Read Diospa Simin Qelqa 2 TIMOTEO 3 Bible Online

2 TIMOTEO 3 - Diospa Simin Qelqa bible

2 TIMOTEO 3

¹Kaytaqa yachanaykin: tukukuy qaylla p'unchaykunataqa sasa tiempokunan chayamunqa.

²Runakunan kanqa paykuna kikinkuta munakuqkuna, qolqe sonqokuna, alabakuqkuna, hatunchakuqkuna, runamasinkuta k'amiqkuna, tayta-mamankuta mana kasuqkuna, mana reqsikuqkuna, Diosta mana manchakuqkuna,

³mana munakuyniyoqkuna, mana khuyapayakuqkuna, yanqa qasi tumpakuqkuna, aychankuq munaynillanta ruwaqkuna, millay yana alma runakuna, tukuy allinkaqta cheqnikuqkuna,

⁴amigonkunata hap'iykachiqkuna, waq'a hina ruwaqkuna, pay-payman tukuqkuna ima. Chay runakunaqa Dios munakunankutaqa aycha kusichiyllapin puriyta munanqaku,

⁵Dios sonqo runamanmi rikch'akunqakupas, kawsayninkuwantaqmi ichaqa Dios sonqo-kaytapas “manan valenchu” ninqaku. Qanqa chay hina runakunamanta t'aqakuy.

⁶Chay hina runakunaqa wasi-wasita haykuspan pisi yuyayniyoq sinchi huchasapa warmikunaq sonqonta suwanku. Chay warmikunan imaymana niraq munapakuypa apaykachasqan purinku.

⁷Paykunaqa imatapas yachashallankupunin, ichaqa manan hayk'aqpas cheqaq-kaytaqa entiendenkuchu.

⁸Imaynan Janeswan Jambreswanpas Moisespa contranpi sayarirqanku, ahinallataqmi chay qharikunapas cheqaq-kaypa contranpi sayarinku. Paykunan waqllisqa yuyayniyoq kaspa Diospa wikch'usqan mana iñiyniyoq runakuna kanku.

⁹Paykunaqa manan astawanpas allinyanqakuchu, llapa runan reparanqa mana yuyayniyoq kasqankuta, imaynan Moisés contra sayariq runakunatapas repararqanku hinata.

¹⁰Qanmi ichaqa allinta entienderqanki yachachikuyniykunata, imaynatachus purisqayta, imachus yuyaykusqayta, iñiyniyoq kasqayta, pacienciayoq kasqayta, munakuq kasqayta, muchukuq kasqayta,

¹¹qatiykachasqa kasqayta, ñak'arisqaykunata ima. Qanqa allintan yachanki Antioquía llaqtapi, Iconio llaqtapi, Listra llaqtapipas tukuy imaymana sucedewasqanta, qatiykachaykunata muchusqaytapas, ichaqa Señormi tukuy chaykunamanta qespichiwarqan.

¹²Jesucristowan hukllachasqa kaspa Diospaq hinapuni kawsayta llapa munaqkunaqa qatiykachasqapunin kanqaku.

¹³Ichaqa millay runakunapas q'otuq runakunapas aswan-aswanraqmi mana chanin-kayman chayanqaku, q'otuspanku q'otuchikuspanku ima.

¹⁴Qan ichaqa, imatachus yachaqasqaykipi allinta iñisqaykipipas qaqata sayay. Qanqa yachankin pikunachus chaykunata yachachisqasuykita.

¹⁵Wawa kasqaykimantapachan Diospa Simin Qelqakunataqa yacharqanki, chaykunaqa yachaytan qosunki, Jesucristopi iñispa qespikunaykipaq.

¹⁶Diospa Simin Qelqakunaqa llapallanmi Diospa yuyaychasqan, chayraykun allinpuni yachachinapaq, anyanapaq, wanachinapaq, chanin kawsayta yachachinapaq.

¹⁷Ahinapin Dios sonqo runaqa allin yachachisqa kanqa, tukuy allin kaqkunata ruwananpaqpas allin-allin wakichisqa.