawan sumaq kawsayta, ch'uya sonqowan Señorta llapa yupaychaqkunawan kuska.

²³Yanqa mana yuyayniyoq churanakuykunamanta t'aqakuy, qanqa yachankiñan chaykunaqa ch'aqwayllata hatarichisqanta.

²⁴Señorpa kamachinqa manan ch'aqwaykunapichu purinan, aswanmi llapapaq munakuyniyoq kanan, yachachinanpaqpas kusan kanan, pacienciayoqtaq kananpas

²⁵kutipakuqkunata llamp'u sonqowan anyananpaq. Ichapas Diosqa yuyayman kutirichinman cheqaq-kayta reqsinankupaq,

²⁶yuyayninkuta hap'ikuspa saqraq toqllanmanta ayqenankupaqwan. Paykunaqa saqraq watasqanmi kashanku munayninta ruwanankupaq.